ပြည်တွင်းငွေကြေးဈေးကွက်အတွင်း ဒေါ်လာအဝယ်လိုက်လာပြီး တစ်ဒေါ်လာကို ၂၁၃၀ကျပ်အထိမြင့်တက်လာကြောင်း ငွေလဲလုပ်ငန်းဆောင်ရွက်နေသူများကပြောသည်။
ဈေးကွက်အတွင်း ဒေါ်လာရောင်းချသူနည်းနေသော်လည်း ဝယ်လက်များမှာ ဒေါ်လာငွေသားကို ရသမျှ လိုက်လံဝယ်ယူနေသူများရှိကြောင်းငွေလဲကောင်တာပိုင်ရှင်များထံမှသိရသည်။
“မြို့ပြတော်လှန်ရေး အရှိန်မြင့်ဘာညာပြောနေကြတော့ စစ်တပ်အသိုင်းအဝိုင်းက လူတွေ ဒေါ်လာလိုက်ဝယ်နေကြတာ။ဒေါ်လာဈေးတက်နေပေ့မယ်လဲ ဝယ်လက်တွေက ရသလောက်လိုက်ဝယ်နေတယ်”ဟု ငွေလဲလုပ်ငန်းဆောင်ရွက်နေသူတစ်ဦးကပြောသည်။
အာဏာသိမ်းစစ်ကောင်စီဆန်ကျင်သူများက မြို့ပြတော်လှန်ရေးအရှိန်မြှင့်မည်ပြောကြားမှုများမှာ စစ်တပ်အသိုင်းအဝိုင်ယအထူးသဖြင့် စစ်တပ်အတွင်းငွေကြေးတက်နိုင်သောအရာရှိများ၏မိသားစုကိုစိုးရိမ်စိတ်တိုးစေပြီး ဒေါ်လာများဝယ်စုကြခြင်းမှာ ပြည်ပသို့ မိသားစုဝင်များ ၊ဆွေးမျိုးများကို ပို့ရန်စီစဥ်နေခြင်းကြောင့်ဖြစ်နိုင်ကြောင်းစီးပွားရေးလုပ်ငန်းရှင်တစ်ဦးကပြောသည်။ ဇူလိုင် ၁ ရက်မှစ၍မြိ့ပြတော်လှန်ရေးအရှိန်မြှင့်မည်ဟု သတင်းများထွက်ပေါ်နေခြင်းဖြစ်သည်။
ဒေါ်လာဝယ်လိုအားများလာသောကြောင့်လက်ရှိမှောင်ခိုဈေးကွက်တွင် ဒေါ်လာရောင်းချသူများသည် ကြိုက်ဈေးခေါ်ယူရောင်းချနေပြီး ဝယ်လက်များကလည်း အဝယ်လိုက်နေသည်ဟု ၎င်းကဆိုသည်။
စစ်ကောင်စီက တစ်ဒေါ်လာကို ၁၈၅၀ကျပ်သတ်မှတ်ထားသော်လည်း မှောင်ခိုဈေးကွက်တွင် တစ်ဒေါ်လာကို ၂၁၀၀ ကျပ်မှ ၂၁၃၀ ကျပ်အထိ ပေါက်ဈေးရှိနေသည်ဟု ငွေလဲကောင်တာပိုင်ရှင်များကပြောသည်။
‘နေ့လယ်က ၂၁၁၇ကျပ်နဲ့ ငွေလဲကောင်တာမှာ ပေးတယ်။ညနေပိုင်းမှာတော့ ၂၁၃၀ကျပ်အထိဖြစ်သွားတာ။ဈေးက ဆက်တက်ကြမယ်ထင်တယ်”ဟု ဒေါ်လာရောင်းချခဲ့သူတစ်ဦးကပြောသည်။
ယခုဇွန်လလယ်မှာ စတင်ပြီး ဒေါ်လာဈေးမှာ တစ်ဒေါ်ကို ၂၁၀၀အထိမြင့်တက်လာခြင်းဖြစ်သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)