အာဏာသိမ်းစစ်ကောင်စီနဲ့ ရန်ငါ ရှင်းရှင်းလင်းလင်းပြတ်သားကြဖို့ ၈၈မျိုးဆက်ကျောင်းသားခေါင်းဆောင် ကိုဂျင်မီရဲ့ ဇနီးဖြစ်သူ မနီလာသိန်းက သူရဲ့ဖေ့ဘွတ်ခ်လူမှုကွန်ရက်ကနေတိုက်တွန်းလိုက်ပါတယ်။
ပိုပြီး ချစ်ခင်စည်းလုံးကြဖို့ ၊ ခွန်အားဖြစ်ပြောင်းလဲပြီး စစ်အာဏာရှင်မှန်သမျှ ဒီမြေပေါ်မှာ ရှင်သန်ခွင့်မရစေရဖို့ မနီလာသိန်းက တိုက်တွန်းထားတာတွေ့ရပါတယ်။
“ကြယ်တွေကြွေတာ ရှင်သန်သူတွေ ရပ်တန်ဖို့ မဟုတ် ၊ ရှုံးနိမ့်ဖို့မဟုတ်” လို့ မနီလာသိန်းက ပြောပါတယ်။
ဒါအပြင် ကိုဂျင်မီရဲ့ ရုပ်အလောင်းကိုမတွေ့မချင်း ” ဆွမ်းမသွပ်ပါ။အမျှမဝေပါ။နာရေးမလုပ်ပါ။” လို့လည်း မနီလာသိန်းက ဆိုထားပါတယ်။
နွေဦးတော်လှန်ရေးကာလအတွင်း ဖမ်းဆီးခံရတဲ့ ကိုဂျင်မီ၊ ကိုဇေယျာသော် ၊ကိုလှမျိုးအောင် ၊ ကိုအောင်သူရဇော်တို့ ၄ ဦးကို ကွပ်မျက်လိုက်တယ်လို့ စစ်ကောင်စီက ဒီနေ့မှာ ကြေညာပါတယ်။
ဒီသတင်းကို အတိအကျ သိရဖို့ မိသားစုဝင်တွေက အင်းစိန်ထောင်က ထောင်အာဏာပိုင်တွေနဲ့ တွေ့ဆုံတဲ့အခါ ကွပ်မျက်လိုက်တယ်ဆိုတာကို အတည်ပြုပေမယ့် ဘယ်နေ့ ၊ဘယ်ရက်မှာ စီရင်ခဲ့တယ်ဆိုတာကို အတိအကျမပြောကြောင်း သိရပါတယ်။
ပြီးခဲ့တဲ့ သောကြာနေ့ ( ဇူလိုင်လ ၂၂ ) ညနေပိုင်းက မိသားစုဝင်တွေကို ထောင်ဆီကားနဲ့ခေါ်ပြီး အွန်လိုင်းကနေ တဆင့် စစ်ကောင်စီက ပေးတွေ့ခဲ့ပါတယ်။ အဲလိုပေးတွေ့ပြီး နောက်နေ့မနက်ပိုင်းမှာ ကွပ်မျက်ခဲ့တာလို့ သိရပါတယ်။
မိသားစုဝင်တွေက ထောင်အာဏာပိုင်တွေကို ရုပ်အလောင်းတောင်းတဲ့အခါ ရုပ်အလောင်းထုတ်ပေးဖို့ ဥပဒေမရှိကြောင်း တုံ့ပြန်ခဲ့ပါတယ်။
ဘီဘီစီသတင်းဌာနနဲ့ အင်တာဗျုးမှာ ကိုဇေယျာသော်အမေက လည်း အသက်ပေးသွားတဲ့ သားဖြစ်သူအတွက် ဂုဏ်ယူရကြောင်းပြောပါတယ်။
