မိထက်/People’s Spring
စစ်ကောင်စီက စစ်ရှုံးပြီး အရှေ့မြောက်တိုင်းစစ်ဌာနချုပ်(ရမခ)အား MNDAA က သိမ်းပိုက်သွားသဖြင့် ဌာနချုပ်မရှိတော့သော်လည်း ရမခအတွက် တိုင်းမှူးနောက်ထပ်အသစ်တစ်ဦး ထပ်မံခန့်လိုက်ပြန်သည်။
လေ့ကျင့်ရေးအရာရှိချုပ်ရုံးမှ ဒုတိယတပ်မတော် လေ့ကျင့်ရေးအရာရှိချုပ်ဗိုလ်ချုပ်မြင့်ကျော်ထွန်းကို ရမခတိုင်းမှူးအဖြစ် ဩဂုတ်လ ၁၁ ရက်တွင် စစ်ကောင်စီက ခန့်အပ်လိုက်သည်ဟုနေပြည် တော်စစ်ရေးသတင်းရင်းမြစ်ကပြောသည်။
Public Service Announcement
” သူ ( ဗိုလ်ချုပ်မြင့်ကျော်ထွန်း) လက်မခံချင်ဘူး။ ဒါပေမယ့် မရဘူးလေ။ ဗိုလ်ချုပ်စိုးလှိုင်ကို လူကြီးပိုင်းက မယုံရဲဘူး” ဟု အထက်ပါ သတင်ရင်းမြစ်ကပြောသည်။
MNDAA ဦးဆောင်သောပူးပေါင်းတပ်များက ဇူလိုင် ၃ ရက်တွင် လားရှိုးမြို့ရှိ စစ်တပ်စခန်းများကိုစတင်ထိုးစစ်ဆင်တိုက်ခိုက်ပြီးနောက် ဇူလိုင်၁၇ ရက်တွင် ရမခတိုင်းမှူးဗိုလ်ချုပ်စိုးတင့်ကိုစစ်ကောင်စိက ရာထူးမှ ထုတ်ပယ်ပြီး မူဆယ်အခြေစိုက်တပ်မ(၉၉)တပ်မမှူး ဗိုလ်ချုပ် စိုးလှိုင်ကို အစားထိုးခန့်အပ်ခဲ့သည်။ တိုင်းမှူးဟောင်းဗိုလ်ချုပ်စိုးတင့်သည် ရာထူးမှထုတ်ပယ်ခံလိုက်ရသော်လည်း လားရှိုးရမခ တွင်ရှိနေစဉ်မှာပင် MNDAAက ရမခကိုအပြီးသတ် သိမ်းပိုက်ပြီး ဗိုလ်ချုပ်စိုးတင့်နှင့် အရာရှိများကိုပါဖမ်းဆီးခဲ့ သည်။
တိုင်းမှူးသစ်ဗိုလ်ချုပ်စိုးလှိုင်သည် မူဆယ်မှာပင်ရှိနေပြီးလားရှိုးမြို့ပင် မရောက်လိုက်ဘဲ ဌာနချုပ်ကရှုံးခဲ့ခြင်းဖြစ်သည်။ ယခုအခါ ဗိုလ်ချုပ်စိုးလှိုင်အား ထပ်မံထုတ်ပယ်၍ ဗိုလ်ချုပ်မြင့်ကျော်ထွန်းကို တာဝန်ပေးခြင်းဖြစ်သည်။ဗိုလ်ချုပ်စိုးလှိုင်အား မည်သည့်နေရာသို့ပြန်လည်တာဝန်ပေးအပ်မည်ကို ရှင်းရှင်းလင်းလင်းမသိရသေးပေ။
” သူ(ဗိုလ်ချုပ်စိုးလှိုင်)က ဝ ဝပ်ဖွဲ့နဲ့ နီးစပ်တယ်လို့ ဝေဖန်မှုတွေရှိတယ်။ ဒါကြောင့်သူ့ကို ဖယ်လိုက်တာပါ”ဟု နေပြည်တော်စစ်ရေးသတင်းရင်းမြစ်ကပြောသည်။
မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA) ဦးဆောင်သော ပူးပေါင်းတပ်များက ဩဂုတ်လ ၃ရက်တွင် ရမခအား သိမ်းယူပြီးနောက်စစ်ကောင်စီက နာရီပိုင်းအတွင်း တပ်တွင်းအပြောင်းအလဲများပြုလုပ်ခဲ့သည်။
လားရှိုးတိုက်ပွဲတွင်ရမခ ခုခံစစ်ကို တိုက်ရိုက်ညွှန်ကြားခဲ့သည့် အမှတ် ( ၂ ) စစ်ဆင်ရေးအထူးအဖွဲ့ (ကစထ ၂) မှူးဒုဗိုလ်ချုပ်ကြီးနိုင်နိုင်ဦးအားရာထူးမှ ထုတ်ပယ်ခဲ့သည်။ဒုဗိုလ်ချုပ်ကြီး နိုင်နိုင်ဦး အစား ကစထ (၂)မှူးအဖြစ် စစ်ကောင်စီ ပြည်ထဲရေးဝန်ကြီးဌာန ဒုတိယဝန်ကြီးနှင့် ရဲချုပ် တာဝန်ထမ်းဆောင်ခဲ့သောဒုတိဗိုလ်ချုပ်ကြီး နီလင်းအောင်ကို ခန့်အပ်ခဲ့သည်။
ယခုအခါ MNDAA က လားရှိုးမြို့အားထိန်းချုပ်ထားပြီး အုပ်ချုပ်ရေး လုပ်ငန်းများစတင်အကောင်အထည်ဖော်နေသည်။ ရှမ်းပြည်နယ်မြောက်ပိုင်းတွင် ၁၀၂၇ စစ်ဆင်ရေးပထမပိုင်းနှင့် လက်ရှိ တိုက်ခိုက်နေဆဲ ၁၀၂၇ စစ်ဆင်ရေးဒုတိယပိုင်းတွင် လားရှိုးမြို့၊ ကွတ်ခိုင်မြို့၊ တာမိုးညဲမြို့၊ နမ့်ခမ်းမြို့၊ နမ့်ဖက်ကာမြို့၊ သိန္နီမြို့၊ ကွမ်လုံမြို့၊ချင်းရွှေဟော်မြို့၊လောက်ကိုင်မြို့၊ ကုန်ကြမ်းမြို့၊ နမ့်ဆန်မြို့၊ နမ္မတူမြို့၊ မိုးမိတ်မြို့၊ မိုးကိုးမြို့၊မော်ထိုက်မြို့၊မိုင်းလုံမြို့၊ မိုင်းငေါ့မြို့၊ပန်လုံမြို့၊ ဖောင်ဆိုင်မြို့၊ပန်ဆိုင်းမြို့နောင်ချိုမြို့တို့ကို မြောက်ပိုင်းမဟာမိတ်သုံးဖွဲ့က သိမ်းပိုက်ထိန်းချုပ်ထားသည်။
ယခုအခါ သီပေါမြို့သိမ်းတိုက်ပွဲကို TNLA ဦးဆောင်သောပူးပေါင်းတပ်များကထိုးစစ်ဆင် တိုက်ခိုက်နေသည်။ထို့အပြင် မူဆယ်မြို့ကိုလည်း မဟာမိတ်ပူးပေါင်းတပ်ဖွဲ့များက တိုက်ခိုက်ရန်ပြင်ဆင်နေကြောင်းသတင်းများထွက်ပေါ်နေသည်။
စစ်ကောင်စီက ၁၀၂၇ ပထမပိုင်းတွင် လောက်ကိုင် ဒကစ သည် MNDAAထံလက်နက်ချခဲ့ပြီး ဒကစ မရှိတော်သော်လည်း စစ်ကောင်စီက လက်နက်ချ ဗိုလ်ချုပ်များကိုသေဒဏ်ပေးခဲ့သည်။ MNDAA သိမ်းပိုက်လိုက်၍ ဒကစ မရှိတော့သော်လည်း အစားထိုးခန့်အပ်မှူကိုမူပြုလုပ်ခဲ့သည်။
