မန္တလေးတိုင်း၊ မြင်းခြံမြို့နယ်တွင် စစ်ကောင်စီခန့်အုပ်ချုပ်ရေးမှူး၏ သက်တော်စောင့် ပျူစောထီးတစ်ဦးအား ယမန်နေ့မွန်းလွဲပိုင်းက ပစ်ခတ်ရှင်းလင်းခဲ့ကြောင်း Natogyi People Defence Force အဖွဲ့က သတင်းထုတ်ပြန်သည်။
ယမန်နေ့( ဇူလိုင်လ ၂၉ရက်နေ့)မွန်းလွဲပိုင်းက မြင်းခြံမြို့နယ် စံပြကျေးရွာတွင် အကြမ်းဖက်စစ်ကောင်စီခန့် အုပ်ချုပ်ရေးမှူး၏သက်တော်စောင့် ၊ လေတပ်မှဒုတပ်ကြပ် ကျော်ဇင်ထွန်းဆိုသူအား မြင်းခြံခရိုင် တပ်ရင်း (၄) နွားထိုးကြီးPDFအဖွဲ့က ဝင်ရောက်ပစ်ခတ်ရှင်းလင်းခဲ့ကြောင်း ၎င်းအဖွဲ့က ထုတ်ပြန်သည်။ လေတပ်မှ ဒုတပ်ကြပ်ဟုစာရွက်ဖြတ်ပိုင်းတစ်ခုတွင်ရေးထားသော်လည်း သိမ်းဆည်းရမိသော သေနတ်တစ်လက်တွင် “ပသစ” ဟုရေးသားထားသည်ကိုတွေ့ရပြီး ပျူစောထီးများကို စစ်တပ်က ပေးလေ့ရှိသောသေနတ်မျိုးသာဖြစ်၍ ပျူစောထီးတစ်ဦးသာဖြစ်ကြောင်း စစ်ရေးလေ့လာသူတစ်ဦးကပြောသည်။
ကာဗိုင်(၁) လက် ၊ 12 Bore Slide Action Shotgun (၁) လက် 12 Bore Shotgun ကျည်အတောင့် (၂၀)တို့ကို သိမ်းဆည်းရမိခဲ့ကြောင်း နွားထိုးကြီး PDFက အသိပေးသည်။
ဖြစ်စဥ်နှင့်ပတ်သက်၍ နွားထိုးကြီး PDFတာဝန်ရှိသူက “အုပ်ကြီးမှာ သက်တော်စောင့်၃ယောက်ရှိတာ။ သူကတစ်ယောက်ထဲကျန်ခဲ့တာ။ အုပ်ကြီးမတွေ့လို့ သူ့ရှင်းခဲ့တာ။”ဟု ပြောသည်။
သေဆုံးသူမှ လေတပ်မှဒုတပ်ကြပ်ဖြစ်ကြောင်းကို ၎င်းနှင့်အတူသိမ်းဆည်းရမိသည့်စာရွက်စာတမ်းများအရသိရကြောင်း နွားထိုးကြီး PDFက ပြောသည်။
နွားထိုးကြီး PDFသည် နွားထိုးကြီးမြို့နယ်နှင့် မြင်းခြံမြို့နယ်တို့တွင် အကြမ်းဖက်စစ်ကောင်စီတပ်အား ပြောက်ကျားနည်းဖြင့် မကြာခဏ တိုက်ခိုက်နေသည်။
