ကရင်နီ(ကယား)ပြည်နယ်၌ NUGPay ဖြင့်ငွေပေးချေနိုင်သော စစ်ရှောင် ပြည်သူများအတွက် ထောက်ပံ့မည့် ပထမဆုံးထမင်းဆိုင်ကို မကြာမီဖွင့်လှစ် မည်ဟု ဒေသခံသတင်းရင်းမြစ် Karen ni’s Voiceက ထုတ်ပြန်သည်။
အဆိုပါထမင်းဆိုင်မှာ ဒီးမော့ဆိုမြို့နယ် အနောက်ခြမ်းတွင် ဖွင့်လှစ်မည့်ဖြစ်ပြီး “ခင်ရာဆွေ”ဟု အမည်ပေးထားကြောင်း ဖော်ပြသည်။
“ဒီထမင်းဆိုင်မှာ စစ်ရှောင်ပြည်သူများကိုယ်တိုင်ပဲ လုပ်အားပေးအဖြစ် ဝိုင်းဝန်းရောင်းချကြမှာ ဖြစ်သလိုရရှိလာတဲ့ အကျိုးအမြတ်တွေကို လည်းဒေသတွင်းက စစ်ရှောင်ပြည်သူများကို ထောက်ပံ့နိုင်ရေးအတွက်ပဲ ပြန်လည်အသုံးပြုသွားမှာဖြစ်တယ်”ဟု ခင်ရာဆွေထမင်းဆိုင်ကို စီစဉ်သူတစ်ဦးက ပြောသည်။
“ခင်ရာဆွေ”ဆိုင်၌ မြန်မာထမင်းဟင်းများအပြင် ကြာဇံသုပ်၊ ခေါက်ဆွဲသုပ်၊ အမဲသားခြောက်၊ ဝက်သားကြော်နှင့်ဝက်သားတုတ်ထိုးများရရှိနိုင်မည် ဖြစ်ကြောင်း သိရသည်။
NUG Pay စတင်အသုံးပြုနိုင်ပြီးနောက် ကရင်နီဒေသအတွင်းရှိ တပ်ရင်းတပ်ဖွဲ့ အသီးသီးကလည်း ၎င်းတို့ထံသို့ NUG Pay ဖြင့် ထောက်ပံ့နိုင်ပြီဟု ကြေညာထားသည်။
