ခွန်ဖ/People’s Spring
မြဝတီကို လေးရက်နဲ့ အရောက်ချီတက်မယ်ဆိုပြီးရက်ပေါင်း ၄၈၀ အကြာတဲ့အထိ ဒေါနတောင်ပေါ်မှာ ပိတ်မိနေတဲ့ စစ်အုပ်စုရဲ့အောင်ဇေယျစစ်ကြောင်းဟာ ရက်ပေါင်း(၉၀)အတွင်း မြဝတီရောက်အောင်သွားမယ်ဆိုပြီး လုပ်လာပြန်ပါတယ်။
တကယ်တော့ စစ်တပ် စစ်ကြောင်းခရီးစတင်ထွက်လာတာက မွန်ပြည်နယ်မော်လမြိုင်မြို့ကနေ (၇၅)မိုင်သာကွာဝေးတဲ့ ကရင်ပြည်နယ်က မြဝတီမြို့ဆီပါ။အောင်ဇေယျစစ်ဆင်ရေးအဖြစ်နဲ့ မြဝတီမြို့ဆီကို အာရှလမ်းပိုင်းကနေ စစ်ကြောင်းထိုးချီတက်ဖို့ လုပ်နေတာဟာ၂၀၂၄ ခုနှစ် ၊ဧပြီလကတည်းကပါ။
အောင်ဇေယျ စစ်ကြောင်းကိုတော်လှန်ရေးတပ်ဖွဲဲ့များကတိုက်ခိုက်၍ စစ်တပ်ယာဥ်တန်းကိုဖျက်ဆီးစဥ်နဲ့ စစ်ကားတွေပေါ်မှ လက်နက်ခဲယမ်းများကိုသိမ်းယူစဥ်။ဓါတ်ပုံ-Cobra Column 
အောင်ဇေယျ စစ်ကြောင်းကိုတော်လှန်ရေးတပ်ဖွဲဲ့များကတိုက်ခိုက်၍ စစ်တပ်ယာဥ်တန်းကိုဖျက်ဆီးစဥ်နဲ့ စစ်ကားတွေပေါ်မှ လက်နက်ခဲယမ်းများကိုသိမ်းယူစဥ်။ဓါတ်ပုံ-Cobra Column
အပျော်ခရီးထွက်တဲ့သူတွေလို နှစ်ညအိပ် သုံးရက်ခရီး ဒါမှမဟုတ် လေးညအိပ် ငါးရက်ခရီးလို ပုံစံနဲ့ မြဝတီမြို့ဆီကို လေးရက်နဲ့အရောက်သွားမယ်လို့ ချီတက်လာတဲ့ စစ်ကောင်စီရဲ့ အောင်ဇေယျစစ်ကြောင်းဟာ ရက်ပေါင်း ၅၀၀ခန့်ရှိလာချိန်မှာတော့ ဒေါနတောင်ပေါ်မှာပဲရှိသေးတာပါ။
Public Service Announcement
ဒီတခါ ခရီးစဉ်က ကော့ကရိတ်မြို့အကျော်မှာ တစ်နှစ်ခွဲနီးပါးအကြာ ပိတ်မိနေတဲ့ နေရာကနေမြဝတီကို ရက် ၉၀ နဲ့အရောက်သွားရမယ်လို့ စစ်ကောင်စီကအမိန့်ပေးလာတာဖြစ်ပါတယ် ။
ကော့ကရိတ်မြို့အကျော်က တတန်းကူးကျေးရွာနားမှာ ပိတ်မိနေတဲ့ အောင်ဇေယျအဖွဲ့ဟာ မိုင်(၂၀)လောက်ပဲ ကွာဝေးတော့တဲ့ နယ်စပ်မြို့ မြဝတီကို ရက်(၉၀)နဲ့ အရောက်ချီတက်မယ့်ခရီးဆိုပြီး အခု ဩဂုတ်လဆန်းက စတင်ခဲ့တာလို့ လူထုနွေဦးရဲ့ ကရင်စစ်ရေးသတင်းရင်းမြစ်က ပြောပါတယ်။
