ပြည်သူ့ခုခံတွန်းလှန်စစ်ကြေညာအပြီး ၁နှစ်နီးပါးရှိလာချိန်တွင် အကြမ်းဖက်စစ်ကောင်စီကို တိုက်ခိုက်သိမ်းပိုက်သည့်စစ်ပွဲများ မကြာခင်ကာလအတွင်းဖြစ်လာမည်ဟု NUGသတင်းပြန်ကြားရေးတာဝန်ရှိသူတစ်ဦးက ပြောကြားသည်။
ယနေ့ပြုလုပ်သော အမျိုးသားညီညွတ်ရေးအစိုးရ၏ သတင်းစာရှင်းလင်းပွဲတွင် ယင်းသို့ထည့်သွင်းပြောကြားခြင်းဖြစ်ပြီး စစ်ရေးကိစ္စဖြစ်၍ အသေးစိတ်ပြောကြားနိုင်ခြင်းမရှိဟု သတင်းပြန် ကြားရေးအဖွဲ့ရုံးမှ ဦးနေဘုန်းလတ်က ပြောသည်။
“PDF တွေရဲ့ ဖြစ်ပေါ်တိုးတက်ပြောင်းလဲမှုတွေထဲမှာ readiness ပေါ့။ အရေးကြီးဆုံးက readiness အဆင်သင့်ဖြစ်မှုက ပထမအဆင့်သွားရမှာပါ။ အဆင်သင့်ဖြစ်မှုပြီးမှသာ ဒုတိယ အဆင့်အနေနဲ့ ခုခံတွန်းလှန်စစ်ကနေ တိုက်ခိုက်သိမ်းပိုက်တဲ့စစ်ပွဲပုံစံမျိုးပြောင်းရမှာပေါ့။ အဲဒီအဆင့်ကိုပြောင်းဖို့ အဆင်သင့်ဖြစ်နေပြီဆိုတာလောက်တော့ ဒီနေရာမှာ ထုတ်ဖော်ပြောဆိုလို့ ရပါတယ်။ ဘယ်အချိန်မှာလာမှာလဲဆိုတာကတော့ စစ်ရေးကိစ္စတွေဖြစ်တဲ့အတွက် ဒါတွေကို ထုတ်ဖော်ပြောဆိုလို့မရဘူး။ ဒါပေမဲ့ အဆင်သင့်ဖြစ်နေပြီးတော့ ဒီကိစ္စ(တိုက်စစ်)တွေ မကြာခင် ဖြစ်လာဖို့ရှိတယ်ဆိုတာလေးတော့ ဖြေချင်ပါတယ်”ဟု ၎င်းက ဆိုသည်။
ပြီးခဲ့သည့် NUG အစိုးရအဖွဲ့အစည်းအဝေးတွင် ယာယီသမ္မတ ဒူဝါလရှီးလက တော်လှန်ရေးကို နောက်တဆင့်တက်ကာ ရန်သူကို ခြေမှုန်းသိမ်းပိုက်နိုင်ရေး ပြင်ဆင်ရန် လမ်းညွှန်ခဲ့သည်။
လက်ရှိတွင် NUG ကာကွယ်ရေးဝန်ကြီးဌာနလက်အောက်ရှိ ပြည်သူ့ကာကွယ်ရေးတပ်ဖွဲ့(PDF) တပ်ရင်းပေါင်း ၂၅၇ ခု၊ ကာကွယ်ရေးဝန်ကြီးဌာနနှင့် ချိတ်ဆက်ပါဝင်နေသော ဒေသခံကာကွယ်ရေးတပ်ဖွဲ့(LPDF) ၅၀၀ ခန့်ရှိလာပြီဟု ယာယီသမ္မတ ဒူဝါလရှီးလက ပြောဆိုထားသည်။
