အကြမ်းဖက်စစ်ကောင်စီကို တိုင်းရင်းသားလက်နက်ကိုင်အဖွဲ့များက လက်နက်ကိုင် ခုခံနေသည့်နည်းတူတိုင်းသူပြည်သားများကလည်း အချင်းချင်းရိုင်းပင်းကာ စည်းလုံးညီညွတ်စွာ ရပ်တည်တုံ့ပြန်ကြရန် ကရင်အမျိုးသားအစည်းအရုံး(KNU) က တိုက်တွန်းလိုက်သည်။
ကေအဲန်ယူ- ကရင်အမျိုးသားအစည်းအရုံး၊ ကျောက်ကြီးမြို့နယ်၏ ယနေ့ ထုတ်ပြန်ချက်၌ “တစ်ဦးတစ်စုအသိုင်းအဝိုင်းတစ်ခုချင်းစီက အပြန်အလှန်ရပ်တည်မှု ပေးခြင်းဖြင့်သာလျှင် အာဏာရှင်အားအနိုင်ယူနိုင်မည်ဖြစ်သည်” ဟု ဖော်ပြသည်။
KNU (ဗဟို)၏ ချမှတ်ထားပေးသည့်အတိုင်း ပြည်သူပြည်သားများအားလုံးအတွက် လုံခြုံသည့် ကြားခံနယ်မြေများတည်ဆောက်ရေး၊ လေယာဉ်မပျံသန်းရနယ်မြေများပေါ်ထွက်လာရေးတို့အတွက် အပြည်ပြည်ဆိုင်ရာနှင့်သော်လည်းကောင်း၊ ခုခံတော်လှန်သူများ နှင့်ပူးတွဲဖြင့်သော်လည်းကောင်းလုပ်ဆောင်သွားမည်ဟု ထုတ်ပြန်သည်။
ထို့အပြင် စစ်ကောင်စီနှင့်အကြား အရေးပေါ်လူသားချင်းစာနာမှုဆိုင်ရာဆွေးနွေးညှိနှိုင်းများပြုလုပ်ခြင်းဖြင့် ပြည်သူများလုံခြုံမှုရရှိရန် ကြိုးပမ်းလုပ်ဆောင်သွားမည်ဟုလည်း ကေအဲန်ယူ- ကရင်အမျိုးသားအစည်းအရုံး၊ ကျောက်ကြီးမြို့နယ်က ထုတ်ပြန်သည်။
တရားမဝင်သိမ်းယူခဲ့သည့် စစ်ကောင်စီသည် ပြည်သူလူထုရွေးကောက်တင်မြောက်သော လူထုအစိုးရအားထောင်တွင်းအကျဉ်းချခြင်း၊ မတရားအရေးယူအပြစ်ပေးခြင်း၊ ကြီးလေးသည့်ဖြစ်ဒဏ်ချမှတ်မှုများ ပြုလုပ်ခဲ့ပြီး ယခုတိုင်ဆက်လက်ပြုလုပ်နေဆဲဖြစ်သည်ဟု ထုတ်ပြန်ချက်၌ ဖော်ပြသည်။
စစ်ကောင်စီသည် အရပ်သားပြည်သူများ၏ ကျေးရွာ၊ နေအိမ်များအပေါ်သို့ လက်နက်ကြီးများဖြင့် ရည်ရွယ်ချက်ရှိရှိ ပစ်မှတ်ထား တိုက်ခိုက်ခြင်း၊ လေယာဉ်များဖြင့် ဗုံးကြဲတိုက်ခိုက်ခြင်းများကို ပြုလုပ်လျက်ရှိနေပြီး တိုင်းပြည်တဝန်း၌ ရက်စက်မှု၊ သတ်ဖြတ်မှု၊ ညှင်းပန်းနှိပ်စက်မှုတို့ဖြင့် နိုင်ငံအဆင့် အကြမ်းဖက်ပေါ်လစီကို ချမှတ်လုပ်ဆောင်နေသည်ဟု ဆက်လက်ဖော်ပြသည်။
ထိုသို့သောလုပ်ရပ်များကြောင့် ရပ်ရွာအိုးအိမ်များပစ်ခွာထွက်ပြေးတိမ်းရှောင်ရခြင်း၊ ကလေးငယ်များ စာသင်ယူနိုင်မှုအခွင့်အရေးပျက်ကွက်နေရခြင်း၊ အသက်မွေးဝမ်းကြောင်းလုပ်ငန်းများပျက်စီးခြင်း၊ အဓမ္မ ခိုင်းစေခြင်း၊ ငွေကောက်ယူခြင်း၊ ပုဂ္ဂလိကပိုင်ပစ္စည်များသိမ်းယူခြင်းနှင့် လူ့အခွင့်အရေးများဆုံရှုံးခြင်းတို့ ဖြစ်ပွားနေသည်ဟုလည်း ထုတ်ပြန်သည်။
