အခုတစ်ပတ်အတွင်း ဘင်္ဂလားပင်လယ်အော်တစ်ခုလုံးမှာ မုတ်သုံလေအားကောင်းနိုင်တဲ့အတွက် ရခိုင်ကမ်းရိုးတန်း၊ ချင်းပြည်နယ်နဲ့ မြန်မာနိုင်ငံအထက်ပိုင်းဒေသ(စစ်ကိုင်းတိုင်းအထက်ပိုင်း၊ ကချင်ပြည်နယ်)တွေမှာ မိုးသည်ထန်နိုင်ပြီး ဧရာ၀တီ၊ ချင်းတွင်းနဲ့ သံလွင်မြစ်ရေတွေ မြင့်တက်လာနိုင်တယ်လို့ NUG ရဲ့ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာစီမံခန့်ခွဲရေး ဝန်ကြီးဌာနက ခန့်မှန်းထားပါတယ်။
အခုတစ်ပတ် ဇွန် ၂၀ ကနေ ၂၆ ရက်အတွင်း မုတ်သုံလေအင်အားဟာ ဘင်္ဂလားပင်လယ်အော်တစ်ခုလုံးမှာ အားကောင်းလာနိုင်ပြီး ကပ္ပလီပင်လယ်ပြင်မှာတော့ အားအသင့်အတင့်ရှိနိုင်တယ်လို့ ခန့်မှန်းထားတာပါ။
မြန်မာနိုင်ငံအလယ်ပိုင်းဒေသတွေမှတော့ာ ရက်ခြားမိုးတွေ ဆက်လက်ရနိုင်ပြီး နေပြည်တော်၊ မကွေးတိုင်းတွေမှာ နေရာကွက်မိုးကြီးနိုင်ပြီး အထူးသဖြင့် ရခိုင်ပြည်နယ်၊ စစ်ကိုင်းတိုင်းအထက်ပိုင်းနဲ့ မွန်ပြည်နယ်ဒေသတချို့တွေမှာ နေရာကွက်မိုးကြီးနိုင်တယ်လို့ ခန့်မှန်းချက်မှာဖော်ပြထားပါတယ်။
စစ်ကောင်စီရဲ့ မိုးဇလဌာနရဲ့ခန့်မှန်းချက်အရ ကချင်ပြည်နယ် ဗန်းမော်မြို့မှာ ဧရာ၀တီမြစ်ရေဟာ မြို့ရဲ့စိုးရိမ်ရေမှတ်အောက် ၂ ပေခွဲခန့်ရောက်ရှိနေပြီး အဆိုပါမြစ်ရေဟာ နောက်နှစ်ရက်အတွင်း စိုးရိမ်ရေမှတ်ကိုရောက်ရှိနိုင်တယ်လို့ မနေ့က ခန့်မှန်းထားကာ ဒီကနေ့ထပ်မံတိုင်းထွာချက်အရ ဧရာ၀တီမြစ်ရေဟာ စိုးရိမ်ရေမှတ်ကိုရောက်ရှိဖို့ ၁ ပေကျော်ကျော်သာလိုတော့တာဖြစ်ပါတယ်။
လတ်တလောမှာတော့ ဧရာ၀တီမြစ်ရေတက်လာလို့ ကချင်ပြည်နယ် ဗန်းမော်မြို့နဲ့ ရွှေကူမြို့က အနိမ့်ပိုင်းရပ်ကွက်တွေမှာ မြစ်ရေဝင်ရောက်နေပြီး ရေဘေးသင့်သူပြည်သူလူထုတွေကို မီးသတ်နဲ့ ကူညီကယ်ဆယ်ရေးအဖွဲ့တွေက ရေဘေးလွတ်ရာကိုရွှေ့ပြောင်းပေးခဲ့ရတယ်လို့ သိရပါတယ်။
