သြဂုတ်-၁၀၊၂၀၂၅။ဇေအောင်/People’s Spring
သာယာဝတီအကျဉ်းထောင်ကနေ လွတ်ရက်စေ့လို့ လွတ်လာတဲ့ အမျိုးသားဒီမိုကရေစီအဖွဲ့ချုပ် ဗဟိုလူငယ်တာဝန်ခံကို စစ်တပ်က ထောင်ဘူးဝမှာတင် ပြန်လည်ဖမ်းဆီးသွားပြီး လွတ်ပြီးမှ အဖမ်းခံရသူ ၇၀ ကျော် ရှိကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)ကသတင်းထုတ်ပြန်ပါတယ်။
ဩဂုတ်လ (၇)ရက်နေ့က သာယာဝတီအကျဉ်းထောင်ကနေ လွတ်ရက်စေ့လို့ လွတ်လာတဲ့ နိုင်ငံရေးအကျဉ်းသူတစ်ဦးဖြစ်သူ မမိုးဆန်းစုကြည်ကို စစ်တပ်က အကြမ်းဖက်ဥပဒေ ပုဒ်မ ၅၂-ကနဲ့ ပြန်လည် ဖမ်းဆီးလိုက်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)က သတင်းထုတ်ပြန်ပါတယ်။
စစ်ကောင်စီဟာ နိုင်ငံရေးအကျဉ်းသားတွေကို လွတ်ရက်စေ့တဲ့အခါ ထောင်ဘူးဝမှာပဲပုဒ်မအမျိုးမျိုးတပ်ကာ ပြန်လည်ဖမ်းဆီး အမှုတပ်တာတွေ ရည်ရွယ်ချက်ရှိရှိ လုပ်ဆောင်နေပြီး မမိုးဆန်းစုကြည်အပါအဝင် ပြန်လည်ဖမ်းဆီးခံသူ (၇၄)ဦး ရှိပြီးဖြစ်ကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)က အသိပေးပါတယ်။
Public Service Announcement
မမိုးဆန်းစုကြည်ဟာ၂၀၂၁ ခုနှစ်၊ မေလ ၉ ရက်က ရန်ကုန်မြို့၊ လှည်းတန်းမှာ ဖမ်းဆီးခံခဲ့ရပြီး ပုဒ်မ ၅၀၅-က နဲ့ ၁၇(၁)တို့နဲ့ အင်းစိန်ထောင်မှာ ထောင်ဒဏ် (၆)နှစ် ချမှတ်ခံခဲ့ရပါတယ်။ ၂၀၂၃ ခုနစ်၊ ဇွန်လ ၉ ရက်မှာ အင်းစိန်ထောင်ကနေ သာယာ၀တီအကျဥ်းထောင်သို့ ပြောင်းရွှေ့ခဲ့ပါတယ်။
၄နှစ်ကျော်ကြာ လွတ်ရက်စေ့လို့ လွတ်လာခဲ့ပေမဲ့ စစ်အုပ်စုက ထောင်ဘူးဝမှာပဲ အကြမ်းဖက်ဥပဒေ ပုဒ်မ ၅၂-က တပ်ကာ ပြန်လည် ဖမ်းဆီးလိုက်တာဖြစ်တယ်လို့ PPNMကအသိပေးပါတယ်။
“ရက်ပြည့်နဲ့ထောင်က လွတ်ရမှာပါ။ အဲဒါကို သာယာဝတီရဲစခန်းက ၅၂(က) နဲ့ အမှုထပ်ဖွင့်တယ်။”လို့ နီးစပ်တဲ့ နိုင်ငံရေးသမားတစ်ဦးက ပြောပါတယ်။
