Məsələ tam da əvvəldən düşündüyümüz kimidir. İlham Əliyevin kadr islahatı məlum dairədə dövrə vurub durur. Yeni təyinat alan cavanların da köhnə qurdların qohum-əqrəbası olduğu bir-bir sübuta yetirilir. Demişdik axı, çürümüş sistemə bir-iki yeni vint quraşdırmaqla onu dəyişə bilməzsiniz. Məqsəd sistemi saxlamaqdırsa, köhnə mexanizmdən imtina etmək mümkün olmayacaq. “Harda qırıldı-qırıldı” deyib, qəza vəziyyətini gözə alıb gedəcəksiniz. Bütün diktatorların tutduğu yol belədir. İlham Əliyev də o yolu seçib. Dünən Yevlax və Xaçmaz rayonlarına təyin olunan icra başçılarını qəbul edərkən məlum “islahatların” konturlarını da göstərib. “Siz gəncsiniz, birinizin 37, digərinizin 38 yaşı var. İndi Azərbaycanda gəncləşmə siyasəti aparılır. Bu, təbii prosesdir və biz bu prosesdən kənarda qala bilmərik”. Prezident bunun kampaniya kampaniya xarakteri daşımadığını deyib və bildirib ki: ” Bəziləri bunu kampaniyaya çevirmək istəyirlər və sınanmış, təcrübəli, bir qədər yaşlı insanlara qarşı bu kampaniyanı təşkil etmək istəyirlər. Mən buna yol verməyəcəyəm. Mən bilirəm kim nəyə qadirdir, kimin hansı xidmətləri olub əvvəlki dövrdə və bu gün. Ona görə Azərbaycanda təcrübə ilə gənclərin dinamizmi arasında vəhdət yaradılmalıdır. Bunun sintezi sayəsində biz gözəl nəticələrə çata bilərik. Bir də ki, yaşlı nəsil öz təcrübəsini bölüşməlidir. “.
İlham Əliyevin çıxışında maraqlı bir nüans var. O qeyd edir ki, kadr islahatında əsas meyar təkcə yaşa görə deyil, təfəkkürə, işə yanaşmaya görə müəyyən ediləcək. Yeni təyin etdiyi icra başçılarına da xəbərdarlıq edib ki, “əgər bu etimadı doğrultmasanız mən sizi işdən çıxaracağam və cəzalandıracağam.”
İnanaqmı? İlham Əliyevin 16 illik hakimiyyəti dövründə hansı icra başçısını, hansı deputatı cəzalandırdığını görmüsünüz? Guya onun xalqın qanını içən bu deputat və məmurlardan xəbəri yoxdur? Guya diktator bu adamların vəzifəyə təyin olunduqları müddətdə necə varlanıb-pullanıb feodala çevrildiklərini bilmir? O özünü bilməzliyə vurub, yalan danışa bilər. Amma biz, xalq bunu yaxşı bilirik axı. Biz o deputat və icra başçılarının həmin vəzifə üçün kimə nə qədər pul verdiklərini belə bilirik axı. Xalq illərdir onun haqqını yeyən, hüququnu tapdayan, qanını içən zombi deputatlardan və feodal məmurlardan 15-20 nəfərinə həqiqi cəza verilməsini istəyir ki, o birilərə dərs olsun. Əliyev bunu edə bilərmi? Çətin. Çünki ilmənin ucunu çəkməyin nə qədər qorxulu olduğunu özü də anlayır.
Elə ona görə də, “bir qədər yaşlı insanlara qarşı kampaniyaya aparılmasına yol verməyəcəm” deyir. Prezident anlayır ki, o yaşlılar mövcud sistemi saxlayan əsas vintlərdir və onları dəyişmək hansı fəsadlar verə bilər. Haqlıdır, diktatorlar onları ayaqda saxlayan köhnə vintlərdən sona kimi imtina etmirlər. Bir tamın ayrılmaz hissələri olduqlarına görə, sonluğu da birlikdə yaşayırlar, bərabər çöküb qəlpə-qəlpə dağılaraq.
Lakin xalq da var, və xalq bu deputat və məmurların cəzalandırmasını tələb edir…