Aşırma şalvar geyinəndən parlamentdə oturan deputat
Azərbaycanın başabəla deputatları silsiləsindən gəlib çıxdıq Qarabağı təmsil edən Bəxtiyar Əliyevin üstünə. 25 ildir Ağdamın deputat mandatını özəlləşdirib cibinə qoymuş həmin o Əliyevin. Deyilənə görə onun arxası möhkəm olduğuna görə, bu 25 ildə ona batan yoxdur. Həmin adamı sayəsində BDU-nun psixologiya kafedrasının müdiri, professor, AMEA-nın müxbir üzvü səviyyəsinə qədər yüksəlib. O qədər yüksəlib ki, indi onun qəbuluna düşmək xəyal işidir. Adamın köməkçisinin belə köməkçisi var. 2007-ci ildə B. Əliyevin AMEA-nın müxbir üzvü seçilməsi elm adamları arasında böyük narazılıq doğurmuşdu. Tanınmış tarixçi-alim Cəmil Həsənli bir məqaləsində bunları yazmışdı: “…İsa Həbibbəylidə aydınlıq yaransın deyə o təsadüfü adamları açıqlamaq istəyirəm. Bunlardan biri Ramiz Mehdiyevə göstərdiyi müxtəlif xidmətlər müqabilində müxbir üzv seçilmiş Bəxtiyar Əliyevdir. Akademiyanın təcrübəli bir həqiqi üzvü kimi, eyni zamanda həmin seçkilərdə say komissiyasının üzvü olmuş bir alim kimi, bəlkə İsa Həbibbəyli desin ki, Bəxtiyar Əliyevin elmə töhfə verən hansısa kitabını, əsərini, məqaləsini və sair oxuyub. Orta səviyyəli, elmdə elə bir diqqətəlayiq nəticələri olmayan Bəxtiyar Əliyevi Azərbaycan Milli Elmlər Akademiyasının müxbir üzvü seçmək akademik əxlaqsızlıq idi”. Bu haqda təhsil məsələləri üzrə tanınmış ekspert Etibar Əliyevin yazdığı fikirlər də maraqlıdır: “Həmin il Akademiyada keçirilən seçkilərdə fəlsəfə sahəsində dünya çapında tanınmış böyük alim, bütün ömrünü fəlsəfəyə həsr etmiş Yusif Rüstəmov da iştirak etmişdi. Amma fəlsəfə üzrə AMEA-nın müxbir üzvü fəlsəfədən yarım səhifəlik məqaləsi belə olmayan Bəxtiyar Əliyev seçilmişdi. Bu qədər vəzifə və titullardan sonra hörmətli Bəxtiyar müəllimə orta ümumtəhsil məktəbləri üçün “İnsan və Cəmiyyət” dərsliklərinin yazılması da həvalə olunub. Ortaya çoxlu suallar çıxır: psixoloq hara, belə bir adda dərsliyin yazılması hara?… Dərslikdə “Davamlı insan inkişafı və sosial məsuliyyətli siyasət” paraqrafının birinci cümləsi belə başlayır: “davamlı inkişafın əsas məqsədi gələcəksiz inkişafın qarşısını almaqdan ibarətdir”.
Qarabağlı deputatın elmə vurduğu zərbə bu qədər. Amma sıravi Ağdam seçicilərinin fikirlərindən bilinir ki, bu 25 ildə onun deputatlığından da yarıyan olmayıb. Ağdam rayonundan olan məcburi köçkün, təqaüdçü müəllim Nuşirəvan Aslanov: “Bizim Ağdam rayonunu Milli Məclisdə təmsil edən iki deputatımız var. Bəxtiyar Sadıqov və Bəxtiyar Əliyev. Onlar aşırma şalvar geyinəndən ta bu günə kimi, rayonumuzu orada təmsil edirlər. Bəs bizim o deputatlar orda nə edirlər? Bizneslə məşğuldurlar, alverlə məşğuldurlar, nəylə məşğuldurlar? Mən Ağdam tərəfindən belə adamların deputat seçilməsinə bir vətəndaş kimi öz etirazımı bildirirəm.”
Tanıyanların sözlərinə görə, bu illər boyunca universitetdə də B. Əliyevin bir qara qəpiyə dəyən fəaliyyəti olmayıb. Bu haqda mətbuatda da xeyli yazılar gedib. Belə yazılardan biri Azərbaycan Dillər Universitetinin dissertantı, psixologiya kafedrasının baş müəllimi Könül Haqverdiyevanın elmi işinin müdafiəsi zamanı başına gətirilənlər haqqında idi. Könül xanım müdafiə zamanı Bəxtiyar Əliyevin və yaxın adamlarının işinə əngəl yaratdığını, ondan rüşvət gözlədiklərini bildirmişdi: “Bəxtiyar Əliyevin sağ əli olan Rəşid Cabbarov mənə açıq şəkildə dedi ki, bilmirsən, belə müdafiədə tərləməlisən?” “Mən özüm Bəxtiyar Əliyevin namizədlik elmi işini oxumaq istəmişəm. Əvvəldən eşitmişdim ki, Bəxtiyar Əliyevin elmi işi şübhəlidir. Dəfələrlə bu elmi işin referatını əldə etməyə və oxumağa çalışsam da, bu mümkün olmayıb Heç bir yerdə yoxdur. Niyə? Nə baş verib? Belə şübhəli elm arxivinə malik bir adam mənimlə niyə intriqa aparmalıdır? O, nə istəyir? Və bu əməlləri ilə nə demək istəyir” – deyir Könül Haqverdiyeva.
Bəzən bütün bunların yaşadığın ölkədə deyil, hansısa mafiya filmlərində baş verdiyini düşünürsən. Amma təəssüf ki, baş verənlər acı həqiqətdir. Elmi işindən, akademikliyindən tutmuş deputatlığına qədər hər şeyi saxta olan adamların əlində qalmışıq.