ဧပြီ-၂၂၊၂၀၂၆။ဖိုးသား/People’s Spring
မကွေးဖက်ဒရယ်ယူနစ်အစိုးရအောက်မှာ အမိန့်နာခံမှုနဲ့ တိုက်ပွဲဝင်သွားမယ်လို့ ဒေသကာကွယ်ရေးတပ်ဖွဲ့ ၂၁ ဖွဲ့က ဧပြီ ၁၈ရက်မှာ စုပေါင်းကြေညာခဲ့ပါတယ်။
ယူနစ်အစိုးရနဲ့လက်တွဲပြီး မကွေးတိုင်းအတွင်းမှာရှိတဲ့ ပြည်သူလူထုအတွက်ကောင်းမွန်ပြီး တိကျသေချာတဲ့ တပ်တစ်ခုဖြစ်ဖို့ ပထမခြေလှမ်းလို့ ဆိုပါတယ်။
” တပ်တွေတစုတစည်းထဲဖြစ်ရင်တော့ တော်လှန်ရေးအရွေ့ကမြန်မယ်” လို့ ကာကွယ်ရေးအဖွဲ့ ၂၁ခုထဲမှာပါတဲ့ Earth Quake People’s Defence Forceရဲ့ ရုံးအဖွဲ့မှူး ကိုဆက်ကြီးက ပြောပါတယ်။
Public Service Announcement
ဒေသကာကွယ်ရေးအဖွဲ့တွေရဲ့ကြေညာချက်ကို ကြိုဆိုတယ်လို့ ၂၀၂၅ ဒီဇင်ဘာ ၂၆ရက်က မကွေးယူနစ်အစိုးရဝန်ကြီးချုပ်ဖြစ်ခဲ့တဲ့ ဒေါ်တာရဲထွန်းဇော်က သူ့ရဲ့လူမှုကွန်ရက်ကတဆင့် အသိပေးထားပါတယ်။
“ အမျိုးသားညီညွတ်ရေးအစိုးရ၊မကွေးဖက်ဒရယ်ယူနစ်အတွင်းက တော်လှန်ရေးအင်အားစုအသီးသီးနဲ့မကွေးဖက်ဒရယ်ယူနစ် ကြားကာလအစိုးရတို့တသားတည်း အတူလက်တွဲချီတက်မှုမှသည်တော်လှန်ရေးအောင်မြင်မှုပန်းတိုင်ကို အမြန်ဆုံး ရောက်ရှိပြီးဖက်ဒရယ်ဒီမိုကရေစီပြည်ထောင်စုကြီးကိုအမြန်ဆုံး တည်ဆောက်နိုင်မယ်လို့ယုံကြည်ပါတယ်” လို့ ဒေါက်တာရဲထွန်းဇော်က ရေးသားထားပါတယ်။
“ မကွေးယူနစ် အစိုးရဝန်ကြီးကတော့ အခုလိုထုတ်ပြန်ချက်အပေါ်မှာ ကြိုဆိုတယ်ဆိုပြီးပြောကြားထားတာတော့ရှိပါတယ်။တခြားတော့ ပြောပြလို့မရသေးဘူး” လို့ ကိုဆက်ကြီးက ပြောပါတယ်။
မကွေးအစိုးရ လမ်းညွှန်မှုအောက်မှာရှိတဲ့ သန္ဓေအထိုင်တပ်တွေအဖြစ် အမြန်ဆုံးအကောင်အထည်ဖော်နိုင်ဖို့ ပေါက်၊ရေစကြို၊မြိုင်နဲ့ ပခုက္ကူမြို့နယ် ဒေသကာကွယ်ရေးအဖွဲ့ ၂၁ခုက မျှော်လင့်ထားပါတယ်။
ဖက်ဒရယ်ယူနစ်ကြားကာလအစီအမံဥပဒေအရ ယူနစ်ကာကွယ်ရေးတပ်နဲ့ လုံခြုံရေးတပ်တွေ ဖွဲ့နိုင်ဖို့အတွက် အမျိုးသားညီညွတ်ရေးအစိုးရ နဲ့ညှိနှိုင်း ဖွဲ့စည်းရမှာဖြစ်ပါတယ်။
ဒေသကာကွယ်ရေးအဖွဲ့ ၂၁ ခုရဲ့ရပ်တည်မှုနဲ့ပတ်သက်လို့ မကွေးယူနစ်အစိုးရဝန်ကြီးချုပ်နဲ့ ဒုဝန်ကြီးချုပ်ဆီက လူထုနွေဦးက သီးခြားမှတ်ချက် ရဖို့ဆက်သွယ်မေးမြန်းထားဆဲ ဖြစ်ပါတယ်။
“ ဒေသကာကွယ်ရေးအဖွဲ့တွေ အခုလို ယူနစ်လက်အောက်စုစည်းတာကောင်းပါတယ်။ဒါပေမယ့်အရေးအကြောင်းဆိုရင် သူ့တပ် ငါ့တပ်လို့တော့ မလုပ်စေချင် ၊ မဖြစ်စေချင်ဘူး” လို့ မကွေးတိုင်းဒေသခံတစ်ဦးက ပြောပါတယ်။
ပြီးခဲ့တဲ့မတ်လက ပေါက်နဲ့ မြိုင်မြို့နယ်မှာရှိတဲ့ ရေနံလုပ်ကွက်တွေနဲ့ပတ်သက်ပြီး အမျိုးသားညီညွတ်ရေးအစိုးရရဲ့ တပ်မတော်တွေနဲ့ ဒေသခံကာကွယ်ရေးအဖွဲ့တွေကြားမှာ တင်းမာမှုအချို့ရှိခဲ့ပါတယ်။
အဲဒီနောက်ပိုင်း ရေနံတွင်းတွေ စီမံခန့်ခွဲမှုနဲ့ပတ်သက်ပြီး အမျိုးသားညီညွတ်ရေးအစိုးရနဲ့ မကွေးဖက်ဒရယ်ယူနစ်အစိုးရကြား နှစ်ဖက်တွေ့ဆုံ ညှိနှိုင်းမှုတွေရှိနေဆဲလို့ သိရပါတယ်။
နယ်မြေစိုးမိုးမှုပေါ်မူတည်ပြီး ဒေသန္တရအုပ်ချုပ်ရေးယန္တရား ပိုမိုခိုင်မာစေဖို့ တိုင်းနဲ့ ပြည်နယ်အလိုက် အရပ်သားအခြေခံကြားကာလအုပ်ချုပ်ရေးအဖွဲ့ဖြစ်တဲ့ ယူနစ်အစိုးရတွေကို စစ်ကိုင်းနဲ့ မန္တလေးတိုင်းမှာလည်းဖွဲ့စည်းထားပြီး ဖြစ်ပါတယ်။
