ကျဆုံးရဲဘော်များအား အသက်စွန့်အာဇာနည်ဆုတံဆိပ် ချီးမြှင့်
ထားမြတ်/People’s Spring
ပြည်သူ့ခုခံတွန်းလှန်စစ် စတင်သည့်အချိန်မှစ၍ နွေဦးတော်လှန်ရေး (၃)နှစ်တာကာလအတွင်း စစ် အာဏာရှင်စနစ်ချုပ်ငြိမ်းရေး၊ ဖက်ဒရယ်ဒီမိုကရေစီစနစ်ပေါ်ထွန်းရေးနှင့် တိုင်းပြည်နှင့် ပြည်သူ လူထု အတွက်မြင့်မြတ်စွာအသက်ပေးလှူသွားခဲ့ကြသော အထူးစစ်ဆင်ရေးတပ်ဖွဲ့ – SOF၏ တပ်ဖွဲ့ဝင် ရဲဘော်များအား အသက်စွန့်အာဇာနည် ဆုတံဆိပ် ဂုဏ်ပြုချီးမြှင့်လိုက်ကြောင်း SOFကထုတ်ပြန်သည်။
အထူးစစ်ဆင်ရေးတပ်ဖွဲ့ – SOFတွင် တိုက်ပွဲဝင်ရင်း အသက်ပေးဆပ်ခဲ့ကြသူ အာဇာနည်သူရဲကောင်း (၁၈) ဦးရှိခဲ့ကြောင်း အသိပေးထားပြီး ယင်းအနက်လေးဦးမှာ ရန်ကုန်မြို့ပြစစ်ဆင်ရေးအတွင်း ကျဆုံးခဲ့ပြီး ကျန် ၁၄ဦးမှာ ကျေးလက်စစ်ဆင်ရေး စခန်းသိမ်းတိုက်ပွဲများအတွင်း ကျဆုံးခဲ့ရဟု ဖော်ပြသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
ကျဆုံးခဲ့သော အာဇာနည်သူရဲကောင်းများအား ကာကွယ်ရေးဝန်ကြီးဌာန ၊ ဝန်ကြီးဦးရည်မွန်မှလည်း ဦးညွှတ်ဂုဏ်ပြုလွှာများချီးမြှင့် ပေးခဲ့ဟုလည်း ထုတ်ပြန်သည်။
” ကျဆုံးခဲ့သော SOFအာဇာနည်သူရဲကောင်းများအား ထာဝရအမှတ်ရလေးစားလျှက် (၇၇)နှစ်မြောက်အာဇာနည်နေ့တွင် ဗိုလ်ချုပ်အောင်ဆန်းအပါအဝင်ကျဆုံးခဲ့သော အာဇာနည်ပုဂ္ဂိုလ်ကြီးများနှင့်အတူ အထူးပဲ ဦးညွှတ်အလေးပြုလိုက်ပါသည်”ဟု SOFက ဖော်ပြထားသည်။
ရဲဘော်မိသားစုဝင်၏ သဘောဆန္ဒအရ ဂုဏ်ပြုမှတ်ပုံတချို့အား ထုတ်ပြန်မှုမပြုပဲ သိမ်းဆည်းမှတ်တမ်းတင်ထားသည်ဟုလည်း အသိပေးသည်။
SOFတပ်ဖွဲ့သည် လက်ရှိတွင် ကရင်အမျိုးသားအစည်းအရုံး(KNU)တပ်ဖွဲ့များ၊ အခြားတော်လှန်ရေးအင်အားစုများနှင့် ပူးပေါင်းပြီး ကရင်ဒေသ အထူးသဖြင့် KNU တပ်မဟာ(၆) နယ်မြေအတွင်း စစ်ကောင်စီတပ်များကို တိုက်ခိုက်လျက်ရှိပြီး အောင်ပွဲများရရှိထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)