” အခုပြောင်းသွားပြီ လေးရက်မဟုတ်တော့ဘူး။ ရက်(၉၀) သုံးလနဲ့ မြဝတီအရောက်တဲ့”လို့ အောင်ဇေယျစစ်ကြောင်းရဲ့ ခရီးစဉ်အသစ်နဲ့ ပတ်သက်ပြီး ကရင်စစ်ရေးသတင်းရင်းမြစ်က ပြောပါတယ်။ ဒါပေမယ့် ရက် ၉၀ ဟာ အခု သြဂုတ်လကုန်ပိုင်းရောက်နေပြီမို့ ရက် ၂၀ လောက်အချိန်ကုန်သွားပြီဖြစ်ပေမယ့် စစ်ကြောင်းရှေ့မတိုးပဲ ရက် ၇၀ လောက်ပဲကျန်တယ်လို့သိရပါတယ်။
၂၀၂၄ မတ်လနဲ့ ဧပြီက ကရင်အမျိုးသားလွတ်မြောက်ရေးတပ်မတော်(KNLA)နဲ့ PDF ပူးပေါင်းတပ်တွေက မြဝတီမြို့နားက သင်္ဃန်းညီနောင်ဗျူဟာနဲ့ တပ်ရင်းတွေ၊ လေးကေ့ကော်နဲ့ မြဝတီမြို့စောင့်တပ် ခမရ(၂၇၅)တပ်ရင်းတွေတိုက်ခိုက်သိမ်းပိုက်ခဲ့ပါတယ်။ အဲဒီနေရာတွေကို ပြန်လည်ထိန်းချုပ်မယ်လို့ဆိုကာ အာဏာသိမ်းစစ်ကောင်စီရဲ့ ဒုခေါင်းဆောင် ဒုဗိုလ်ချုပ်မှူးကြီးစိုးဝင်း ကိုယ်တိုင်ကွပ်ကဲတဲ့ နိုင်ငံတော်အဆင့်”အောင်ဇေယျစစ်ဆင်ရေး”လို့ အမည်ပေးပြီး တပ်မ(၅၅)ဦးဆောင်တဲ့ အင်အား ၁၂၀၀ခန့်ပါ အောင်ဇေယျစစ်ကြောင်းဟာ ၂၀၂၄ ဧပြီ ၉ရက်ကစလို့ မော်လမြိုင်က ချီတက်လာခဲ့ပါတယ်။
လေးရက်နဲ့ မြဝတီမြို့ကို အရောက်ချီတက်မယ်လို့ ကြွေးကြော်ခဲ့ပေမယ့် တနှစ်ခွဲနီးပါးကြာတဲ့အထိ ဒေါနတောင်ပေါ်၊ တောနောရေတံခွန်မှာ ရှေ့ဆက်မတိုးနိုင်တော့ဘဲ ပိတ်မိနေပါတယ်။ အာဏာသိမ်းဒုခေါင်းဆောင် ကလည်း အောင်ဇေယျစစ်ဆင်ရေ ဒေါနတောင်မှာ အရှုံးကြီးရှုံးရတာကိုအတော်အခဲမကြေတဲ့ ပုံစံရှိပါတယ် ။ ဒါကို နောင်ချိုမှာတွေ့ရပါတယ် ။
တစ်နှစ်နီးပါးကြာ နောင်ချိုကိုတန်ပြန်ထိုးစစ်ဆင် ပြန်လည်ထိန်းချုပ်ပြီးမှ စိုးဝင်းကနောင်ချိုကို လာအောင်ပွဲခံရင်း အောင်ဇယျစစ်ဆင်ရေးနဲ့ ပြန်သိမ်းခဲ့တာလို့ကြွေးကြော်ခဲ့တာပါ။ စိုးဝင်းမလာခင်အထိ စစ်ကောင်စီက အကြမ်းဖက်မှုတိုက်ဖျက်ရေးအထူးစစ်ဆင်ရေးနဲ့နောင်ချိုကို ထိုးစစ်ဆင်တယ်လို့ ထုတ်ပြန်ခဲ့ပြီးမှ အာဏာသိမ်းဒုခေါင်းဆောင်ကတော့ အောင်ဇေယျစစ်ဆင်ရေးလို့ ဆိုခဲ့တာပါ။
