ထားမြတ်/People’s Spring
ရှမ်းပြည်နယ်မြောက်ပိုင်းရှိ မိုးမိတ်မြို့ တစ်မြို့လုံးကို တော်လှန်ရေးပူးပေါင်းတပ်က ထိန်းချုပ်ထားပြီးဖြစ်ကြောင်း ပြည်သူ့လွတ်မြောက်ရေးတပ်မတော်(PLA) သတင်းပြန်ကြားရေးတာဝန်ရှိသူက ပြောသည်။
PLAက ယနေ့(ဇူလိုင် ၂၅ရက်) ညနေပိုင်းတွင် မိုးမိတ်နှင့်ပတ်သက်ပြီး သတင်းထုတ်ပြန်ရာ မိုးမိတ်သည် PLA၏ အောင်မြေဖြစ်ကြောင်း၊ မဟာမိတ် TNLA(တအာင်းတပ်မတော်)နှင့် အခြားသော မဟာမိတ်များ၏ အောင်မြလည်းဖြစ်ကြောင်း အသိပေးကာ မှတ်တမ်းဓာတ်ပုံအချို့ကို ဖော်ပြသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
ထုတ်ပြန်ခဲ့သည့် မှတ်တမ်းဓာတ်ပုံတွင် မိုးမိတ်မြို့ ဆိုင်းဘုတ်ရှေ့၌ PLA ရဲဘော်ရောက်ရှိမှု အပါအဝင် PLA ရဲဘော်အချို့၏ လှုပ်ရှားမှု ဓာတ်ပုံများကို တွေ့ရသည်။
အဆိုပါ ထုတ်ပြန်မှုနှင့်ပတ်သက်၍ PLA သတင်းပြန်ကြားရေးတာဝန်ရှိသူအား မိုးမိတ် အခြေအနေကို မေးမြန်းရာ “မိုးမိတ် တမြို့လုံးကိုတော့ ထိန်းချုပ်ထားပါပြီ။ ဗျူဟာကုန်းကိုတော့ ဆက်လက်ထိုးစစ်ဆင်တိုက်ခိုက်နေပါတယ်”ဟု ဖြေကြားသည်။
TNLA၏ ဇူလိုင် ၂၄ရက် ယမန်နေ့ စစ်ရေးအခြေအနေ ဖော်ပြချက်တွင်လည်း မိုးမိတ်ရှိ စစ်ကောင်စီ လက်ကျန်တပ်စခန်းတစ်ခုဖြစ်သည့် ဗျူဟာကုန်းကို ယမန်နေ့ နေ့လယ်က စတင် ထိုးစစ်ဆင် တိုက်ခိုက်လျက်ရှိသည်ဟု အသိပေးထားသည်။
TNLAနှင့် မဟာမိတ်များသည် ဇွန်လ ၂၅ရက်မှစတင်၍ ၁၀၂၇ စစ်ဆင်ရေး ဒုတိယပိုင်းကို ပြန်လည်ဖော်ဆောင်ခဲ့ရာ တစ်လအတွင်း မိုးကုတ်၊ နောင်ချိုမြို့များကို သိမ်းပိုက်ထားနိုင်ခဲ့ပြီး ကျောက်မဲ၊ မိုးမိတ်မြို့များကိုလည်း ထိန်းချုပ်ထားနိုင်ပြီဖြစ်ကာ လက်ကျန် တပ်စခန်းများကို ဆက်လက်ထိုးစစ်ဆင်နေသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)