လုပ်အားခခေါင်းပုံဖြတ်မှုကြောင့် အလုပ်မဆင်းဘဲ သပိတ်မှောက်လျှက်ရှိသော Foodpanda အလုပ်သမားသပိတ်အား ထောက် ခံဝန်းရန်ပေးကြရန် ပြည်သူလူထုအား စစ်အာဏာရှင်စနစ်တိုက်ဖျက်ရေး အထွေထွေသပိတ်ကော်မတီ(GSC)က ပြည်သူလူထုအားယနေ့တိုက်တွန်းသည်။
ထိုသို့ထောက်ခံဝန်းရံကြရာတွင်Foodpandaဝန်ဆောင်မှုများအား အသုံးမပြုခြင်း၊ Foodpanda Application အား မိမိတို့၏ mobile devices များမှ အပြီးတိုင်ပယ်ဖျက်ရှင်းလင်းခြင်းတို့ လုပ်ဆောင်ပေးကြရန်GSCက ပန်ကြားသည်။
ယခုကဲ့သို့ အလုပ်မဆင်းသပိတ်တိုက်ပွဲပေါ် ပေါက်လာရခြင်းမှာ Foodpanda ကုမ္ပဏီ၏ အလုပ်သမားအခွင့်အရေးချိုးဖောက်မှုများ၊ လုပ်အားခခေါင်းပုံဖြတ်မှုများကြောင့်ဖြစ် ကြောင်းအလုပ်သမားများပြောဆိုမှုနှင့် မီဒီယာများ၏ ဖော်ပြချက်များအရ သိထားရသည်ဟုဖော်ပြထားသည်။
ဖောက်ပြန်ယုတ်မာသောအာဏာသိမ်းစစ်အုပ်စုလက်အောက်တွင် အလုပ်သမားထု၏ အခွင့်အရေးများ၊ ရပိုင်ခွင့်များအား ဥပဒေအရ ရရှိနိုင်ရန် မဖြစ်နိုင်သည့်ယခုအခြေအနေတွင် ကုမ္ပဏီဘက်မှ အလုပ်သမားများ၏ တရားသောတောင်းဆိုချက်များကို လက်လျူရှု့သည့်အပြင် ဦးဆောင်သူများအား အလုပ်ဖြုတ်ခြင်း၊ အလုက်သမားသစ်များခန့်အပ်ခြင်းစသည့်တုန့်ပြန်မှုများ လုပ်ဆောင်နေသည်ကို တွေ့ရသည်ဟု GSC က ထောက်ပြသည်။
လက်ရှိတွင် Foodpanda မှ ပို့ဆောင်ရေးအလုပ်သမားများက’စားသုံးသူ လုံးဝမရှိရေးလှုပ်ရှားမှု(Zero Customer Campaign)ပြုလုပ်လျှက်ရှိကြောင်း ထုတ်ပြန်ချက်တွင် ဖော်ပြ သည်။
ယခုဆင်နွှဲလျှက်ရှိသော နွေဦးတော်လှန်ရေးသည် ပြည်သူလူထုဦးဆောင်မှုဖြင့် ပေါ်ပေါက်လာခြင်းဖြစ်ပြီး လက်ရှိတွင်လည်း လူထု၏ပံ့ ပိုးစောင့်ရှောက်မှုကြောင့် ယခုထိခိုင်မာအား ကောင်းနေဆဲဖြစ်သည်ဟု GSC က ယုံကြည်ပြီးလက်ရှိ Foodpanda အလုပ်သမားများ၏ အလုပ်မဆင်းသပိတ်တိုက်ပွဲအောင်မြင်ရန်လည်း ပြည်သူများပူးပေါင်းပါဝင်ပေးကြပါရန် တိုက်တွန်းထားသည်။
Foodpanda မှပို့ဆောင်ရေးအလုပ်သမားများ၏ဒုတိယအကြိမ်မြောက် အလုပ်မဆင်းဘဲ သပိတ်မှောက်ထားသည်မှာ ဇူလိုင် ၆ ရက် (မနက်ဖြန်)တွင် တစ်လတင်းတင်းပြည်ပြီ ဖြစ်သည်။