ဒေါနတောင်မှာ ရှေ့တိုးမရလို့ ရပ်တန့်နေတဲ့ အောင်ဇေယျစစ်ဆင်ရေးကို စစ်ကောင်စီက အင်အားတွေဖြည့်တင်းပြီး အခု ဩဂုတ်လဆန်းမှာ စစ်ကြောင်းရအောင်ပြန်ထိုးရမယ်ဆိုပြီး အမိန့်ဖို့ ပေးလာတာဖြစ်ပါတယ်။
အင်အားထောင်ကျော်ဖြည့်ပြီး စစ်ကြောင်းသုံးကြောင်းနဲ့ ရှေ့တိုးပေမယ့်မရွေ့သေးတဲ့ အောင်ဇေယျ
KNLAနဲ့ PDF ပူးပေါင်းတပ်တွေရဲ့ တိုက်ခိုက်မှုကြောင့် အင်အားချိနဲ့နေတဲ့ အောင်ဇေယျစစ်ဆင်ရေးကို စစ်ကောင်စီက ပြီးခဲ့တဲ့ လပိုင်းတွေမှာ အင်အားထောင်ချီဖြည့်တင်းခဲ့တယ်လို့ ကရင်စစ်ရေးသတင်းရင်းမြစ်တွေက ပြောပါတယ်။
အင်အားဖြည့်ပြီးနောက် အောင်ဇေယျစစ်ဆင်ရေးဟာ အခု ဩဂုတ်လဆန်းကစပြီး စစ်ကြောင်းသုံးကြောင်းနဲ့ ရှေ့တိုးဖို့ ကြိုးစားပေမယ့် ရှေ့ကိုရွေ့မလာသေးဘူးလို့ ကရင်စစ်ရေးသတင်းရင်းမြစ်တဦးက ပြောပါတယ်။
ကော့ကရိတ်မြို့အကျော်က ဒေါနတောင်ရဲ့ အနောက်ဘက်က တတန်းကူးကျေးရွာနားမှာရှိတဲ့ အောင်ဇေယျစစ်ဆင်ရေးက စစ်သားတွေက အာရှလမ်းမကြီးကနေ စစ်ကြောင်း ၂ကြောင်းနဲ့ အာရှလမ်းဟောင်းကနေ စစ်ကြောင်း တစ်ကြောင်းအနေနဲ့ ထိုးနေတာလို့ စုံစမ်းသိရပါတယ်။
“အပိုင်းပိုင်းဖြတ်တောက်ထားတာ။ ရှေ့တက်လာဖို့ မလွယ်ဘူး”လို့ ကရင်စစ်ရေးသတင်းရင်းမြစ်တဦးကပြောပါတယ်။
ပြီးခဲ့တဲ့ ဩဂုတ် ၂၅ရက်လောက်က တိုက်ပွဲမှာလည်း တော်လှန်ရေးတပ်တွေက အောင်ဇေယျရဲ့ ကုန်းတကုန်းကို သိမ်းရထားတယ်လို့ ဆိုပါတယ်။ ဒါ့အပြင် စစ်သား အလောင်းငါးလောင်းနဲ့ လက်နက် ငါးလက်လည်း တော်လှန်ရေးတပ်တွေက ရခဲ့တယ်လို့ ကရင်စစ်ရေးသတင်းရင်းမြစ်က ပြောပါတယ်။
