NATO စစ်မဟာမိတ် အဖွဲ့ရဲ့ နယ်မြေထဲ ရုရှားဒရုန်းတွေ နယ်ကျွံလာလို့ ပစ်ချတာ ခံခဲ့ရတဲ့ ဖြစ်စဉ်အပြီး မကြာခင်မှာပဲ ရုရှားနဲ့ ဘီလားရုစ် ပူးပေါင်းပြီး စစ်ရေးလေ့ကျင့်မှု စတင်ခဲ့ပါတယ်။
စက်တင်ဘာ ၁၂ ရက်နေ့မှာ Zapadလို့ နာမည်ပေးထားတဲ့ နှစ်နိုင်ငံ ပူးပေါင်း စစ်ရေးလေ့ကျင့်မှုကို စတင်ခဲ့ကြောင်း ရုရှား ကာကွယ်ရေး ဝန်ကြီးဌာနက ထုတ်ပြန်ပါတယ်။ ဒါဟာ NATO အဖွဲ့ဝင် ပိုလန်နိုင်ငံက ရုရှားရဲ့ တိုက်ခိုက်ရေး ဒရုန်းတွေ လေပိုင်နက် ကျူးကျော် ဝင်ရောက်လို့ ပစ်ချခဲ့ရကြောင်း စွပ်စွဲ ကြေညာပြီး ရက်ပိုင်းအကြာမှာပါ။ တစ်ချိန်တည်းမှာပဲ ယူကရိန်း အရှေ့ပိုင်း စစ်မြေပြင်မှာလည်း ရုရှား ခြေလျင်တပ်တွေက ရှေ့တိုးဖို့ ကြိုးစားနေပြီး ယူကရိန်း အနှံ့က မြို့ကြီးတွေကို ရုရှားရဲ့ ဒရုန်းနဲ့ ဒုံးကျည် တိုက်ခိုက်မှုတွေက အရှိန်မြင့်လာနေပါတယ်။
ရုရှားကာကွယ်ရေး ဝန်ကြီးဌာနက စစ်ရေးလေ့ကျင့်မှုမှာ ပါဝင်တဲ့ သံချပ်ကာယာဉ်တွေ၊ ရဟတ်ယာဉ်တွေ၊ ရေတပ်သင်္ဘောတွေရဲ့ ဗီဒီယို တစ်ခုကိုလည်း ထုတ်ပြန် ပြသခဲ့ပါတယ်။ အဲဒီ စစ်ရေးလေ့ကျင့်မှုမှာ လေကြောင်းက ထောက်လှမ်းပျံသန်းမှုနဲ့ မြေပြင်ပစ်မှတ်တွေကို တိုက်ခိုက်မှုတွေလည်း ပါဝင်မယ်လို့ ရုရှားက ကြေညာပါတယ်။
ရုရှား ကာကွယ်ရေး ဝန်ကြီးဌာနက မြောက်ပိုင်း ရေတပ်မရဲ့ ရေယာဉ်တွေကိုလည်း အာတိတ်သမုဒ္ဒရာ မြောက်ပိုင်း ရေပြင်တွေမှာ စစ်ရေးလေ့ကျင့်စေဖို့ ဘားရန့်စ်ပင်လယ်ဆီ စေလွှတ်ထားကြောင်း အတည်ပြုခဲ့ပါတယ်။
Public Service Announcement
NATO မဟာမိတ် အဖွဲ့ရဲ့ အရှေ့ဖက်ဆုံး နယ်မြေမှာ အကျုံးဝင်တဲ့ နိုင်ငံတွေကတော့ ဘီလားရုစ်နဲ့ ရုရှားတို့ ပူးပေါင်း စစ်ရေးလေ့ကျင့်မှုကို သတိကြီးကြီးနဲ့ စောင့်ကြည့်နေပါတယ်။
ရုရှား ဒရုန်းတွေကို NATO မဟာမိတ် နိုင်ငံတွေနဲ့ ပူးပေါင်း ပစ်ချခဲ့ရတဲ့ ဖြစ်စဉ် အပြီးမှာတော့ ပိုလန်ဟာ ဒုတိယ ကမ္ဘာစစ်နောက်ပိုင်း စစ်ရေးပဋိပက္ခ တစ်ခုနဲ့ အနီးဆုံး အဆင့်ထိ ရောက်သွားခဲ့ပေမယ့် သေချာပေါက် စစ်ဖြစ်တော့မယ်ဆိုတဲ့ အဓိပ္ပါယ်တော့ မဟုတ်ကြောင်း ပိုလန် ဝန်ကြီးချုပ် ဒေါ်နယ်လ်တက်စ်ခ်က ပြောကြားခဲ့ပါတယ်။
Zapadနဲ့ တိုက်ဆိုင်ပြီး ပိုလန်ဟာလည်း NATO မဟာမိတ်တွေ ပူးပေါင်းပြီး တပ်အင်အား ၄၀၀၀ လောက် ပါဝင်တဲ့ စစ်ရေးလေ့ကျင့်မှု တစ်ခုကို လုပ်ဆောင်သွားဖို့ ပြင်ဆင်နေပါတယ်။
ရုရှားကတော့ Zapadဟာ ကာကွယ်ရေး ကဏ္ဍအတွက် ရည်ရွယ်ထားတဲ့ အစီအစဉ်သာဖြစ်ပြီး တခြားနိုင်ငံတွေကို ရန်လို ခြိမ်းခြောက်ဖို့ မဟုတ်တဲ့အတွက် စိုးရိမ်မှုတွေ ဖြစ်နေစရာ မလိုဘူးလို့ မှတ်ချက်ပေးထားပါတယ်။
ကိုးကား: AFP
