VİDEO
Ölkədə parlamentin qanunverici orqan kimi ancaq quru adı qalıb. Bütün qaydalar başda oturanların istək və arzularına uyğun müəyyən olunur. Şikayətçiləri yaxına buraxmırlar, onları çəkməyə gələn jurnalistlərə təzyiq göstərirlər. Məsələn, dünən orda şikayətə gəlmiş vətəndaşları çəkmək istəyən Nurlan Qəhrəmanlı(Nurlan Libre) və həmkarları parlamentin mühafizə xidməti tərəfindən saxlanıldı və məcburi şəkildə ərazidən uzaqlaşdırıldı. Onlar bir qrup insanın etiraz aksiyasını çəkmək üçün gəlmişdi. XDMX-nin əməkdaşları onlarla mübahisə edən Nurlan Librenin çəkiliş aparmasına icazə vermədilər. Doğrudur, mühafizə xidmətinin işi binanı təhlükəli hadisələrdən və şübhəli şəxslərdən qorumaqdır. Amma onların jurnalistlərin fəaliyyətinə niyə terrorçu kimi reaksiya verdiklərini başa düşə bilmirik. Məgər bu orqan 4-5 nəfərin şəxsi istəkləri əsasında idarə olunacaq yerdir? MM mühafizə xidmətinin rəisi spiker Oqtay Əsədovun qohumu olanda nə olar? Yoxsa ona hər şeyi edə biləcəyi haqda xüsusi imtiyaz kartı verilib? Adam hansı haqla jurnalistləri o şəkildə ərazidən qovdurur? Hansı haqla onlara şikayətə gələn insanları çəkməyi qadağan edir? Heç olmasa, bu qanunverici binanın içində bir qanunlara əməl olunma görüntüsü yaratsınlar…
Amma nə yazıq ki, parlament dövlətin bir qurumu kimi önəmli statusunu çoxdan itirib. Bu adamların üzündən parlament binası roman və macəraların yaşandığı məkana çevrilib. Həmin romanların baş qəhrəmanlarından biri də elə mühafizə rəisi Rəşaddır. XDMX-nin Milli Məclis bölməsinə rəhbərlik edən şəxs. Rəşadın da eşq hekayəsi dillərə dastan. Müğənni Günay İbrahimli ilə yaşadığı roman mətbuat səhifələrindən düşmür. Hələ müğənni çevrəsinə rəis sevgilisi ilə parlament binasında keçirdikləri gecədən də fəxrlə danışıb qürrələnir. Deyəcək söz yox, bunlar dövlətin əmanət etdiyi vəzifəni öz məşuqələrinin əyləncəsi üçün istismar vasitəsinə çevirəcək qədər səviyyəsiz adamlardır. Spikerin bacısı oğlu olaraq, gecə parlament zalını bağlatdırıb müğənni sevgilisini ora gətirmək, orda romantik gecə keçirmək səlahiyyətinə malik olduğunu düşünəcək dərəcədə səviyyəsiz. Mühafizə xidmətinin binanı jurnalistlərdən cidd-cəhdlə qorumasının bir səbəbi də öz əməllərinin qorxusu olmasın? Mühafizə rəisi mətbuatın əlindən, onsuz da, yanıqlıdır. Görünür, media işçilərini yaxına buraxmamaq haqda xüsusi göstəriş də ondan gəlir. Öz peşə fəaliyyətlərini yerinə yetirmək üçün mətbuat işçilərinə imkan yaratmaq bütün hökumət təmsilçilərinin borcudur. Bu ölkədə hər kəs öz işini görməlidir. Elə parlamenti əyləncə məkanı ilə səhv salan mühafizə rəisi Rəşadın özü də…
“Made İn Azerbaijan” kanalı Oqtay Əsədovun sevgilisi və qohumu Rəşadın romanda haqda sarkastik xarakterli videoya millionlar baxsa da, jurnalistlər hələ də Parlament binasının qarşısında döyülür…