ကိုယ့်ကိုယ်ကို သမ္မတဘွဲ့ ပြန်ပေးထားတဲ့ စစ်ခေါင်းဆောင် မင်းအောင်လှိုင် ရဲ့ ငြိမ်းချမ်းရေးဖိတ်ခေါ်ချက်အပေါ် လက်ခံနိုင်စရာမရှိကြောင်း နဲ့ အယုံအကြည်မရှိကြောင်း အမျိုးသားညီညွတ်ရေးအစိုးရ(NUG) ၊ ချင်းအမျိုးသားတပ်ဦး (CAN/CNF) ၊ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး (ABSDF) တို့က ဧပြီလ ၂၁ရက်နေ့မှာ တုံ့ပြန်ပြောဆိုလိုက်ပါတယ်။
စစ်ခေါင်းဆောင် မင်းအောင်လှိုင်ဟာ ဧပြီ၂၀ရက်နေ့က နေပြည်တော်မှာလုပ်ခဲ့တဲ့ အစည်းအဝေးမှာ ခုလို ပြောဆိုခဲ့တာဖြစ်ပြီး ၂၀၂၁ခုနှစ် စစ်တပ်အာဏာသိမ်းပြီးတဲ့နောက် ပေါ်ပေါက်လာတဲ့ ပြည်သူ့ကာကွယ်ရေးတပ်(PDF)တွေကိုလဲ ပညာရေးအားနည်းတာကြောင့် ဖြစ်လာတာလို့ ပြောခဲ့ကာ လာမယ့် ဇူလိုင် ၃၁ရက် နောက်ဆုံးထားပြီး ရက်(၁၀၀)အတွင်း အလင်းဝင်ဖို့ ပြောဆိုလာတာပါ။
စစ်အာဏာသိမ်းမှုကို ဖယ်ရှားပြီး မြန်မာစစ်တပ်ရဲ့ နိုင်ငံရေးမှာ ပါဝင်နေတာကို အဆုံးသတ်ဖို့ အပါအဝင် တော်လှန်ရေး ရည်မှန်းချက် ၆ချက် ကို အမျိုးသားညီညွတ်ရေးအစိုးရ(NUG) က ထုတ်ပြန်ထားပါတယ်။ဒီအချက်တွေ ရတဲ့အထိ တိုက်ပွဲဝင်သွားမှာဖြစ်ပြီး စစ်ခေါင်းဆောင် မင်းအောင်လှိုင်ရဲ့ ဖိတ်ခေါ်မှုကို လက်ခံစရာမရှိဘူးလို့ အမျိုးသားညီညွတ်ရေးအစိုးရက လဲ ပြောပါတယ်။
သတင်း/တင်ဆက်-မြတ်ကြီး
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
