▪︎တာမွေဖြစ်စဥ်
တာမွေဖြစ်စဥ်မှာ ယနေ့(ဇူလိုင် ၁၂)နေ့လယ် ၁၁ နာရီခွဲခန့်က ဗညားဒလလမ်းပေါ် အောင်မဂ်လာလမ်းထိပ်နားတွင် မြို့ပြပြောက်ကျားအဖွဲ့များဖြစ်သော Yangon Liberation Force (YLF)နှင့် Urban Revolutionary Front (URF)တို့မှ စစ်ကောင်စီတပ်အားတိုက်ခိုက်ရန် ဗုံးထောင်ထားခဲ့သည်ဟု ယင်းအဖွဲ့များက အသိ ပေးသည်။
စစ်ကောင်စီတပ်အားတိုက်ခိုက်ရန် ထောင်ထားသည့်အဆိုပါဗုံးကို အမှိုက်ကောက်သည့်က လေးများကတွေ့သွားပြီးနောက် ရဲကသိရှိသွားကာ ဖောက်ခွဲလိုက်ခြင်းဖြစ်ကြောင်း YLF က ထုတ်ပြန်သည်။
![တာမွေတွင်စစ်ကောင်စီကတွေ့သော ဗုံးကိုခွဲရန်ပြင်နေစဥ် ဓါတ်ပုံ-CJ](https://i0.wp.com/www.ludunwayoo.com/wp-content/uploads/2022/07/293389278_421946113328180_8388957710810293851_n.jpg?resize=880%2C788&ssl=1)
“အသက် ၂၇ နဲ့ ၃၅ ကြားရှိမယ့် အမှိုက်ကောက်တဲ့ တစ်ယောက်က ကိုင်ကြည့်တယ်။ ဖွင့်ကြည့်တယ်။ ပြီးတော့ စက်ဘီးနဲ့ လူတစ်ယောက်ရောက်လာတယ် ။ အဲဒီလူက သတင်းပေးလို့ယူဆရတယ်။ သူကဖုန်းဆက်ပြီး ခေါ်လိုက်တာ ခွေးတွေကို”ဟု YLF မှ တာဝန်ရှိသူတစ်ဦးကပြောသည်။
ယင်းနေရာသည် စစ်ကောင်စီတပ်မှယာဥ်များ ရပ်လေ့ရှိသောနေရာတစ်ခုဖြစ်သော်လည်း ယ နေ့တွင် မဆိုင်သူများကလည်း လာရောက်ကြည့်ရှုခဲ့သောကြောင့် ပြည်သူများ ထိခိုက်မှုမရှိစေရန် ဗုံးအားမဖောက်ခွဲဘဲ မစ်ရှင်ဖျက်သိမ်းခဲ့ကြောင်း ၎င်းက ဆိုသည်။
အဆိုပါ မဖောက်ခွဲဘဲ ထားခဲ့သောဗုံးများကို စစ်ကောင်စီတပ်ဖွဲ့ဝင်များက ဖောက်ခွဲဖျက်ဆီးခဲ့ကြောင်း မင်္ဂလာတောင်ညွှန့်မြို့နယ်၌ နေထိုင်သူတစ်ဦးက ပြောသည်။
“ပထမတစ်လုံးက သဲအိတ်တွေနဲ့ ဖုံးပြီးဖောက်တာ။ နောက်တစ်လုံးကျ အမှိုက်ပုံးထဲတင် ဖောက်လိုက်တာဖြစ်မယ်”ဟု ၎င်းက ဆိုသည်။
▪︎လှိုင်သာယာဖြစ်စဥ်
လှိုင်သာယာဖြစ်စဥ်မှာ ယနေ့(ဇူလိုင် ၁၂)နေ့ လယ် ၂ နာရီခန့်က (၅)ထိပ်မှတ်တိုင်အနီးတွင် မိုင်းတစ်လုံးပေါက်ကွဲခဲ့ပြီး လူနှစ်ဦး အသေးစားဒဏ်ရာရသွားကြောင်း ယင်းနေရာအနီးတွင် နေသူတစ်ဦးကပြောသည်။
![လှိုင်သာယာပန်းခြံအနီးပေါက်ကွဲပြီးနောက်တွေ့ရစဥ်။ ဓါတ်ပုံ-CJ](https://i0.wp.com/www.ludunwayoo.com/wp-content/uploads/2022/07/293534460_421946179994840_3115289124054157437_n.jpg?resize=684%2C382&ssl=1)
