ကျိုက်ထိုမြို့နယ်အတွင်း လမ်းတွေပေါ်မှာ ခရီးသွားလာနေကြတဲ့ ပြည်သူလူထုတွေအနေနဲ့ စစ်ကောင်စီရဲ့ မော်တော်ယာဉ်တန်းတွေနဲ့ အနီးကပ်သွားလာတာမျိုး အထူးရှောင်ကြဉ်ကြဖို့ ပြည်သူ့ကာကွယ်ရေးတပ်မတော် တပ်ရင်း-၃ သထုံခရိုင်က ဒီကနေ့မှာ သတင်းထုတ်ပြန်ထားပါတယ်။
ပြည်သူ့ကာကွယ်ရေးတပ်ဖွဲ့အနေနဲ့ စစ်ကောင်စီတပ်တွေရဲ့ စစ်ရေးလှုပ်ရှားမှုတွေကို ကန့်သတ်ဖို့နဲ့ နယ်မြေစိုးမိုးမှုတည်ဆောက်ဖို့ အရှိန်အဟုန်မြင့် ဆောင်ရွက်သွားတော့မှာဖြစ်တဲ့အတွက် ကျိုက်ထိုမြို့နယ်ရှိ လမ်းမတွေပေါ်မှာ သွားလာကျမယ့် ခရီးသွားပြည်သူတွေအနေနဲ့ မနက် ၆ ည ၈ အတွင်း ခရီးသွားလာစဉ် စစ်ကောင်စီရဲ့ မော်တော်ယာဉ်များနဲ့ အနီးကပ်သွားလာတာမျိုးကို အထူးရှောင်ကျဉ်ကြဖို့ ပြည်သူ့ကာကွယ်ရေးတပ်မတော် တပ်ရင်း-၃ က တိုက်တွန်းထားတာပါ။
ဒါ့အပြင် ည ၈ နာရီနောက်ပိုင်းမှာ အရေးပေါ်ကျန်းမာရေးကိစ္စနဲ့ သွားလာရမယ်ဆိုပါက လူနာတင်ယာဉ်ကို မီးတန်းဖွင့် အသံဖွင့်ပြီး သွားလာကျဖို့ ည ၈နာရီနောက်ပိုင်း သေရေးရှင်ရေးမဟုတ်ပါက အပြင်မထွက်ကြဖို့ ပြည်သူ့ကာကွယ်ရေးတပ်မတော် တပ်ရင်း-၃ က မေတ္တာရပ်ခံထားပါတယ်။
အထက်ပါ သတိပေးချက်တွေကို လိုက်နာခြင်းမရှိပါက ထိခိုက်မှု တစ်စုံတစ်ရာရှိလာပါက ပြည်သူ့ကာကွယ်ရေးတပ်မတော် တပ်ရင်း-၃ အနေနဲ့ တာ၀န်ယူပေးနိုင်မှာမဟုတ်ဘူးလို့ ကြိုတင်အသိပေးကြောင်း ထုတ်ပြန်ထားချက်အရ သိရပါတယ်။
ကေအဲန်ယူ-ကရင်အမျိုးသားအစည်းအရုံး ဒူးသထူ(သထုံ)ခရိုင် တပ်မဟာ ၁ နယ်မြေ ကျိုက်ထိုမြို့နယ်အတွင်းမှာ စစ်ကောင်စီတပ်နဲ့ KNLA ပူးပေါင်းတပ်ဖွဲ့တို့အကြား ထိတွေ့ပစ်ခတ်မှုတွေ မကြာခဏ ဖြစ်ပွားနေတာဖြစ်ပါတယ်။
