စစ်တွေတက္ကသိုလ်မှ အဝေးသင်စာမေးပွဲ ဖြေဆိုပြီးရေကြောင်းမှပြန်လာသည့် တက္ကသိုလ် ကျောင်းသား ကျောင်းသူများ လိုက်ပါလာသော မော်တော်ကိုစစ်ကောင်စီတပ်က သေနတ်ဖြင့်ပစ်ခတ်ခဲ့သည်။
မြေပုံမြို့နယ်အတွင်း ရေကြောင်းတနေရာတွင် ယမန်နေ့(နိုဝင်ဘာလ ၂၀ရက်)က ယင်းကဲ့သို့ ပစ်ခဲ့ခြင်းဟုဒေသခံများကပြောသည်။
” မြေပုံမြို့နယ် တောင်ဖလာတောင်မှာ တပ်စွဲထားတဲ့စကစ တပ်ရင်း ခလရ ၉၃ က ပစ်တာ။ကျောင်းသားတွေ အိမ်ပြန်လာတဲ့ မော်တော်ကို သေနတ်နဲ့ ပစ်တာ။ မော်တော်ကို လေးချက်ထိပါတယ်” ဟု သတင်းရင်းမြစ်တဦးကပြောသည်။
ထိုပစ်ခတ်မှု၌ လူထိခိုက်မှုမရှိကြောင်း ကနဦးသတင်းရရှိထားပြီး အသေးစိတ်အခြေအနေကိုမသိရှိရသေးပေ။
ယခုနှစ်အတွက် စစ်ကောင်စီက ပြုလုပ်နေသည့် အဝေးသင်တက္ကသိုလ်စာမေးပွဲများသည်ပြီးခဲ့သည့် စနေနေ့က ပြီးဆုံးခဲ့သည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
ရခိုင်ပြည်နယ်၌ စစ်ရေးတင်းမာနေစဉ် တက္ကသိုလ်ကျောင်းသားကျောင်းသူများလိုက်ပါလာသည့် မော်တော်မှန်းသိလျက်နှင့် စစ်ကောင်စီက ပစ်ခတ်ခြင်းဟု ဒေသခံလူငယ်များကပြောသည်။
စစ်ကောင်စီတပ်သည် နိုဝင်ဘာလ ၁၃ရက်မှ စတင်ပြီးရက္ခိုင့်တပ်တော် AA ၏ တိုက်ခိုက်ခြင်းခံရပြီးနောက် ရခိုင်ပြည်နယ်အတွင်း ရေလမ်းရော ကုန်းလမ်းများကိုပါ ပိတ်ဆို့ထားသည်။ ရေလမ်းခရီးသွားလာရေးအဓိကအသုံးပြုနေသည့် ရခိုင်ပြည်နယ်၌ စစ်ကောင်စီသည် အရပ်သားများအပေါ် ပစ်မှတ်ထားတိုက်ခိုက်နေသည်ဟု ဒေသခံများကပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)