“ဝါဒဖြန့်နေသလို စစ်ကြောင်းခြောက်ကြောင်းနဲ့ ထိုးနေတယ်ဆိုတာ မဟုတ်ဘူး။ ကျနော်တို့ သိသလောက် စစ်ကြောင်း သုံးကြောင်းနဲ့ ထိုးနေတာ ရှိပါတယ်။ ထိုးတာပဲရှိတာပါ။ ရှေ့ကို မရွေ့ပါဘူး။ ထိုးလိုက် အတီးခံရလိုက် ပြန်ထိုးလိုက်ပေါ့”လို့ ကော့ကရိတ်ဒေသက PDFစစ်ကြောင်းမှူး တဦးက လူထုနွေဦးကို ဩဂုတ် ၁၈ရက်မှာ ပြောပါတယ်။
အတူတူချီတက်လာပြီး တနေရာစီခွဲနေရတဲ့ အောင်ဇေယျ
အင်အား တထောင်ကျော် အရှိန်နဲ့ ချီတက်လာတဲ့ အောင်ဇေယျစစ်ကြောင်းဟာ ကော့ကရိတ်မြို့အကျော် ဒေါနတောင်ပေါ်ရောက်ချိန်မှာတော့ ရပ်တန့်သွားပါတယ်။ ဒေါနတောင်ပေါ်က တောနောရေတံခွန်နားမှာ ပိတ်မိနေပြီး အဲဒီနေရာကနေ ရှေ့ကို မတိုးနိုင်တော့တာပါ။
အောင်ဇေယျစစ်ကြောင်းဟာ အစပိုင်းမှာတော့ ကော့ကရိတ်မြို့ကနေ ဒေါနတောင်ပေါ်က တောနောရေတံခွန်အထိ နေရာယူထိန်းချုပ်ခဲ့ပါတယ်။
KNLAနဲ့ PDF ပူးပေါင်းတပ်တွေဟာ ၂၀၂၄ နှစ်ကုန်ပိုင်းလောက်စပြီး အောင်ဇေယျစစ်ကြောင်းရဲ့ အလယ်ကနေဖြတ်တောက်ပြီး ပိတ်ဆို့ထားလိုက်
ပါတယ်။ အဲလိုဖြတ်တောက် ပိတ်ဆို့မှုကြောင့် ဒေါနတောင်ပေါ် တောနောရေတံခွန်နားက အောင်ဇေယျအဖွဲ့ဟာ ပိတ်ဆို့ဖြတ်တောက်ခံရတာကြောင့် အစာရေစာငတ်ပြတ်တဲ့အထိဖြစ်ကာ အလင်းဝင်လာသူတွေ အများအပြားရှိခဲ့ပါတယ်။
တောနောရေတံခွန်နားမှာ ရှေ့ဆက်မတိုးနိုင်တော့ဘဲ ပိတ်မိနေတဲ့ စစ်တပ်က စစ်သားတွေဟာအလင်းဝင်တာ ၊ထွက်ပြေးတာ ၊သေဆုံးဒဏ်ရာရတာတွေကြောင့် ရာနဲ့ချီနဲ့ သင်တန်းဆင်းပြီးစ စစ်သားသစ်တွေကို ထပ်ပို့ခဲ့တယ်လို့ ကော်ဘရာစစ်ကြောင်း စစ်ဆင်ရေးမှူး ဗိုလ်မှူးဒါဘောက People’s Spring နဲ့ ၂၀၂၅ နှစ်ဆန်းပိုင်းက မေးမြန်းခန်းမှာ ပြောခဲ့ပါတယ်။ ကျန်နေတဲ့ စစ်သားတွေဟာလည်း ဒေါနတောင်ပေါ်မှာ တော်လှန်ရေးတပ်တွေရဲ့ ဖြတ်တောက်ပိတ်ဆိုမှုခံနေရလို့ ရိက္ခာပြတ်လုဖြစ်ပြီးဆန်ပြုတ်သောက်နေရတယ်လို့စစ်ရေးသတင်းရင်းမြစ်အချို့ကပြောပါတယ်။
