ဧရာဝတီတိုင်း ကနောင်မြို့တွင် စစ်ကောင်စီနောက်လိုက် ရဲတပ်ဖွဲ့ဝင်များကို ပြည်သူ့ကာကွယ်ရေးတပ်ဖွဲ့က ယနေ့ နံနက် တိုက်ခိုက်ခဲ့သည်။
ယနေ့(ဇွန် ၂၉ရက်) နံနက် ၉နာရီခန့်တွင် ကနောင်မြို့၊အမှတ်(၂)ရပ်ကွက်အတွင်း သွားလာနေသည့် ရဲတစ်ဦးကို သေနတ်ဖြင့် ပစ်ခတ်ခဲ့ရာ ဒဏ်ရာများဖြင့် ထွက်ပြေးလွတ်မြောက်သွားကြောင်း Red Dragon Revolution Force (နဂါးနီတော်လှန်ရေးတပ်ဖွဲ့)က ထုတ်ပြန်သည်။
ထို့နောက် ကနောင်ရဲစခန်းရှေ့မှ ရဲတစ်ဦးကို လက်ပစ်ဗုံးဖြင့်ပစ်ရန် ပြင်ဆင်နေချိန် ရဲမိသားစုဝင်တစ်ဦးက မြင်သွား၍ ဆုတ်ခွာခဲ့စဥ် အပြန်အလှန်ပစ်ခတ်မှုဖြစ်ခဲ့သည်ဟု ဆိုသည်။
“ဆိုင်ကယ်နဲ့ သွားရင်းကနေ Mission ကိုအကောင် အထည်ဖော်တာ။ အခက်အခဲတွေတော့ ရှိခဲ့တယ်။ပြည်သူ့ရဲဘော်တွေလည်း အန္တရာယ်ကင်းပါတယ်” ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
လတ်တလောဒေသတွင်း အခြေအနေနှင့်ပတ်သက်၍ လူထုထံ သတိပေးချက်တစ်ခုကိုလည်း နဂါးနီတော်လှန် ရေးတပ်ဖွဲ့က ထုတ်ပြန်ထားသည်။
ပြည်သူလူထုများအနေဖြင့် ယနေ့မှစ၍ မည်သည့်စစ်ကောင်စီစခန်း၊ဌာနများအနီးမနေရန်နှင့် မည်သည့်နေရာမှမဆို ပေါက်ကွဲသံ၊ပစ်ခတ်သံများ ထွက်ပေါ်လာပါက စူးစမ်းလိုစိတ်ဖြင့် ထွက်လာကြည့်ခြင်း၊စုံစမ်းကြည့်ရှုရန် စုဝေးရောက်ရှိလာခြင်းများ (နောက်ဆက်တွဲများပေါက်ကွဲပါက ထိခိုက်မည်ဟုစိုးရိမ်ပါ၍)ရှောင်ရှားကြပါရန်နှင့် တော်လှန်ရေးအဖွဲ့ဝင်ရဲဘော်များအား တွေ့ရှိပါက တတ်နိုင်သမျှကူညီပေးကြပါရန်အထူး(အထူး) မေတ္တာရပ်ခံအပ်ပါသည်ဟု ထုတ်ပြန်ထားသည်။
ဧရာဝတီတိုင်းတွင် ဇွန်လဆန်းပိုင်းကစတင်၍ ပြည်သူ့ကာကွယ်ရေးတပ်များက စစ်ကောင်စီကို တိုက်ခိုက်မှု အရှိန်မြင့်လာသည်။
