စစ်ကိုင်းတိုင်း၊ ရေဦးမြို့ပေါ်ရှိ စစ်ကောင်စီတပ်သားများ အလင်းဝင်ရန် တိုက်တွန်းစာများ ဒရုန်းဖြင့် ကြဲချခဲ့ကြောင်းရွှေဘိုခရိုင်အမှတ်(၁၄)တပ်ရင်း၊ ပြည်သူ့ကာကွယ်ရေးတပ်ဖွဲ့(ရေဦး)၏ တပ်ရင်းမှူးက ပြောသည်။
ယနေ့ (နိုဝင်ဘာ ၁၀ ရက်) ညနေ ၅နာရီခန့်က ရေဦးမြို့ပေါ်ရှိ အထပ်မြင့်တိုက်များပေါ်၌ နေရာယူထားသော စစ်ကောင်စီတပ်သားများထံ ရေဦး PDFအဖွဲ့က Fix Wings ဒရုန်းဖြင့် အလင်းဝင်ကြရန် တိုက်တွန်းစာများ ကြဲချခဲ့ခြင်းဖြစ်သည်။
“ ခံစစ်ပြင်မနေပါနဲ့ ။ မင်းမိသားစုအတွက် မင်းအသက်ရှင်သင့်တယ် ”၊ “ပြည်သူ့ရင်ခွင်အမြန်ခိုလှုံကြ”ဟု ရေးသားထားသော စာသားများနှင့်အတူ အလင်းဝင်လိုပါက ဆက်သွယ်ရန် ရေဦး PDF၊ ပကဖ၊ ပအဖတို့၏ ဆက်သွယ်ရန်တယ်လီဂရန်အမည် @yeupdf ကိုပါ ထည့်သွင်းရေးသားထားသည်။
![ရေဦးမြို့ပေါ်ရှိ စစ်ကောင်စီတပ်သားများထံသို့ အလင်းဝင်ရန်တိုက်တွန်းစာများ ဒရုန်းဖြင့် ကြဲချ](https://i0.wp.com/www.ludunwayoo.com/wp-content/uploads/2023/11/399563629_676571664541629_6501504236657606885_n.jpg?resize=720%2C480&ssl=1)
“အလင်းဝင်ချင်တဲ့သူတွေ အချိန်မနှောင်းသေးဘူး။ ကိုယ့်အသက်ကို နှမျောတယ်။ ကိုယ့်မိသားစုဘဝရှေ့ရေး ထည့်စဥ်းစားတတ်တယ်ဆိုရင်တော့ ဒီအချိန်မှာ အလင်းဝင်သင့်ပြီလို့ ယူဆပါတယ်။ အလင်းဝင်သင့်ပြီလို့ ပြောချင်ပါတယ်။ နိုင်မြင်းက ဘယ်မြင်းလဲဆိုတာ အားလုံးသိနေပြီးသားလို့ ထင်ပါတယ်။ ရှေ့ဆက်ပြီးတော့ ဖက်ဒရယ်ဒီမိုကရေစီနိုင်ငံတော်သစ်ကို တည်ဆောက်တဲ့အခါမှာ အတူတူပါဝင်နိုင်ဖို့အတွက် အခုကတည်းက အလင်းဝင်ထားရင် ကောင်းကျိုးတွေဖြစ်လာမယ်လို့ ပြောချင်ပါတယ်။”ဟု ရေဦး PDF အဖွဲ့ တပ်ရင်းမှူးက ပြောသည်။
![ရေဦးမြို့ပေါ်ရှိ စစ်ကောင်စီတပ်သားများထံသို့ အလင်းဝင်ရန်တိုက်တွန်းစာများ ဒရုန်းဖြင့် ကြဲချ](https://i0.wp.com/www.ludunwayoo.com/wp-content/uploads/2023/11/400649492_676571577874971_5358174705184544863_n.jpg?resize=720%2C540&ssl=1)
ထို့အပြင် အခြားနယ်များ၌ မြို့သိမ်းတိုက်ပွဲများဖြစ်လာပြီးနောက်ပိုင်း ရေဦးမြို့အရှေ့ခြမ်း ပျူစောထီး ကျေးရွာနှစ်ရွာ၌ တပ်စွဲထားသော စစ်ကောင်စီတပ်မှာ တပ်ပြန်ခေါက်သွားကြောင်း၊ ထို့အပြင် ခံစစ်ပြင်သည့်အနေဖြင့် ရေဦးမြို့ရှိ ဘော်ဒါဆောင်များအပါအဝင် အထပ်မြင့်အဆောက်အဦးများ၌ စစ်ကောင်စီတပ်က နေရာယူထားကြောင်း ရေဦး PDF၏ တပ်ရင်းမှူးက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
![](https://i1.wp.com/ludunwayoo.com/wp-content/uploads/2021/08/banner-logo1-50px.png)