“(၅)ထိပ်မှတ်တိုင်ပေါက်ကွဲမှုက သံသယဖြစ်စရာပဲ။ အဲ့ဒီနားမှာ ဆိုင်ကယ် ကယ်ရီသမားတွေနဲ့ စျေးသည်တွေပဲ ရှိတာ”ဟု ၎င်းကဆက်ပြောသည်။
PDF နှင့် မြို့ပြပြောက်ကျားတပ်ဖွဲ့တို့သည်ပြည်သူကိုမထိခိုက်ရန်နှင့်စစ်ကောင်စီတပ်ကိုတိုက်ခိုက်ရန်သာအာရုံစိုက်ပြီး စစ်ကောင်စီတပ်မရှိဘဲ ပြည်သူရှိသောနေရာတွင် ဗုံးဖောက်ခွဲမှုမှာ စစ်ကောင်စီ နှင့် ၎င်းလက်အောက်ခံများပြုလုပ်ခြင်းဟု ဒေသခံတစ်ဦးကပြောသည်။
▪︎စမ်းချောင်းဖြစ်စဥ်
စမ်းချောင်းဖြစ်စဥ်မှာ ယနေ့(ဇူလိုင် ၁၂)ညနေ ၃ နာရီခန့်က မြေနီကုန်းလမ်းဆုံ၊ ဗားကရာလမ်း ဒဂုံစင်နာမျက်နှာချင်းဆိုင်ပန်းခြံဘက် အခြမ်းတွင်ပေါက်ကွဲမှုနှစ်ကြိမ်ဖြစ်ပွားခဲ့ကြောင်း ဒေသခံများက ပြော သည်။
“အုန်း အုန်းဆိုပြီး အသံနှစ်သံကြားရတယ်ဗျ။ ကျွန်တော်တို့ကားလည်း အဲနားအရောက်၊ လမ်းကလည်း ကြပ်တယ်လေ။ ရောက်ယုံရှိသေးအုန်းတာပဲ”ဟု မျက်မြင်တွေ့ရှိသူအမျိုးသားတစ်ဦးက ပြောသည်။
![မြေနီကုန်းတွင်ဗုံးပေါက်ကွဲပြီးနောက်တွေ့ရစဥ်။ ဓါတ်ပုံ-CJ](https://i0.wp.com/www.ludunwayoo.com/wp-content/uploads/2022/07/292438836_421946146661510_4202451225671505790_n.jpg?resize=582%2C338&ssl=1)
ထိုသို့ ပေါက်ကွဲမှုဖြစ်ပွားချိန် လမ်းဆုံ(လမ်းလယ်)ဘန်ကာအတွင်းရှိနေသော စစ်ကောင်စီတပ်သားနှစ်ဦးထက်မနည်းမှာ ပေါက်ကွဲမှုဖြစ်သည့်နေရာသို့ လှမ်းကြည့်ယုံသာကြည့်နေပြီး ပုံမှန်အနေအထားဖြင့်တွေ့မြင်ရကြောင်း ၎င်းက ဆက်ပြောသည်။
“သူတို့(စစ်ကောင်စီတပ်သားများ)က ဘန်ကာထဲမှာ။ နှစ်ယောက်တော့မြင်တယ်။ သူတို့က (လမ်း)အလယ်မှာ။ ပေါက်ကွဲတဲ့နေရာနဲ့ လမ်းရဲ့ဟိုဘက်ခြမ်း ဒီဘက်ခြမ်းသဘောမျိုးပေါ့။ လမ်းတစ်လမ်းစာလောက်ဝေးတယ်”ဟုအထက်ပါမျက်မြင်တွေ့ရှိသူက ရှင်းပြသည်။
ကနဦးသတင်းများအရ ပေါက်ကွဲမှုကြောင့် အမျိုးသမီးနှစ်ဦးလဲကျသွားသည်ဟု သိရှိရသော်လည်း နောက်ဆက်တွဲရရှိသော အချက် အလက်များအရ ပြည်သူရှစ်ဦးထိခိုက်ဒဏ်ရာရခဲ့ပြီး ၁ ဦးသေဆုံးကြောင်း သိရသည်။
ယနေ့ ဝါဆိုလပြည့်နေ့တွင် အများပြည်သူများ ဘုရားသွားခြင်း၊ မိသားစုလိုက်လည်ပတ်ခြင်းများ ပြုလုပ်နေသည့်အတွက် ပြည်သူများထိခိုက်အောင် ဗုံးပေါက်ကွဲမှုလုပ်ဆောင်ခြင်းမှာ အကြမ်းဖက် စစ်ကောင်စီဝင်များသာ ဖြစ်နိုင်ကြောင်း မြို့ပြတော်လှန်ရေးအင်အားစုမှ လူငယ်တစ်ဦးက လူမှုကွန်ရက်၌ ရေးသားထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)