▪️ပြည်သူကိုအနိုင်ကျင့်သည့် ယုတ်ညံ့သောလုပ်ရပ်အဖြစ် ခရမ်းPDF ရှုံ့ချ
ရန်ကုန်တိုင်း ခရမ်းမြို့နယ် အိုးဝကျေးရွာတွင် လူတစ်စုက လက်နက်များကိုင်ဆောင်ပြီး ပြည်သူတစ်ဦး၏ နေအိမ်ကို ဓားပြတိုက်သွားကြောင်း PDF – Khayan က အသိပေးထုတ်ပြန်သည်။
ယမန်နေ့(ဇွန် ၂၅)နံနက် ၁ နာရီခန့်က အိုးဝကျေးရွာမှ နေအိမ်တစ်အိမ်သို့ လက်နက်များကိုင်ဆောင်ထားသောလူတစ်စုမှ ဝင်ရောက်ကာ အိမ်ရှင်များကို လက်ပြန်ကြိုး တုပ်ပြီး ဓားပြတိုက်သွားခြင်းဖြစ်ကြောင်း ဖော်ပြသည်။
အဆိုပါဖြစ်စဥ်တွင် အိမ်ရှင်များထံမှ ကျပ်သိန်း ၇၀ ကျော်နှင့် ရွှေခြောက်ကျပ်သားကျော်တို့ကို လက်နက် ကိုင်လူတစ်စုက ဓားပြတိုက်ယူဆောင်သွားသည်ဟု ဆိုသည်။
“ထိုသို့ ပြည်သူ့အိုးအိမ်စည်းစိမ်ကို မတရားအ နိုင်ကျင့်သည့် ယုတ်ညံ့သောလုပ်ရပ်ကို ကျွန်ုပ်တို့မှ ပြင်းထန်စွာရှုံ့ချပါသည်”ဟု PDF – Khayan က ဖော်ပြသည်။
ထို့အပြင် ယခုကဲ့သို့ လက်နက်များဖြင့် ပြည်သူကိုဓားပြတိုက်သွားခြင်းသည် ပြည်သူ့ဘက်မှရပ်တည်ကာကွယ်နေသော ပြည်သူ့ကာကွယ် ရေးတပ်များ၏ တော်လှန်ရေးပုံရိပ်ကို ပုံဖျက်ရန် ကြိုးပမ်းမှုတစ်ရပ်အဖြစ်ယူဆသည်ဟု ဆို သည်။
“စစ်ခွေးများ၏ မြို့နယ်ပြည်သူလူထုနှင့် ပြည်သူ့ကာကွယ်ရေးတပ်ဖွဲ့များကြား အထင်အမြင်လွဲမှားစေရန် လုပ်ကြံမှုတစ်ရပ်လည်း ဖြစ်ပေါ် သည်”ဟု အသိပေးသည်။
ထို့ကြောင့် ယခုလိုဓားပြတိုက်သွားသော လူရမ်းကားများကို စုံစမ်းနေပြီး ပြင်းထန်စွာတုန့်ပြန်သွားမည်ဖြစ်ကြောင်း PDF – Khayanက သတိပေးထားသည်။
