ကေအဲန်ယူထိန်းချုပ်နယ်မြေ ညောင်လေးပင်ခရိုင် ကျောက်ကြီးမြို့နယ်ထဲမှာ ဒီကနေ့နေ့လည်ပိုင်းက KNLA တပ်မဟာ ၃ နဲ့ စစ်ကောင်စီတပ်တို့အကြား ထိတွေ့ပစ်ခတ်မှုဖြစ်ပွားခဲ့ပြီး စစ်ကောင်စီက လက်နက်ကြီးပစ်ခတ်မှုကြောင့် ဒေသခံ ၁၀၀ ကျော် ထွက်ပြေးတိမ်းရှောင်ခဲ့ရတယ်လို့ ကေအဲန်ယူက သတင်းထုတ်ပြန်ပါတယ်။
![KNU](https://i0.wp.com/www.ludunwayoo.com/wp-content/uploads/2022/06/285446690_394284592760999_6524346020439517623_n.jpg?resize=880%2C396&ssl=1)
ဒီကနေ့ ဇွန် ၂ ရက် နေ့လည် ၁၂ နာရီကျော်က ကျောက်ကြီးမြို့နယ် မဘီကြီးကျေးရွာအနီးမှာ ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၃ နဲ့ စစ်ကောင်စီရဲ့ ခလရ(၂၀)၊ ခမရ(၁၂၄)၊ ခမရ(၄၃၉)၊ ခမရ(၃၅၀)တပ်တို့နဲ့ ထိပ်တိုက်ပစ်ခတ်မှုဖြစ်ပွားခဲ့ပြီး ထိခိုက်ကျဆုံးမှုတော့ မသိရသေးဘူးလို့ ကေအဲန်ယူက ဆိုပါတယ်။
![](https://i0.wp.com/www.ludunwayoo.com/wp-content/uploads/2022/01/PSA_inside_Story_Jan22-03.jpg?resize=880%2C229&ssl=1)
နှစ်ဖက်တိုက်ပွဲတွေအတွင်း စစ်ကောင်စီတပ်ဘက်က လက်နက်ကြီး၊ လက်နက်ယ်တွေပစ်ချခဲ့တာကြောင့် မဘီကြီးကျေးရွာအနီးက လူဦးရေ (၁၄၃)ဦးဟာ ဘေးလွတ်ရာကို ထွက်ပြေးတိမ်းရှောင်ခဲ့ရတယ်လို့ ထုတ်ပြန်ချက်မှာ ဖော်ပြထားပါတယ်။
![KNU](https://i0.wp.com/www.ludunwayoo.com/wp-content/uploads/2022/06/284849422_394284652760993_8342646943646586857_n.jpg?resize=880%2C587&ssl=1)
ကျောက်ကြီးမြို့နယ်အတွင်းမှာ စစ်ကောင်စီတပ်တွေဟာ ပြည်သူလူထုတွေအပေါ် သတ်မှတ်ထားတဲ့အချိန်အတွင်း သွားလာရမယ်လို့ ညွှန်ကြားထားပြီး ဒေသခံပြည်သူတွေရဲ့သွားလာရေးကို ပိတ်ဆို့တာတွေ၊ ငွေကြေးကောက်ခံတာတွေလည်း ပြုလုပ်နေတယ်လို့ ကေအဲန်ယူရဲ့ ထုတ်ပြန်ချက်အရ သိရပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)