စက်တင်ဘာ−၂၁၊ ၂၀၂၅။ ထားမြတ်/People’s Spring
ကချင်ပြည်နယ်၊ ဖားကန့်မြို့နယ်တွင် စက်တင်ဘာ ၂၀ရက်ညပိုင်းက စစ်ကောင်စီတပ် လက်နက်ကြီးဖြင့် ရမ်းသမ်းပစ်ခတ်ခဲ့၍ အမျိုးသမီး ၁ဦး ဒဏ်ရာရခဲ့ကြောင်း ဒေသ သတင်းရင်းမြစ်က ပြောသည်။
ကချင်လွတ်လပ်ရေးတပ်မတော်(KIA)နှင့် စစ်ကောင်စီတပ်အကြား တိုက်ပွဲများ ဆက်တိုက်ဖြစ်ပွားနေသည့် ဖားကန့်ဒေသတွင် စစ်ကောင်စီတပ်က လက်နက်ကြီးများ ရမ်းသမ်းပစ်ခတ်မှုများ မကြာခဏ ပြုလုပ်နေ၍ အရပ်သား ပြည်သူထိခိုက်သေဆုံးမှုများရှိနေသည်။
“ဖားကန့်မြို့နယ် ဆိုင်းတောင် အုပ်စု ရပ်ကွက်(၃)မှာမနေ့ညက ၁၁ခွဲလောက်မှာ စစ်တပ်ဘက်က လက်နက်ကြီးနဲ့ ပစ်ခတ်လို့ လူနေအိမ်တွေ ပျက်စီးပြီးမှ အမျိုးသမီးတဦး ပေါင်မှာ ဒဏ်ရာထိခိုက်မှု ပြင်းထန်တယ်။ တိုက်ပွဲမရှိဘဲ ရမ်းပစ်တာ” ဟု သတင်းရင်းမြစ်က ပြောသည်။
Public Service Announcement
စက်တင်ဘာ ၁၉ရက် မနက်ကလည်း ဖားကန့်ဒေသ မရှိကထောင်ဘက်၌ စစ်ကောင်စီတပ်က ဒရုန်းဖြင့် ဗုံးကြဲ၍ ဇနီးမောင်နှံ ၂ဦး သေဆုံးခဲ့ရကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက ယမန်နေ့တွင် သတင်းဖော်ပြသည်။
စစ်ကောင်စီက ဖားကန့်မြို့နယ်ကို လက်နက်ကြီး ရမ်းပစ်ခြင်းနှင့် လေကြောင်း ဗုံးကြဲခြင်းဆက်တိုက်လုပ်နေ၍ ပြည်သူလူထုသေဆုံးထိခိုက်မှုများ နေ့စဉ်နီးပါး ဖြစ်ပေါ်လျက်ရှိဟု KIA သတင်းပြန်ကြားရေးဌာနက ဖော်ပြသည်။ ထို့ပြင် ပြည်သူများ စစ်ဘေးရှောင်နေကြရသည်ဟု ဆိုသည်။
တိုက်ပွဲများ ဆက်ရှိနေပြီး စစ်ကောင်စီတပ်က ဖားကန့်ဒေသကို အင်အားဖြည့်တင်းနေသည်ဟုလည်း KIA သတင်းပြန်ကြားရေးဌာနက ဖော်ပြသည်။
