ကရင်နီ(ကယား)ပြည်နယ် လွိုင်ကော် – လောပိတလမ်း၌ ယနေ့ တိုက်ပွဲဖြစ်ပွားခဲ့ရာ စစ်ကောင်စီတပ်မှ အရာရှိအပါအဝင် လေးဦးသေဆုံးခဲ့ကြောင်း ကရင်နီအမျိုးသားများကာကွယ်ရေးတပ်(KNDF)က ထုတ်ပြန်သည်။
ယနေ့ (ဇွန်လ ၃၀)နံနက်ပိုင်း၌ လွိုင်ကော် – လောပိတလမ်းမကြီးပေါ်တွင် KNDF တပ်ရင်း အမှတ်(၁၀)မှ ကင်းလှည့်လှုပ်ရှားမှုပြုလုပ်နေစဉ် စစ်ကောင်စီ ၏ တပ်ရိက္ခာသယ်ပို့သည့် ယာဉ်တစ်စီးနှင့်ထိပ်တိုက်တွေ့ကာ တိုက်ပွဲဖြစ်ခဲ့သည်ဟု ဆိုသည်။
ထိတွေ့ပစ်ခတ်တိုက်ခိုက်မှုမှ မိနစ် ၂၀ခန့် ကြာမြင့်ခဲ့ပြီး စစ်ကောင်စီ၏ ယာဉ်ပေါ်ပါ တပ်ရေးဗိုလ်ကြီးတစ်ဦး၊ တပ်ကြပ်ကြီးတစ်ဦးနှင့် တပ်သားနှစ်ဦး စုစုပေါင်း လေးဦးကို ပစ်ခတ်ရှင်းလင်းနိုင်ခဲ့သည်ဟု ဖော်ပြသည်။
![ဓာတ်ပုံ - KNDF](https://i0.wp.com/www.ludunwayoo.com/wp-content/uploads/2022/06/290432206_413680880821370_1972145862540434456_n.jpg?resize=880%2C639&ssl=1)
ထို့ပြင် တပ်ရေးဗိုလ်ကြီး ကိုင်ဆောင်သော (၉)မမပစ္စတိုသေနတ်(၁)လတ် ၊ ကျည် (၁၂)တောင့် နှင့် ဖုန်း (၂)လုံးတို့ကို သိမ်းဆည်းရမိခဲ့ကြောင်း KNDFက ထုတ်ပြန်ခဲ့သည်။ တိုက်ပွဲအတွင်း KNDFမှ ထိခိုက်ဒဏ်ရာရမှုမရှိဘဲ ပြန်လည်ဆုတ်ခွာနိုင်ခဲ့ကြောင်း ဖော်ပြထားသည်။
![Public Service Announcement](https://i0.wp.com/www.ludunwayoo.com/wp-content/uploads/2022/01/PSA_inside_Story_Jan22-03.jpg?resize=880%2C229&ssl=1)
စစ်ကောင်စီတပ်အနေဖြင့် ၎င်းတို့၏ လောပိတအခြေစိုက် အမှတ်(၇၂) တပ်ရင်းမှ တိုက်ပွဲဖြစ်ပွားရာအနီးရှိ ကျေးရွာများဖက်သို့ လက်နက်ကြီးများ ရမ်းသမ်းပစ်ခက်ခဲ့ရာ လေးအိမ်စုရွာအတွင်း လက်နက်ကြီးကျရောက်၍ နေအိမ်တစ်လုံးပါ ထိခိုက်ပျက်ဆီးခဲ့ကြောင်း ထုတ်ပြန်သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)