ကရင်နီ(ကယား)ပြည်နယ် မယ်စဲ့မြို့နယ်ရှိ စစ်ကောင်စီတပ်စခန်း နှစ်ခုကို ကရင်နီဒေသတပ်ပေါင်းစုက တိုက်ခိုက်သိမ်းပိုက်ခဲ့ရာ ရရှိခဲ့သည့်လက်နက်ခဲယမ်းများကို အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက ယနေ့ ထုတ်ဖော်ပြသခဲ့သည်။
နိုဝင်ဘာ ၇ရက်က မယ်စဲ့မြို့နယ် ပန်တိန်းကျေးရွာ စစ်ကောင်စီ၏ ကာကင်းကုန်း နှစ်ခုကို တော်လှန်ရေးတပ်ပေါင်းစုက တိုက်ခိုက်သိမ်းပိုက်ခဲ့ခြင်း ဖြစ်သည်။
![(ပန်တိန်းစခန်းသိမ်းတိုက်ပွဲမှ ရရှိသော လက်နက်ခဲယမ်းများ။ ဓာတ်ပုံ - MOD)](https://i0.wp.com/www.ludunwayoo.com/wp-content/uploads/2023/11/400340449_676561884542607_8475434619073465565_n.jpg?resize=768%2C576&ssl=1)
ကာကွယ်ရေးဝန်ကြီးဌာနက ဖော်ပြသည့် ဓာတ်ပုံများအရ စခန်းသိမ်းတိုက်ပွဲအတွင်း စစ်ကောင်စီတပ်ထံမှ လက်နက်ကြီး၊ လက်နက်ငယ်နှင့် စနိုက်ပါအပါအဝင် စုစုပေါင်း ၁၆လက်ထက်မနည်း သိမ်းပိုက်နိုင်ခဲ့ပြီး လက်နက်ကြီးကျည်များ၊ (၄၀)မမ ကျည်များနှင့်အီနာကာဗုံးသီးများ လက်နက်ငယ်ကျည်များ စွာကိုတော်လှန်ရေးတပ်ပေါင်းစုက သိမ်းပိုက်နိုင်ခဲ့ခြင်းဖြစ်သည်။
အဆိုပါစစ်ဆင်ရေးကို ကရင်နီလူမျိုးပေါင်းစုံပြည်သူ့လွတ်မြောက်ရေးတပ်ဦး-ကလလတ(KNPLF)၊ ကရင်နီတပ်မတော်(KA)၊ ကရင်နီအမျိုးသားများကာကွယ်ရေးတပ်(KNDF)၊ ဘောလခဲPDF၊ ဖားဆောင်း PDF တို့ ပူးပေါင်းပြီး တိုက်ခိုက်ခဲ့ခြင်းဖြစ်သည်။ စစ်ဆင်ရေးကို ‘၁၁၀၇စစ်ဆင်ရေး’ဟုလည်း အမည်ပေးထားသည်ကို ကရင်နီသတင်းရင်းမြစ်အချို့က ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)