မြန်မာစစ်တပ်အတွက် နိုင်ငံခြားဝင်ငွေရရှိစေသည့် ဓာတ်ငွေ့စီမံကိန်းနှင့် ဆက်စပ်သည့် ကုမ္ပဏီကို ဂျာမန် Deutsche ဘဏ် က ငွေကြေးဝန်ဆောင်မှုပေးခဲ့
ပေါက်ကြားလာသည့် ဘဏ်အချက်အလက်များအရ အမေရိကန်အခြေစိုက် Halliburton ကုမ္ပဏီ လျှောက်ထားလာသည့် ဘဏ်အာမခံကြေး တိုးမြှင့်ပမာဏကို အတည်မပြုပေးသင့်ဟု ဘဏ်၏ စိစစ်ကြီးကြပ်ရေးအဖွဲ့က သတိပေးခဲ့သည့် ကြားမှ မြန်မာစစ်တပ်ထိန်းချုပ် မြန်မာ့ရေနံနှင့် သဘာဝဓာတ်ငွေ့လုပ်ငန်း ဆက်လက်လည်ပတ်နိုင်စေမည့် ဝန်ဆောင်မှုကို ဘဏ်က ခွင့်ပြုပေးခဲ့သည်။
ဂျာမနီအခြေစိုက် Deutsche Bank (ဒွိုက်ချ်ဘဏ်) သည် ဘဏ်၏ စိစစ်ရေးအဖွဲ့က “အတည်ပြုမပေးခဲ့သင့်” ဆိုသည့် သုံးသပ်ချက်ကို ဆန့်ကျင်၍ ဇောတိက ကမ်းလွန်သဘာဝဓာတ်ငွေ့ စီမံကိန်းတွင် ပါဝင်နေသော အမေရိကန်ကုမ္ပဏီတခုအတွက် ဘဏ်အာမခံပမာဏကို တိုးမြှင့်ပေးခဲ့ကြောင်း ပေါက်ကြားလာသည့် စာရွက်စာတမ်းများအရ သိရသည်။
ဇောတိကစီမံကိန်းတွင် ရင်းနှီးမြှုပ်နှံထားသည့် ထိုင်းကုမ္ပဏီ PTTEP က ပိုက်ချခြင်းနှင့် ဓာတ်ငွေ့စုပ်ယူခြင်း ဝန်ဆောင်မှုများအတွက် တဆင့်ငှားရမ်းထားသော အမေရိကန်အခြေစိုက် Halliburton (ဟာလီဘာတန်) ကုမ္ပဏီအတွက် ဒွိုက်ချ်ဘဏ်က ၂၀၁၈ ခုနှစ် စက်တင်ဘာလတွင် အမေရိကန်ဒေါ်လာ ၇၀၀,၀၀၀ ဝန်းကျင်တန်ဖိုးရှိသော ဘဏ်အာမခံ (bond guarantee) ကို ကနဦး ထုတ်ပေးခဲ့သည်။
ဘဏ်အာမခံ (bond guarantee) ဆိုသည်မှာ ကန်ထရိုက်တာတဦးသည် သတ်မှတ်ကာလအတွင်း အလုပ်မအပ်နိုင်လျှင်၊ သို့မဟုတ် သတ်မှတ်အရည်အသွေး မပြည့်မီခဲ့လျှင် ထိုကန်ထရိုက်တာကို ငှားရမ်းထားသည့် ရင်းနှီးမြှုပ်နှံသူအား ဖော်ပြထားသော ငွေပမာဏကို ဘဏ်က စိုက်လျော်ပေးမည်ဟုကတိပြုထားသော အာမခံစာချုပ်ဖြစ်သည်။
မြန်မာတွင် စစ်အာဏာသိမ်းပြီး တနှစ်နီးပါးအကြာ ၂၀၂၂ ခုနှစ် ဇန်နဝါရီလတွင် ဟာလီဘာတန်က ဘဏ်အာမခံပမာဏကို ဒေါ်လာတသန်းကျော်အထိ တိုးမြှင့်ပေးရန် ဒွိုက်ချ်ဘဏ်ထံ လျှောက်ထားခဲ့ရာ ဘဏ်က သဘောတူပြီး တိုးမြှင့်ပေးခဲ့သည်။
PTTEP သည် ဇောတိက စီမံကိန်းတွင် ရှယ်ယာအများစု (၈၀ ရာခိုင်နှုန်း) ရင်းနှီးမြှုပ်နှံထားပြီး ကျန်ရှယ်ယာ ၂၀ ရာခိုင်နှုန်းကို အာဏာသိမ်း စစ်တပ်က ထိန်းချုပ်ထားသော မြန်မာ့ရေနံနှင့် သဘာဝဓာတ်ငွေ့လုပ်ငန်း (MOGE) က ပိုင်ဆိုင်ထားသည်။




