အာဏာသိမ်းစစ်ကောင်စီက ကျင်းပမယ့် ၂၀၂၃ ရွေးကောက်ပွဲကို နိုင်ငံရေး ၊စစ်ရေးနည်းလမ်းနှစ်သွယ်နဲ့ ချဖျက်နိုင်အောင် လုပ်ဆောင်ရမယ်လို့ NUG ယာယီသမ္မတ ဒူးဝါလရှီလက ပြောလိုက်ပါတယ်။
ဇွန်လ ၁၄ ရက်က ကျင်းပတဲ့ NUG အစိုးရအဖွဲ့အစည်းအဝေးမှာ ယာယီသမ္မတက အစိုးရအဖွဲ့ဝင်တွေအားလုံးကိုအသိပေးလိုက်တာဖြစ်ပါတယ်။
စစ်ကောင်စီဟာရွေးကောက်ပွဲကိုလိမ်ညာပြီး ကျင်းပလိမ့်မှာဖြစ်ပြီး ဒါကိုချေဖျက်ဖို့ ကာကွယ်ရေးဝန်ကြီးဌာနတင်မကဘဲ NUG အစိုးရ ဌာနဆိုင်ရာအားလုံးနဲ့သက်ဆိုင်တယ်လို့ ယာယီသမ္မတက ပြောပါတယ်။
ဒါအပြင်ရွေးကောက်ပွဲကိုချေဖျက်ဖို့အတွက် လူထုကိုလည်း အသိပေးရမယ်လို့ ဆိုပါတယ်။
“လူထုကိုအသိ ပေးရမယ်၊ အားပေးရမှာဖြစ်တယ်” လို့ ယာယီသမ္မတ ဒူဝါလရှီးလက ပြောပါတယ်။
စစ်ကောင်စီဟာ လာမယ့် ၂၀၂၃ ခုနှစ်သြဂုတ်လအတွင်း ရွေးကောက်ပွဲကျင်းပဖို့စီစဉ်ထားတာပါ။ ရွေးကောက်ပွဲကို နိုင်ငံလုံးအတိုင်းအတာနဲ့ ကျင်းပမယ်လို့လည်း စစ်ကောင်စီပြောရေးဆိုခွင့်ရှိသူကပြောထားပါတယ်။
မြေပြင်မှာလည်း မဲစာရင်းပြုစုတာတွေ ၊ လူဦးရေ စာရင်းကောက်တာတွေကို စစ်ကောင်စီက တပြိုင်တည်းပြုလုပ်နေပါတယ်။
ဒါပေမယ့်ဒီရွေးကောက်ပွဲကို အမေရိကန်အစိုးရဟာ ထောက်ခံမှာမဟုတ်သလို လွတ်လပ်ပြီး တရားမျှတတဲ့ ရွေးကောက်ပွဲလည်းဖြစ်လာမှာမဟုတ်ကြောင်း ပြီးခဲ့တဲ့ရက်ပိုင်းကအရှေ့တောင်အာရှကိုလာရောက်ခဲ့တဲ့ အမေရိကန် နိုင်ငံခြားရေးဝန်ကြီးဌာနအတိုင်ပင်ခံပုဂ္ဂိုလ် ဒဲရစ်ချောလက်က ပြောထားပါတယ်။
ရွေးကောက်ပွဲဟာ အဖက်ဖက်က အကျပ်အတည်းနဲ့ကြုံတွေ့နေရတဲ့ စစ်ကောင်စီအတွက် ထွက်ပေါက်သာဖြစ်တယ်လို့ သပိတ်ကော်မတီတွေအပါအဝင် အဖွဲ့အစည်း ၃၀ ကျော်က လည်း ပြီးခဲ့တဲ့ရက်ပိုင်းက သဘောထားကြေညာချက်တစ်စောင် ထုတ်ပြီးထောက်ပြထားပါတယ်။
ရွေးကောက်ပွဲဟာ ၂၀၀၈ အခြေခံဥပဒေအတိုင်းကျင်းပမှာဖြစ်တဲ့အတွက် စစ်အာဏာရှင်အဓွန့်ရှည်ရေးအတွက်သာဖြစ်ပြီး ၂၀၀၈ အခြေခံဥပဒေကိုဖျက်သိမ်းမယ့် နွေဦးတော်လှန်ရေးအင်အားစုတွေရဲ့ရည်မှန်းချက်နဲ့ ဆန့်ကျင်ဖက်ဖြစ်တယ်လို့ဆိုထားကြပါတယ်။
ဒါကြောင့်ရွေးကောက်ပွဲကိုဆန့်ကျင်ကြဖို့ကိုလည်းတိုက်တွန်းထားကြတာတွေ့ရပါတယ်။
ဓာတ်ပုံ − AFP
