ဇေအောင်/People’s Spring
မန္တလေးတိုင်း၊ ငါန်းဇွန်မြို့နယ်တွင် ယမန်နေ့က တိုကိပွဲဖြစ်ပွားပြီး စစ်ကောင်စီတပ် ထိခိုက်မှုများ၍ လေကြောင်းမှ တိုက်ခိုက်ခဲ့ကြောင်း သတင်းရရှိသည်။
ယမန်နေ့ (သြဂုတ် ၁၆ရက်) နံနက်က ငါန်းဇွန်မြို့နယ်၊ မြို့သာစက်မှုဇုန်၌ တိုက်ပွဲဖြစ်ပွားခဲ့သည်။ ထို့နောက် နေ့လယ် ၂ နာရီ မိနစ် ၅၀ခန့်က ငါန်းဇွန်မြို့နယ်၊ တောင်ရွာဘိုကျေးရွာရှိ စစ်ကောင်စီတပ်အား ဒရုန်းများဖြင့် ဗုံးသီးချတိုက်ခိုက်ပြီး လက်နက်ငယ်များဖြင့်ပါ အနီးကပ် ပစ်ခတ်တိုက်ခိုက်ခဲ့ကြောင်း ပြည်သူ့ကာကွယ်ရေးပူးပေါင်းတပ်များက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
တိုက်ခိုက်မှုကြောင့် စစ်ကောင်စီတပ် ထိခိုက်သေဆုံးကြောင်း ပူးပေါင်းတပ်များက ဆိုသည်။
“အလောင်းတွေကိုတော့ စစ်ကူလာတဲ့ကားနဲ့ မြင်းခြံမြို့ထိ သယ်သွားတယ်လို့ သိရတယ်။”ဟု မုံရွာခရိုင်အမှတ်(၁၁)တပ်ရင်း PDF-South Monywa၏ ပြောရေးဆိုခွင့်ရှိသူ ဒေါင်းကာရံက ပြောသည်။
ထို့နောက် ငါန်းဇွန်မြို့မှ စစ်ကား သုံးစီးဖြင့် စစ်ကူရောက်ရှိလာ၍ လက်နက်နှင့် ကျည်မလုံလောက် ၍ ပြန်လည်ဆုတ်ခွာခဲ့သည်ဟု ဆိုသည်။
ထို့အပြင် ငါန်းဇွန်မြို့သို့ ပြန်ခေါက်သွားသော စစ်ကားတစ်စီးကိုလည်း ကုလရွာကြီးနှင့် သပြေကန်ရွာကြားတွင် ထပ်မံမိုင်းဆွဲတိုက်ခိုက်ခံခဲ့ရကြောင်း ဒေသခံများက ပြောသည်။
အဆိုပါ စစ်ဆင်ရေးကို မုံရွာခရိုင် အမှတ်(၁၁) တပ်ရင်း People’s Defence Force – South Monywa၊TGYR-Youth Guerrilla Counter Revolution-NZ(ငါန်းဇွန်)၊ ငါန်းဇွန်မြို့နယ် ( ပကဖ)၊ 925-ပြောက်ကျားတပ်ဖွဲ့၊Wings OF KSU၊ မန္တလေးခရိုင်တပ်ရင်း(၅)၊ဇေယျာရွှေမြေပြောက်ကျားတပ်ဖွဲ့၊ ပြည်တော်ဝင် ပြောက်ကျား တပ်ဖွဲ့၊ အားမာန်သစ်ပြောက်ကျားတပ်ဖွဲ့တို့ ပူးပေါင်းတိုက်ခိုက်ခဲ့ခြင်းဖြစ်သည်။
အထိနာသွားပြီးနောက် စစ်ကောင်စီတပ်က ယနေ့ သြဂုတ် ၁၇ ရက် နေ့လယ် ၁၂နာရီခန့်တွင် လေကြောင်းမှ ငါန်းဇွန်မြို့နယ် မြေတိုင်းရွာ စာသင်ကျောင်းအနီးတစ်လုံး ၊ မြေတိုင်းရွာနှင့် ရေဇင်းရွာကြား တစ်လုံး ဗုံးနှစ်လုံးကြဲချတိုက်ခိုက်ခဲ့ပြီး ထိခိုက်မှုအခြေအနေ မသိရသေးကြောင်း ဒေသခံများက ပြောသည်။
ပြည်သူ့ကာကွယ်ရေးပူးပေါင်းတပ်များကမြင်းခြံခရိုင်အထူးစစ်ဆင်ရေး Myingyan District Special Operation (MDSO)အားသြဂုတ် ၁ဝ ရက်မှစတင်ကာ နွားထိုးကြီး၊ မြင်းခြံနှင့် တောင်သာမြို့များ၌ စစ်ဆင်ရေးများဖော်ဆောင်ခဲ့သည်။
နွားထိုးကြီးမြို့ပေါ်တိုက်ပွဲအတွင်း စစ်ကောင်စီတပ်စခန်း လေးခုအပြီးသတ် သိမ်းပိုက်ရရှိခဲ့ပြီး စစ်ကောင်စီတပ် အများအပြားသေဆုံးကာ လက်နက်၂၇လက်နှင့်စစ်သုံ့ပန်း သုံးဦး ဖမ်းဆီးရမိခဲ့သည်။
အလားတူ တောင်သာမြို့နယ်၊ ဝဲလောင်ရွာဓာတ်အားခွဲရုံစခန်းတိုက်ခိုက်မှုအတွင်း စစ်ကောင်စီတပ် ၆ ဦး သေဆုံးပြီး လက်နက်ခဲယမ်းများသိမ်းဆည်းရမိသည်။
သြဂုတ်၁၂ရက်က တောင်သာမြို့နယ်ရှိ စစ် ကောင်စီစခန်း နေရာလေးခု တိုက်ခိုက်မှုအတွင်း ဓာတ်ငွေ့ပိုက်လိုင်းစခန်းနှင့် စွပ်ကျယ်စက်ရုံစခန်းမှ စစ်ကောင်စီတပ်သားများ စခန်းစွန့်ထွက်ပြေးသွားပြီး တောင်သာမြို့အား စစ်ကူလာနိုင်မည့်လမ်းကြောင်းအား ပူးပေါင်းတပ်များက ပိတ်ဆို့ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)