တောင်အောက် တတန်းကူးရွာနားက အောင်ဇေယျအဖွဲ့ကတော့ ကော့ကရိတ်မြို့နဲ့ထိစပ်နေပါတယ်။ ဒါကြောင့် စစ်ကောင်စီဟာ တတန်းကူးရွာနားက အဖွဲ့ကို အင်အားတွေဖြည့်တင်းပြီး စစ်ကြောင်းပြန်ထိုးဖို့ ပြင်ဆင်လာတာဖြစ်ပါတယ်။
လက်တလော အာရှလမ်းပိုင်းမှာ တိုက်ပွဲတွေဖြစ်နေတာလည်း တတန်းကူးရွာနားက အောင်ဇေယျအဖွဲ့နဲ့ တောင်အောက်မှာ ပိတ်ဆို့ထားတဲ့ တော်လှန်ရေးတပ်တွေကြား တိုက်ပွဲဖြစ်နေတာပါ။
“အင်အားဖြည့်တင်းတာလည်း လူသစ်တွေပဲ။ ဒီရက်ပိုင်းမှာလည်း အလင်းဝင်လာတာတွေလည်း ရှိတယ်”လို့ ကရင်စစ်ရေးသတင်းရင်းမြစ်က ပြောပါတယ်။
စစ်ကောင်စီဟာ ကရင်ပြည်နယ် ဘားအံမြို့ကနေ မြဝတီမြို့ဘက်သွားတဲ့ လမ်းပိုင်းကို စက်သုံးဆီအပါအဝင် ကုန်ပစ္စည်းတင်ကားတွေ သွားလာခွင့်ကို ဩဂုတ် ၁၃ရက်လောက်ကစပြီး ပိတ်ပင်လိုက်ပါတယ်။
ဒါ့ကြောင့် လက်တလော မြဝတီမြို့မှာ စက်သုံးဆီပြတ်တောက်နေပါတယ်။ မြဝတီမြို့ခံတွေဟာ ကားတွေနဲ့ တဖက်က ထိုင်းနိုင်ငံ မဲဆောက်မြို့ကို နေ့ချင်းပြန်ကတ်နဲ့ သွားရောက်ပြီး ကားတွေနဲ့ ဆီဖြည့်တာတွေ လုပ်နေကြရပါတယ်။
စစ်ကောင်စီဟာ ကရင်ပြည်နယ်ကို ထိုးစစ်ဆင်ဖို့အတွက် စက်သုံးဆီတွေအပါအဝင် ကန့်သတ်ပိတ်ပင်လိုက်တာလို့ ကရင်ပြည်နယ်က စစ်ရေးသုံးသပ်သူအချို့က ပြောပါတယ်။
ထိုင်းအစိုးရကလည်း မြဝတီမြို့ကိုကျားဖြန့်နှိမ်နင်းရေးခေါင်းစဥ်နဲ့ လျှပ်စစ်မီးနဲ့ လောင်စာဆီပိတ်ဆို့ဖြတ်တောက်ထားပါတယ်။ ထိုင်းအစိုးရက လူကုန်ကူးမှုတွေရှိရာ ကရင်ပြည်နယ် မြဝတီဒေသကို ပေးပို့နေတဲ့ လျှပ်စစ်မီးနဲ့လောင်စာဆီကို ပြီးခဲ့တဲ့ ဖေဖော်ဝါရီ ၅ရက်ကစပြီး ပိတ်ဆို့ဖြတ်တောက်ထားပါတယ်။
ဒါ့အပြင် စစ်ကောင်စီဟာ ဩဂုတ်၁၈ရက် မနက်မှာဘဲ ထိုင်းကုန်ပစ္စည်းတွေ အဓိကတင်သွင်းတဲ့ မြန်မာ-ထိုင်း အမှတ်(၂)ချစ်ကြည်ရေးတံတားကို ပိတ်လိုက်ပါတယ်။
