မကွေးတိုင်း၊ ဆိပ်ဖြူမြို့နယ် ရှားလှကျေးရွာတွင် အကြမ်းဖက်စစ်တပ် ဝင်ရောက်ဖျက်ဆီးမှုများပြုလုပ်ပြီး စိတ်ကျန်းမာရေးမကောင်းသူ အမျိုးသားတစ်ဦးအား သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့(ဇွန်လ၂၃ရက်)က ဆိပ်ဖြူမြို့နယ်၊ ရှားလှကျေးရွာ ဘုရားကုန်းတွင် အင်အား ၂၀၀ ဝန်းကျင်ရှိ အကြမ်းဖက်စစ်တပ် တပ်စွဲပြီး အနီးနားပတ်ဝန်းကျင်အား စစ်ကြောင်းထိုး ရှာဖွေမှုများပြုလုပ်ခဲ့သည်။
![ရှားလှကျေးရွာတွင် အကြမ်းဖက်စစ်တပ်ဖျက်ဆီးသွားပြီးနောက် တွေ့ရစဥ်။ဓာတ်ပုံ - We Love Seik Phyu Group](https://i0.wp.com/www.ludunwayoo.com/wp-content/uploads/2022/06/288667145_409162301273228_5015582515016146916_n.png?resize=720%2C782&ssl=1)
၎င်းစစ်ကြောင်းနှင့် နယ်ခံရွာသားတစ်ဦးသည် ရှားလှကျေးရွာနှင့် တောင်ချိုရွာကြားတွင် တည့်တည့်တိုးပြီး စစ်ဆေးမေးမြန်းမှုများပြုလုပ်စဉ် ဦးခေါင်းရိုက်ခွဲ အသတ်ခံရခြင်းဖြစ်ကြောင်း၊ အသက်ခံရသူမှာ အသက်၄၀ကျော် ဦးလှိုင်မြင့်ဆိုသူဖြစ်ပြီး ၎င်းမှာ စိတ်ကျန်းမာရေးမကောင်းသူတစ်ဦးဟု သိရကြောင်း ဒေသခံများက ပြောသည်။
အကြမ်းဖက်စစ်တပ်သည် ရှားလှကျေးရွာကိုလည်း ဝင်ရောက်၍ နေအိမ်များရှိ အဖိုးတန်ပစ္စည်းများအား ယူဆောင်ခြင်း၊ အိမ်အသုံးအဆောင်ပစ္စည်းများရိုက်ချိုးခြင်းများ ပြုလုပ်သွားကြောင်း၊ ထို့အပြင် အနီးနားရှိ ကင်းမကျေးရွာမှ ထွက်ပြေးတိမ်းရှောင်လာသူများ၏ ရွှေထည်အချို့နှင့် ငွေသားများကိုပါ ယူဆောင်သွားကြောင်း ဒေသခံများက ပြောသည်။
![ရှားလှကျေးရွာတွင် အကြမ်းဖက်စစ်တပ်ဖျက်ဆီးသွားပြီးနောက် တွေ့ရစဥ်။ဓာတ်ပုံ - We Love Seik Phyu Group](https://i0.wp.com/www.ludunwayoo.com/wp-content/uploads/2022/06/289981149_409162384606553_9185008604798963688_n.png?resize=720%2C739&ssl=1)
“ဒီကနေ့မနက်ပိုင်းမှာ ပြန်ထွက်သွားပေမဲ့ ရွာသူရွာသားများ နေရပ်မပြန်ရဲသေးဘူးလို့သိရပါတယ်။”ဟု ဒေသခံတစ်ဦးက ပြောသည်။
ပြီးခဲ့သည့် ဧပြီ ၁၁ ရက်ကလည်း အကြမ်းဖက်စစ်တပ်သည် ဆိပ်ဖြူမြို့နယ် ရှားလှကျေးရွာမှပြည်သူများ၏ နေအိမ်များကို မီးရှို့ဖျက်ဆီးခဲ့ရာ နေအိမ် ၂၃လုံးနှင့် ဆန်၊ စပါး ၊ ကြက်သွန် အစရှိသည့်သီးနှံများပါ ပျက်စီးဆုံးရှုံးခဲ့ရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)