သြဂုတ် – ၁၉ ၊၂၀၂၅ ၊ ဆိုင်းမင်း/People’s Spring
စစ်ကိုင်းမြို့အနောက်ခြမ်းငါးထပ်ကြီးဘုရားမှာတပ်စွဲထားတဲ့ စစ်ကောင်စီတပ်စခန်းကိုဩဂုတ် ၁၇ ရက်ည၈နာရီခွဲဝန်းကျင်ကတော်လှန်ရေးတပ်တွေက တိုက်ခိုက်ခဲ့တယ်လို့ ဒေသခံအချို့ဆီကသိရပါတယ်။
ငါးထပ်ကြီးဘုရားမှာတပ်စွဲထားတဲ့ တပ်စခန်းကို တော်လှန်ရေးတပ်တွေက တိုက်ခိုက်ရာမှာ နာရီဝက်နီးပါးကြာ အပြန်အလှန်ပစ်ခတ်မှု ဖြစ်တာပါ။
“အသံတွေကတော်တော်လေးကျယ်တယ် ” လို့ စစ်ကိုင်းမြို့ ၊ ပန်းပဲတန်းရပ်နေသူတစ်ဦးက ပြောပါတယ်။ လက်နက်ကြီး သံတွေကိုပါ ကြားခဲ့ရတယ်လို့ သူက ဆိုပါတယ်။
Public Service Announcement
ပစ်ခတ်မှုတွေကြောင့် မဟာခိုနန်းပရိယတ္တိစာသင်တိုက်ရဲ့ အဆောက်အအုံလည်း ထိခိုက်မှုရှိခဲ့ပြီး ကိုရင်ငယ်တစ်ပါး ဒဏ်ရာရရှိခဲ့တယ်လို့ သိရပါတယ်။
နာရီဝက်ကြာ ထိတွေ့တိုက်ပွဲဖြစ်ပြီးနောက် မြို့ပေါ်ကို စစ်ကောင်စီတပ်က စစ်ကားတွေနဲ့ ကင်းပတ်ပြီး လမ်းပေါ်သွားလာသူအချို့ကိုလည်း ဖမ်းဆီးခဲ့တယ်လို့ သိရပါတယ်။
စစ်ကိုင်းမြို့ အနောက်ခြမ်း ငါးထပ်ကြီးဘုရားတဝိုက် တိုက်ပွဲဖြစ်ပြီးနောက် ဩဂုတ်လ ၁၈ရက်နဲ့ ၁၉ရက်တွေမှာစစ်ကောင်စီတပ် ကားတွေနဲ့မြို့တွင်းလှည့်ပတ်နေသလို လမ်းသွားလမ်းလာတွေကို စစ်ဆေးတာတွေရှိနေပါတယ်။
ဒါအပြင် မန္တလေးမြို့အထွက်(နှာပေါက်)နဲ့ စစ်ကိုင်းမြို့အဝင်တွေမှာ ယခင်ကထက် ခရီးသည်တင်ယာဉ်တွေကို အချိန်ပိုယူပြီး စစ်ဆေးတာတွေရှိလာတယ်လို့သိရပါတယ်။