သွားတိုက်ဆေးနဲ့ ဆပ်ပြာတွေကစလို့ လူသုံးကုန်ပစ္စည်း ၃၅မျိုးကို ပြည်ပကနေတင်သွင်းခွင့် ပိတ်ပင်ကြောင်း သတင်းထွက်ပေါ်အပြီး တပတ်ခန့်အကြာမှာ ထိုင်းနိုင်ငံက ကုန်ပစ္စည်းတွေ အဓိကတင်သွင်းတဲ့ မြန်မာ−ထိုင်းအမှတ်(၂)ချစ်ကြည်
ရေးတံတားကို ဩဂုတ် ၁၈ရက်မနက်ကစပြီး စစ်ကောင်စီက ပိတ်လိုက်တာဖြစ်ပါတယ်။
မြဝတီမြို့ကို ကရင်နယ်ခြားစောင့်တပ်(BGF) ခေါ် KNAက ထိန်းချုပ်ထားပေမယ့် စစ်တပ်ရဲ့မြို့စောင့်တပ်ဖြစ်တဲ့ ခလရ (၂၇၅)တပ်ရင်းထဲမှာ ယခင်ကျန်နေတဲ့စစ်သားတွေရယ် ၊နယ်စပ်စခန်းတွေအသိမ်းခံရပြီး ထိုင်းနိုင်ငံဘက်ကိုထွက်ပြေးခိုလှုံခဲ့တာကြောင့် ထိုင်းကပြန်ပို့ထားတဲ့ စစ်သား တွေပေါင်းအင်အားရာနဲ့ချီပြီးရှိနေပါတယ်။ ဒါအပြင် မြဝတီမြို့ပေါ်မှာ စစ်ကောင်စီဝန်ထမ်းတွေရှိပြီး စစ်အုပ်ချုပ်ရေးယန္တရားကို လည်ပတ်ပေးနေတာဖြစ်ပါတယ်။
တချိန်တည်းမှာ KNLA ၊ PDF ၊ KNDO နဲ့ပူးပေါင်းတပ်တွေက မြဝတီမြို့တောင်ဘက်က သိမ်းဖို့ကျန်နေတဲ့ ဝေါလေဗျူဟာကို အပြီးသတ်သိမ်းပိုက်နိုင်ဖို့ ထိုးစစ်ဆင်နေပါတယ်။ တော်လှန်ရေးတပ်တွေက မြန်မာ-ထိုင်း နယ်စပ်က စစ်စခန်းတွေကိုဆက်တိုက်သိမ်းနေတာမှာတပ်မဟာ(၆)နယ်မြေမှာ ဝေါလေဗျူဟာနဲ့ တိသဲလယ်ကာကင်းစခန်းတို့ပဲ ကျန်တော့တာဖြစ်ပါတယ်။
နယ်စပ်က တပ်စခန်းတွေကို တိုက်ခိုက်သိမ်းပိုက်ပြီးတဲ့ KNLA ၊ PDFပူးပေါင်းတပ်တွေက သွေးသစ်လောင်းပြီး ဒီတကြိမ် အောင်ဇေယျစစ်ကြောင်းကို အမြစ်ဖြတ်မယ်လို့ ကြုံးဝါးထားတယ်လို့ လူထုနွေဦးရဲ့ ကရင်စစ်ရေးသတင်းရင်းမြစ်က ပြောပါတယ်။
” ဒီပွဲကတော့ သူကလည်း ရက်ပေါင်း ၉၀အတွင်းဆိုတော့ အောင်ဇယျကအင်အားတိုးလာရင် တိုက်ပွဲကပိုကြမ်းပြီး စစ်ကျယ်ပြန့်လာမယ့် သဘောရှိတယ်” ။ ။
