Böyük istedadları kuryer edən Əliyevlər
Bu hakimiyyətə istedadlı, intellektli, zəkalı insanlar gərək deyil. Gərək olsaydı, hər il minlərlə belə insan ölkəni tərk edib getməzdi. Əməkdar artist Aybəniz Haşımova televiziya proqramlarının birində istedadlı müğənni Fərid Məmmədovun yaşamaq üçün həmişəlik Amerikaya köçdüyünü təsdiqləyən açıqlama verib. Xatırlayırsınızsa, bu xəbər keçən ilin payızından mediada yayılmışdı. Xəbərdə deyilirdi ki, “Eurovision -2013” musiqi yarışmasında 2-ci yeri tutan Fərid Məmmədov Nyu-Yorkda kuryer işləyir. Xəbər sosial şəbəkələrdə böyük səs-küyə səbəb olmuş, amma onun doğruluğu fəal İnstagram istifadəçisi olan, fotoşəkillərini və videolarını müntəzəm orda paylaşan Fərid tərəfindən təsdiq olunmamışdı.
Sənətçinin ABŞ-a köçməsi mövzusu əməkdar artist Aybəniz Haşımovanın ATV proqramındakı çıxışı ilə yenidən gündəmə gəldi. Qeyd edək ki, A. Haşımova F. Məmmədovun yaradıcılıq fəaliyyətinə başladığı və uzun müddət üzvü olduğu “Bülbüllər” uşaq qrupunun yaradıcı rəhbəridir. “Fərid kimi bir istedada sahib olan bir insan ölkəni tərk etməməli idi. Onu küsdürdülər. Bu gün ABŞ-da işləyir, əziyyət çəkir… ” – deyən A. Haşımova “Eurovision 2013” iştirakçısının bənzərsiz istedadı olduğunu qeyd etdi, onun ABŞ-da kuryer işlədiyini təsdiqlədi.
Əməkdar artist TV-lərə müraciətlə F. Məmmədovun ABŞ-a köçməsinin səbəbini də soruşdu: “Niyə tələbəm Azərbaycanı tərk edib Nyu-Yorkda kuryer işləyir? Bu sual ilk növbədə televiziya kanallarına ünvanlanır. Mən Fəridin anası ilə danışdım, o dedi ki, Fərid kiminləsə mübahisə edib, buna görə qadağa qoyulmuş şəxslər siyahısına düşüb, onun Amerikaya köçməsinin əsas səbəbi bu idi.” Ancaq teleaparıcı Nana Ağamalıyeva ona qadağanın olmadığını, müğənninin özünün dəfələrlə dəvət olunduğu proqramlardan imtina etdiyini və dəvətlərə rədd cavabı verdiyini bildirdi.
Qeyd edək ki, F. Məmmədovun müğənni kimi son çıxışı 2015-ci ilin iyununda Bakıda keçirilən Avropa Oyunlarının bağlanış mərasimində olub. O burada “Eurovision- 2012” yarışmasının iştirakçısı Səbinə Babayeva ilə birlikdə Azərbaycan himnini səsləndirib.
ABŞ-da yaşayan F. Məmmədov indi də mahnı oxumağa davam edir. O, son paylaşımlarının birində müğənni Bruno Marsın repertuarından “Qrenade” mahnısını ifa edir.
26 illik Əliyev hakimiyyətinin ölkəyə verdiyi “töhfə” bundan ibarətdir. Təkcə son 10 ildə 120 mindən çox ali təhsilli Azərbaycan vətəndaşı ölkəni tərk edərək, xaricə gedib. Miqrasiya məlumatlarına görə, sözügedən dövr ərzində ali və ya orta-texniki təhsili olan əməkqabiliyyətli 18-65 yaş arası hər səkkiz sakindən biri respublikanı tərk edib. Əhalinin ən fəal hissəsi – 25-34 yaşlı əməkqabiliyyətli kişilər yaxşı əməkhaqqı axtarışında Azərbaycanı tərk edirlər. İkinci yeri isə 35-49 yaş qrupu tutur. Mütəxəssislər qeyd edir ki, vəziyyət bu cür davam edərsə, gələcəkdə ölkədə kadr böhranı yaşanacaq.