ထိုင်းပိုင်နက်သို့ကျူးကျော်ဝင်ရောက်မှုအတွက် စစ်ကောင်စီလေတပ်ချုပ်က ထိုင်းလေတပ်ချုပ်ကို တောင်းပန်ခဲ့ရပြီး အလားတူဖြစ်စဉ်မျိုး ထပ်မံမပေါ်ပေါက်ရန် ပြောဆိုခဲ့ရသည်ဟု Bangkok Post သတင်းဌာနက ဖော်ပြသည်။
ထိုင်းဝန်ကြီးချုပ်၊ ကာကွယ်ရေးဝန်ကြီးလည်းဖြစ်သူပရာယွက်ချန်အိုချာက စစ်ကောင်စီလေတပ်၏ ပိုင်နက်ကျူးကျော်မှုနှင့်ပတ်သက်၍ ၎င်း၏ လေတပ်ချုပ်နှင့် စကားပြောဆိုခဲ့ပြီး နိုင်ငံခြားရေးဝန်ကြီးဌာန၊ ရန်ကုန်ရှိ လေတပ်စစ်သံမှူးတို့မှတဆင့် ကန့်ကွက်ရန် ညွှန်ကြားခဲ့သည်ဟုဆိုသည်။
မြ၀တီခရိုင်ရှိ ဥကရစ်ထစခန်းတိုက်ပွဲတွင် စခန်းမကျဆုံးစေရန် အထိနာနေသောစစ်ကောင်စီတပ်က လေကြောင်းနှင့် လက်နက်ကြီးများဖြင့် အင်အားများစွာသုံးတိုက်ခိုက်စဉ် ထိုင်း ပိုင်နက်သို့ စစ်ကောင်စီ၏ MIG -29 တိုက်လေယာဥ်သည် ဇွန် ၃၀ နံနက်မြန်မာအချိန် ၁၀ နာရီ ၄၀ မိနစ်တွင်ထိုင်းနိုင်ငံပိုင်နက်အတွင် ၄၊၅ ကီလိုမီတာရောက်သည်အထိ့ ကျူးကျော်ခဲ့ခြင်းဖြစ်သည်။
![ထိုင်းနိုင်ငံဘက်သို့ထွက်ပြေးတိမ်းရှောင်လာသောစစ်ဘေးဒုက္ခသည်များ ။ ဓါတ်ပုံ-Assawin Pinitwong](https://i0.wp.com/www.ludunwayoo.com/wp-content/uploads/2022/07/291698995_413772777478847_5539518203284500191_n.jpg?resize=880%2C586&ssl=1)
![ထိုင်းနိုင်ငံဘက်ခြမ်းသို့ထွက်ပြေးတိမ်းရှောင်လာသောစစ်ဘေးဒုက္ခသည်များနှင့် ထိုင်းလုံခြုံရေးတပ်ဖွဲ့ဝင်အချို့ ။ ဓါတ်ပုံ- Assawin Pinitwong](https://i0.wp.com/www.ludunwayoo.com/wp-content/uploads/2022/07/290746421_413772577478867_7265478348474451818_n.jpg?resize=880%2C660&ssl=1)
ထို့အတွက်လည်း ထိုင်းလေတပ်က F-16 တိုက်လေယာဉ်နှစ်စီးပျံတက်စေကာ ၎င်းတို့၏ ပိုင်နက်လုံခြုံရေးအတွက် ကင်းလှည့်ခဲ့ရသည်။
အကြမ်းဖက်စစ်ကောင်စီတပ်နှင့် KNLA ၊ KNDO ပူးပေါင်းတပ်ဖွဲ့များ အကြား ဥကရစ်ထစခန်းအတွက် အပြင်းအထန် တိုက်ပွဲဖြစ်ပွားနေသည်။
ထိုင်းနယ်စပ်ရှိ အသက် ၆၁ နှစ်အရွယ် အမျိုးသမီးတစ်ဦးက ထိုင်းဘက် ခြမ်းကျေးရွာ၌ ၎င်းနေထိုင်ခဲ့သည့် နှစ်ပေါင်း ၃၀ ကျော်ကာလအတွင်း ယခုကဲ့သို့လေကြောင်းတိုက်ခိုက်မှုနှင့် ဗုံးကြဲမှုများ အပြင်းအထန်ပြုလုပ်သည်မျိုး တစ်ကြိမ်မျှ မကြုံဖူးသေးကြောင်း ပြောသည်။
![လက်နက်ကြီးကျမည်စိုး၍ ပုံးခိုနေကြသော ထိုင်းနိုင်ငံနယ်စပ်ကျောင်းတစ်ကျောင်းမှ ကလေးငယ်များ။ ဓါတ်ပုံ-Assawin Pinitwong](https://i0.wp.com/www.ludunwayoo.com/wp-content/uploads/2022/07/291355362_413772707478854_2404797778827726053_n.jpg?resize=880%2C586&ssl=1)
ယင်းသို့ အကြမ်းဖက်စစ်ကောင်စီတပ်၏ လေကြောင်းပိုင်နက် ကျူးလွန်မှု၊ လက်နက်ကြီးတိုက်ခိုက်မှုများကြောင့် ထိုင်းဘက်ခြမ်းရှိ ဒေသခံများစွာ စိုးရိမ်ထိတ်လန့်နေရသည်ဟု ဆိုသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)