On illərdir müxtəlif problemlərdən Türkiyəyə köç etmiş həmvətənlərimiz qardaş ölkədə olmazın məhrumiyyətlər yaşayır. Burda sənədlərinin etibarlılıq müddəti bitmiş on minlərlə həmyerlimiz var ki, yaşadıqları yerdə bir çox hüquqlardan məhrum olub, zülm çəkirlər. Türkiyədə təhsil alan tələbələrdən biri deyir ki, siyasi baxışı olmayan insanlar belə, yaşadıqları bu işgəncələrə görə Əliyev rejiminə nifrət edirlər. Bu ölkədə azərbaycanlıların hansı zülmlərə qatlaşdıqlarını gözlə görmək lazım. İnsanlar geriyə qayıtmamaq üçün ən ağır şərtlərdə yaşamağa və işləməyə razıdırlar. “Problem çıxanda konsulluq insanları qapısına yaxın buraxmır, mən özüm neçə dəfə bu biabırçılıqla üzləşmişəm. Diasporla İş Üzrə Dövlət Komitəsi var, nə işlə məşğuldur onlar? Burda düşük şəkildə Əliyevlərin təbliğatını aparmaqdan və fəal tələbələri güddürməkdən başqa nəyə yarayırlar? Problemləri bilirlər, nə zamandır da həmvətənlərimizə yardım edəcəklərini deyib dururlar. Hanı bəs real addımlar? Yoxdur, azərbaycanlıların sahibi yoxdur, burada suriyalılar belə bizdən daha qiymətlidir. Çünki öz hökumətimiz bizi insan yerinə qoyub, dərdlərimizlə maraqlanmır.”
Həmin tələbə onu da deyir ki, hazırda Türkiyəyə müxtəlif səbəblərdən gələn milyonlarla xarici vətəndaş arasında azərbaycanlılar çoxluq təşkil edir. Qanunsuz çalışan işçilərin sıralamasında Azərbaycan Gürcüstan, Suriya və Ermənistandan sonra dördüncüdür.
Çox halda Azərbaycan vətəndaşlığını itirən və Türkiyə vətəndaşlığı ala bilməyən bu şəxslər etibarsız kimlik sənədləriylə ortalıqda qalırlar. Onların uşaqları da sənədsiz yaşadığı üçün təhsil ala bilmirlər. Bu şəxslərin nikah qeydi, iş müqaviləsi və bank əməliyyatları etmək, tibbi və hüquqi yardım almaq imkanları da yoxdur. Həmvətənlərimiz bu şərtlərdə pensiya haqlarından da faydalana bilmir, hər hansı təsirə məruz qaldığı halda, polis bölməsinə şikayət etməkdən belə çəkinirlər. Yüz minlərlə həmvətənlərimizin nədən bu ölkəyə köç etməsi başqa söhbətin mövzusudur. Amma bu problemlər varsa, konsulluq və Diasporla İş Üzrə Dövlət Komitəsi nədən insanlarımızın dərdləri ilə maraqlanmır? Azərbaycan hökumətinin xarici ölkələrdəki diaspora fəaliyyəti çoxdan iflasa uğrayıb. Dövlətin büdcəsindən bu məqsədlə ayrılan böyük milyonlar da yaramazcasına kimlərinsə cibinə gedib. Bu, bir acı həqiqətdir. O məhrumiyyətləri gözləri ilə görən tələbə gənc doğru deyir, azərbaycanlıların sahibi yoxdur, nə Türkiyədə, nə də başqa xarici ölkələrdə.