မကွေးတိုင်း၊ စလင်းမြို့နယ်တွင် အင်အား ၂၀၀ကျော်ဖြင့် စစ်ကြောင်းထိုးလာသော စစ်ကောင်စီတပ်အား မိုင်းဆွဲတိုက်ခိုက်ရာ ထိခိုက်သေဆုံးမှုရှိကြောင်း မင်းဘူးခရိုင် အမှတ်(၁)တပ်ရင်း PDF-Salinအဖွဲ့က သတင်းထုတ်ပြန်သည်။
နိုဝင်ဘာ ၁၀ ရက်နံနက်ပိုင်းက စလင်းမြို့နယ် ကျွဲဦးကျေးရွာကို အင်အား ၂၅၀ခန့်ဖြင့်စစ်ကြောင်းထိုးလာသော စစ်ကောင်စီတပ်များကို မင်းဘူးခရိုင် အမှတ်(၁)တပ်ရင်း၊အမှတ်(၂) တပ်ရင်း၊ အမှတ်(၅)တပ်ရင်းနှင့် SLN-LPDF ပြည်သူ့ကာကွယ်ရေးတပ်ဖွဲ့များကမိုင်းဆွဲပြီး အလစ်ဝင်ရောက်တိုက်ခိုက်ခဲ့ခြင်း ဖြစ်သည်။
တိုက်ခိုက်မှုကြောင့် စစ်ကောင်စီတပ်သား ၃၀ထက် မနည်းသေဆုံးပြီး ၂၀ကျော် ထိခိုက်ဒဏ်ရာရရှိကြောင်း၊ ထို့အပြင် စစ်ကြောင်းမှူးဖြစ်သူ ခြေတစ်ဖက်ပြတ်သွားကြောင်း တပ်တွင်းသတင်းပေးထံမှ သတင်းရရှိသည်ဟု PDF-Salin အဖွဲ့၏ ပြန်ကြားရေးတာဝန်ခံက ပြောသည်။ သို့သော် အဆိုပါအချက်အလက်များနှင့် ပတ်သက်ပြီး လူထုနွေဦးက သီးခြားအတည်မပြုနိုင်ပေ။
အဆိုပါစစ်ကြောင်း၌ စလင်းတပ်ရင်း ၂၅၃၊ ၂၅၄၊ ၂၅၅တို့မှ စစ်ကောင်စီတပ်သားများလည်း ပါဝင်ပြီး အင်အားမလောက်၍ အခြားဒေသမှ ပို့ဆောင်ထားသည့်အင်အားများ ပါဝင်သည်ဟု ဆိုသည်။
“ငလှိုင်တွင်းရွာရဲ့အနောက်ဘက်တောင်ကုန်းမှာ အထိုင်ချထားတဲ့စခန်းရှိတယ်။ အဲဒီကနေထွက်လာတာ။ သူတို့က နယ်မြေခံမဟုတ်ဘဲ ရန်ကုန်ဘက်ကလာတဲ့အတွက်ကြောင့် ပြီးတော့ဦးဆောင်တဲ့ဗိုလ်ကလည်း အဲဘက်မှာရောက်တာ နှစ်ညပဲရှိသေးတယ်။”ဟု PDF-Salin အဖွဲ့၏ ပြန်ကြားရေးတာဝန်ခံက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
မိုင်းထိပြီးနောက် ယင်းစစ်ကြောင်းသည် စလင်းမြို့ဘက်သို့ ပြန်ဆုတ်သွားသည်ဟု ဆိုသည်။
မကွေးတိုင်းအတွင်းရှိ စစ်ကောင်စီတပ်စွဲရာနေရာများအနီး ဖြတ်သန်းသွားလာပါက သတိပြုသွားလာကြရန် စလင်း PDFက သတိပေးထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)