အသက် ၃၃ နှစ်အရွယ် မမိုးဆန်းစုကြည်ဟာ NLD ပါတီ၊ လူငယ်တာဝန်ခံဖြစ်သပြီး ဖခင်ဖြစ်သူ ဦးညီပု လိုပဲ ဒေါ်အောင်ဆန်းစုကြည်အားချစ်ခင်လေးစားသူဖြစ်ပါတယ် ။ ဦးညီပုဟာ ၁၉၉၀ ရွေးကောက်ပွဲမှာ NLDပါတီကိုယ်စားပြု ရွေးကောက်ခံခဲ့ရပေမယ့် စစ်အုပ်စုရဲ့ဖမ်းဆီးခြင်းခံရပြီး ထောင်ဒဏ်၁၀နှစ်ချမှတ်ခံခဲ့ရပါတယ်။
ဒေါ်အောင်ဆန်းစုကြည်ကိုချစ်ခင်လေးသူဖြစ်တာကြောင့် သမီးဖြစ်သူအမည်ကိုလည်း မိုးဆန်းစုကြည်လို့အမည်ပေးခဲ့ပါတယ် ။ဦးညီပုဟာ ၂၀၁၅ ခုနှစ်ရွေးကောက်ပွဲမှာ ဂွမြို့နယ် ပြည်နယ်လွှတ်တော်မဲဆန္ဒနယ်အမှတ် (၂) မှ အနိုင်ရရှိခဲ့ပြီး တော့ ၂၀၁၆ ခုနှစ်၊ မတ်လမှာ ရခိုင်ပြည်နယ် ဝန်ကြီးချုပ်ဖြစ်လာခဲ့ပါတယ် ။
၂၀၂၁ ဖေဖော်ဝါရီ ၁ ရက် စစ်တပ် အာဏာသိမ်းပြီးတော့ ဦးညီပုဟာ ဖမ်းဆီးခံရပြနပြီး ရာဇသတ်ကြီးဥပဒေပုဒ်မ ၅၀၅(ခ)၊ အဂတိလိုက်စားမှုဥပဒေပုဒ်မ ၅၅ နှင့် ရွေးကောက်ပွဲဆိုင်ရာဥပဒေပုဒ်မ ၁၃၀(က) ပုဒ်မတွေနဲ့ စစ်ကောင်စီကတရားစွဲဆိုပြီး ထောင်ဒဏ် ၁၀ နှစ်ကျော် ချမှတ်ခံထားရပါတယ်။
” မမိုးဆန်းစုကြည်က တည်ငြိမ်ပြီးရဲရင့်ပြတ်သားတဲ့အမျိုးသမီးဖြစ်တယ်။ စနစ်ကျတယ်။ သူက နိုင်ငံရေးဂုဏ်သိက္ခာရှိတယ်။ အမှုထပ်စွဲတာကတော့ စစ်အုပ်စုရဲ့အကြောက်တရားပဲ” လို့ နိုင်ငံရေး အကျဉ်းသားဟောင်းတစ်ဦးက မှတ်ချက်ပြုပါတယ်။
စစ်ကောင်စီဟာ လွတ်ရက်စေ့လို့ လွတ်လာတဲ့ နိုင်ငံရေးအကျဥ်းသားတွေကို အခုလို ထောင်ဘူးဝမှာ ပြန်ဖမ်းတာဟာ ရည်ရွယ်ချက်ရှိရှိ လုပ်ဆောင်နေတာဖြစ်တယ်လို့ PPNMရဲ့ တာဝန်ရှိသူကပြောပါတယ်။
“တကယ်ဆိုလို့ရှိရင် သူတိုအမှုတပ်ချင်တယ်၊ ပုဒ်မတပ်ချင်တယ်ဆိုလို့ရှိရင် တရားပြန်စွဲလို့ရတယ်။ ဒီကြားထဲကာလမှာလေ။ မမိုးဆန်းစုကြည်ဆိုရင် ၄ နှစ်နဲ့မှ ၃ လလောက်ကြာပြီ။ အကျဥ်းထောင်ထဲမှာ နေခဲ့ရတာက။ ဒီကြားထဲတွေမှာ သူတို့ အမှုတပ်ပြီးတော့ တရားစွဲလို့ရတာတွေရှိတယ်။ ဒါကို ဆက်တိုက် ဒီလိုပဲနေလာခဲ့တယ် မလုပ်ဘဲနဲ့။ လွတ်ရက်စေ့ပြီဆိုတော့ကျမှ ထောင်ဘူးဝမှာ ပြန်ဖမ်းတယ်ဆိုတာက စိတ်ကိုသတ်တာပဲပေါ့။ ရည်ရွယ်ချက်ရှိရှိနဲ့ကို ညှင်းပန်းနှိပ်စက်တဲ့သဘော ဖြစ်ပါတယ်။”လို့ PPNM ရဲ့ တာဝန်ရှိသူက ပြောပါတယ်။
