Azərbaycan Müdafiə Nazirliyi mövqelərinin atəşə tutulduğunu açıqlayıb.
Bu barədə nazirlik mayın 26-da saat 13 radələrində məlumat yayıb.
Məlumatda qeyd edilir ki, mayın 24-dən 26-dək Azərbaycan Ordusunun Kəlbəcər və Gədəbəy rayonlarında yerləşən mövqeləri Ermənistanın Geqarkunik vilayəti ərazisindəki mövqelərindən fasilələrlə atıcı silahlardan atəşə tutulub: “Eyni zamanda, Ermənistan tərəfi təxribat məqsədilə Şuşa şəhəri ətrafında yerləşən postlarımız istiqamətində avtomat silahlardan havaya atəş açıb. Cavab atəşi açılmayıb. İtki yoxdur”.
Ermənistan təkzib edir
Ermənistanın Müdafiə Nazirliyi Azərbaycan Silahlı Qüvvələrinin atəşə tutulması haqda Bakının məlumatını təkzib edir. Qurum bunu kiçik serjant Qevorq Xurşudyanın öldürülməsini ört-basdır etməyi hədəfləyən növbəti cəhd adlandırıb.
“Ermənistan Silahlı Qüvvələri göstərilən günlərdə Azərbaycan tərəfə bircə atəş də açmayıb. Azərbaycanın Ermənistanın suveren ərazilərinə qəsdi qəbuledilməzdir”, – məlumatda deyilir.
MN: Bölmələrimiz tərəfindən Ermənistan istiqamətinə atəş açılmayıb
Azərbaycan Müdafiə Nazirliyi bildirir ki, Azərbaycan silahlı qüvvələrinin bölmələri Ermənistan istiqamətinə heç bir atəş açmayıb.
Məlumatda vurğulanır ki, Ermənistan Müdafiə Nazirliyi Azərbaycan Silahlı Qüvvələrinin bölmələrinin onların Geqarkunik rayonunun Yuxarı Şorca yaşayış məntəqəsi ərazisindəki mövqelərinin Kəlbəcər rayonu ərazisindən atəşə tutulması barədə yalan məlumat yayıb.
Nazirliyin məlumatında qeyd edilir ki, mayın 25-də günorta saatlarında Ermənistan silahlı qüvvələrinin şəxsi heyətlə dolu yeddi yük maşını sərhədin qeyd olunan sahəsinə yaxınlaşmağa cəhd edib:
“Bölmələrimiz tərəfindən görülən xəbərdarlıq tədbirləri nəticəsində qarşı tərəfin hərəkətinin qarşısı alınıb. Birmənalı şəkildə bildiririk ki, bölmələrimiz tərəfindən qarşı tərəf istiqamətində heç bir atəş açılmayıb.”
Nazirliyin qeyd etməsinə görə, onlarda olan məlumata əsasən “erməni hərbi qulluqçusunun ölümü ilə bağlı insident bədbəxt hadisə nəticəsində baş verib”.
Azərbaycan Müdafiə Nazirliyinin bildirməsinə görə, bu hadisənin onlarla hər hansı bir əlaqəsi yoxdur:
“Bildiririk ki, Azərbaycan tərəfi məsələ ilə əlaqədar Rusiya tərəfi ilə də daimi təmasdadır.”
Azərbaycan XİN: ‘…Araşdırmaların aparılması zərurətini üzə çıxarır’
Azərbaycan Xarici İşlər Nazirliyi (XİN ) də Ermənistanla dövlət sərhədində vəziyyətlə bağlı açıqlama yayıb.
Mətbuat xidməti idarəsinin məlumatına görə, Azərbaycan Silahlı Qüvvələrinin Ermənistanın Geqarkunik rayonunun Yuxarı Şorca yaşayış məntəqəsi ərazisindəki mövqelərini Kəlbəcər rayonu ərazisindən atəşə tutması barədə Ermənistan tərəfindən yayılan məlumatlar həqiqətə uyğun deyil:
“Ümumiyyətlə, son zamanlar Ermənistan silahlı qüvvələri arasında itkilərin, o cümlədən qeyri-hərbi itkilərin artması, sonuncu hal da daxil olmaqla Ermənistan silahlı qüvvələri daxilində müvafiq araşdırmaların aparılması zərurətini üzə çıxarır”.
Həmçinin, vurğulanıb ki, hazırda Azərbaycan-Ermənistan sərhədində vəziyyət sabitdir və nəzarət altındadır:
“Ermənistan tərəfini yalan bəyanatlarla vəziyyəti gərginləşdirməməyə, bu və digər məsələlərlə bağlı fikir ayrılıqlarının həllində konstruktiv danışıqlar aparılmasına çağırırıq”.
Ermənistan ordusunun iki hərbçisi həlak olub
AzadlıqRadiosunun Erməni xidməti Azatutyun Ermənistan Müdafiə Nazirliyinə istinadən yazır ki, Azərbaycan tərəfinin Geqarkunik vilayətində, Yuxarı Şorca kəndi yaxınlığındakı ərazini atəşə tutmasından sonra başlanmış atışmada Ermənistan silahlı qüvvələrinin müqaviləli hərbi qulluqçusu, kiçik serjant, 1989-cu il təvəllüdlü V.Y. Xurşudyan həlak olub.
Nazirlik bildirir ki, hazırda vəziyyət nəzarət altındadır və atışma yoxdur.
Bu da iddia olunur ki, Azərbaycan tərəfi Ermənistan silahlı qüvvələrinin mövqelərini atəşə tutub.
Ermənistan Müdafiə Nazirliyi kiçik serjantın ailəsinə başsağlığı verir və kədərinə şərik olduğunu bildirir.
Ermənistandan alınan başqa bir xəbərdə deyilir ki, mayın 25-də ölkənin cənub-şərqində yerləşən N hərbi hissəsinin hərbi qulluqçusu Mher Kareni Hovanisyanın meyiti başında güllə yarası ilə tapılıb.
Müdafiə Nazirliyinin məlumatına görə hazırda hadisə üzrə təhqiqat davam etdirilir.
Azadliq radiosu