မန္တ​လေးPDF က စဥ်ကူးမြို့နယ်အတွင်းရှိ စစ်စခန်း ၆ ခုကိုသိမ်းပိုက်၊ လက်နက်မျိုးစုံ ၄၀​ကျော်နှင့် စစ်သုံ့ပန်း ၁၃ ဦးဖမ်းဆီးရရှိ

– ​ဟန်​နွေ ၊အင်ကြင်း / People’s Spring

ပြည်သူ့ကာကွယ်ရေးတပ်မတော် (မန္တလေး)က စဉ့်ကူးမြို့နယ်အတွင်းရှိ စစ်တပ်စခန်း ၆ ခုကိုအပြီးသတ် သိမ်းပိုက်နိုင်ခဲ့​ကြောင်း ယ​နေ့ (ဇူလိုင် ၃)ထုတ်ပြန်သည်။

မန္တ​လေး PDF က “၁၀၂၇ စစ်ဆင်ရေး အပိုင်း(၂)” နှင့်အတူ စဉ့်ကူးမြို့နယ်တွင်လည်း စစ်ဆင်ရေးများကို ဟန်ချက်ညီညီဖော်ဆောင်လျက်ရှိရာ ဒိုးနွယ်ရွာ တပ်စခန်း ၊ နမ့်ဟပ်ရွာ တပ်စခန်း ၊ မာလဲဆည် ရှင်းလင်းဆောင် တပ်စခန်း ၊ ရွှေမာလဲစေတီ တပ်ခစန်း ၊ ရွာတော်လေး တပ်စခန်း နှင့် နွယ်ရုံ ရဲစခန်း တို့ကို အပြီးသတ် သိမ်းပိုက်ခဲ့​ကြောင်းအသိ​ပေးသည်။

စဉ့်ကူးစစ်ဆင်ရေးနယ်မြေအတွင်း လက်နက်မျိုးစုံ ၄၀ ကျော်နှင့် ခဲယမ်းအများအပြားသိမ်းဆည်းရမိထားပြီး စစ်သုံ့ပန်း (၁၃) ဦးခန့်ကိုလည်း ဖမ်းဆီးရရရှိ​ကြောင်းသိရသည်။

Public Service Announcement

စဉ့်ကူးစစ်ဆင်ရေးများတွင် ပြည်သူ့ကာကွယ်ရေးတပ်မတော် (မန္တလေး)အား စဉ့်ကူးမြို့နယ် ပကဖ မှလည်း ထောက်ပို့ဆိုင်ရာကိစ္စရပ်များတွင် ပံ့ပိုးကူညီပေးလျက်ရှိ​ကြောင်းအသိ​ပေးထားသည်။

မန္တ​လေး PDF က စဉ့်ကူးမြို့နယ်အတွင်းရှိ သတ်မှတ်ထားသော စစ်ရေးပစ်မှတ်များကို ဆက်လက်ထိုးစစ်ဆင် တိုက်ခိုက်လျက်ရှိ​ကြောင်းလည်းထုတ်ပြန်ထားသည်။

အဆိုပါ တိုက်ပွဲများအတွင်း စစ်ကောင်စီဘက်က လေကြောင်းတိုက်ခိုက်မှုများလည်း ရှိခဲ့သည်။

“ကြီးကြီးမားမားတော့ ထိခိုက်မှုမရှိပါဘူး။ ​ဒီနေ့တော့ လက်ပံလှကို တိုက်ပွဲဖြစ်ပွားခြင်းမရှိဘဲ ​လေကြောင်းတိုက်ခိုက်မှုပြုလုပ်သွားတာ အနီးအနားကအိမ်တွေအနီးကိုကျတယ်။ အရပ်သားထိခိုက်ဒဏ်ရာရမှုတွေရှိတယ်လို့ ကနဦးသိထားပါတယ်။”ဟု MDY PDF၏ ပြောရေးဆိုခွင့်ရှိသူကိုအော်စမွန်က ပြောသည်။

ဇူလိုင် ၃ ရက်နေ့ခင်းပိုင်းတွင် စဥ့်ကူးမြို့နယ်၊ မိုးကုတ်-မန္တလေးလမ်းပိုင်းရှိ ပင်လယ်ကြီးရွာစစ်ဆေးရေးဂိတ်စခန်းအား PDFများက တိုက်ခိုက်ခဲ့ရာ နေ့လယ်ပိုင်းတွင် အဆိုပါ စခန်းနှင့်မနီးမဝေးရှိ လက်ပန်လှအုပ်စု၊ ရုံးပင်ကုန်းကျေးရွာအား ဂျက်ဖိုက်တာတစ်စီးဖြင့် လေကြောင်းမှ ဗုံးသီးကြဲချတိုက်ခိုက်ခဲ့ကြောင်း ဒေသခံများက ပြောသည်။

တိုက်ခိုက်မှုကြောင့် ရုံးပင်ကုန်းရွာရှိ နေအိမ် နှစ်လုံး အမိုးများပျက်စီးကာ ပြည်သူ သုံးဦးသေဆုံးပြီး အများအပြား ထိခိုက်ဒဏ်ရာရရှိခဲ့ကြောင်း ကင်းထောက်မြေပြင်သတင်းမှန်ပြန်ကြားရေး(စဥ့်ကူး)၏ တာဝန်ရှိသူက ပြောသည်။

“၂ကြိမ် လေးလုံး။ ပထမကြိမ်က ဟက်စကီးနဲ့။ ဖိုက်တာက၂လုံး။ အိမ် နှစ်လုံးပျက်တာရယ်။ အမျိုးသားတစ်ဦးခြေ ထောက်ပြတ်တယ်။ ပြည်သူထိခိုက်မှုများတယ်။ အရပ်သားပြည်သူသေဆုံးမှုတွေလဲရှိနိုင်တယ်။”ဟု အထက်ပါအဖွဲ့ တာဝန်ရှိသူက ပြောသည်။

မန္တ​လေး PDF သည် တအာင်းတပ်မတော်(TNLA)နှင့်အတူ ရှမ်းမြောက်စစ်ဆင်ရေးများ ဖော်ဆောင်နေသကဲ့သို့ မန္တလေးတိုင်း မိုးကုတ်၊ မတ္တရာနှင့် စဉ့်ကူးနယ်များ၌လည်း စစ်ကောင်စီတပ်စခန်းများကိုလည်းထိုယစစ်ဆင်သိမ်းပိုက်​နေခြင်းဖြစ်သည်။ မတ္တရာမြို့နယ်တွင်လည်း စစ်​ကောင်စီတပ်၏ ​လေ​ကြောင်းရန် ကာကွယ်​ရေးတပ်အပါအဝင် စစ်တပ်စခန်း​ပေါင်း ၈ ခုကိုသိမ်းပိုက်ပြီးစစ်သုံ့ပန်း နှင့် လက်နက်ချသူ ၆၄ ဦး ၊လက်နက်မျိုးစုံ ၁၂၅ လက် သိမ်းဆည်းရရှိခဲ့သည်။