“ခွန်အားအဖြစ်ပြောင်း စစ်အာဏာရှင်မှန်သမျှ ဒီမြေပေါ်ရှင်သန်ခွင့်မရစေရ”ဟု ဦးဂျင်မီ၏ဇနီး သတင်းစကားပါး

ဦးဂျင်မီ၏ ရုပ်အလောင်းကို မတွေ့မချင်း ဆွမ်းမသွပ်၊ အမျှမဝေ၊ နာရေးမလုပ် ဟု အသိပေး

စစ်အာဏာရှင်မှန်သမျှ ရှင်သန်ခွင့်မရစေရေး အားလုံး ပိုမိုစည်းလုံးပြီး အလုပ်များတိုး၍ လုပ်ဆောင်ကြမည်ဟု ဦးဂျင်မီ၏ ဇနီးဖြစ်သူ မနီလာသိန်းက သတင်းစကားပါးလိုက်သည်။

ဦးဂျင်မီနှင့် ဦးဖြိုးဇေယျာသော် အပါအဝင် လေးဦးအား သေဒဏ်ပြစ်ဒဏ် စီရင်ပြီးစီးကြောင်း စစ်ကောင်စီက ကြေညာခဲ့သည့် ယနေ့ ဇူလိုင် ၂၅ရက် နေ့လည်ပိုင်းတွင် မနီလာသိန်းက ၎င်း၏ Facebook မှတစ်ဆင့် အထက်ပါအတိုင်းသတင်းစကားပါးလိုက်ခြင်းဖြစ်သည်။

“ကျမတို့ အားလုံး ပိုချစ်ခင်မယ်။ ရန်ငါရှင်းပြတ်ပြတ် အလုပ်တွေ ဆတိုး လုပ်ကြမယ်။ ကြယ်တွေ ကြွေတာ ရှင်သူတွေ ရပ်တန့်ဖို့ မဟုတ် ရှုံးနိမ့်ဖို့မဟုတ် ….. ခွန်အားအဖြစ်ပြောင်း စစ်အာဏာရှင် မှန်သမျှ ဒီမြေပေါ် ရှင်သန်ခွင့်မရစေရ” ဟု မနီလာသိန်းက ရေးသားခဲ့သည်။

ထို့ပြင် မနီလာသိန်းက ၎င်းအနေဖြင့် ဦးဂျင်မီ၏ ရုပ်အလောင်း မတွေ့မချင်း ဆွမ်းသွပ် လုပ်မည် မဟုတ်ကြောင်း၊ အမျှဝေမည်မဟုတ်ကြောင်း၊ နာရေးလုပ်မည်မဟုတ်ကြောင်း အသိပေးခဲ့သည်။

အားလုံးရဲရင့်ကြရန် ပြတ်သားကြရန်နှင့် သန်မာကြရန်လည်း မနီလာသိန်းက ရေးသားခဲ့သည်။