စစ်ကောင်စီဖျက်ဆီးခဲ့တဲ့ ရှေးဟောင်းသမိုင်းဝင်အ​ဆောက်အအုံ နှင့် နေရာများ

Scorpio/People’s Spring

ရှမ်းပြည်နယ်မြောက်ပိုင်း နောင်ချိုနဲ့ ကျောက်မဲကြားက သမိုင်းဝင် ဂုတ်ထိပ်တံတားကြီး မနေ့က သြဂုတ် ၂၄ ရက်နေ့မှာ မိုင်းခွဲခံခဲ့ရပါတယ်။ စစ်ကောင်စီတပ်နဲ့ တော်လှန်ရေးတပ် ဘယ်အဖွဲ့က လုပ်တယ်ဆိုတာ မသိရသေးပေမဲ့ စစ်အုပ်စုက TNLA လက်ချက်ဆိုပြီး ဦးအောင်ဝါဒဖြန့်ပါတယ်။TNLA ကလည်းစစ်တပ်လက်ချက်ဆိုပြီး​ပြောပါတယ်။

လူမှုကွန်ရက်သုံးစွဲသူတွေကလည်း ရှေးဟောင်းသမိုင်းဝင် တံတားကြီး မိုင်းခွဲခံရလို့ ယူကြုံးမရဖြစ်ရတဲ့အကြောင်း ကိုယ်ပိုင်စာမျက်နှာတွေကနေ ဝမ်းနည်း​ကြောင်းပိုစ်​တွေ​ရေးသားကြပါတယ်။စစ်အုပ်စု လက်ချက်​ကြောင့် စစ်တပ်အာဏာသိမ်းပြီး​နောက်ပိုင်း ​သေဆုံးခဲ့ရတဲ့ပြည်သူ​ပေါင်းအနည်းဆုံး ၇၀၀၀ ​ကျော်ရှိ​နေပြီလို့ AAPPကထုတ်ပြန်ပါတယ် ။နိုင်ငံတစ်ဝန်း စစ်အုပ်စုကမီးရှို့ဖျက်ဆီးတဲ့​နေအိမ်​ပေါင်း တစ်သိန်း​ကျော်​နေပြီလို့ Data For Myanmar ကစာရင်းပြုစုထားပါတယ်။

စစ်တပ်အာဏာသိမ်းပြီး​နောက်ပိုင်း​ တိုက်ပွဲ​တွေမှာသေဆုံးကြရတဲ့ နိုင်ငံသား​တွေရဲ့အသက်​ပေါင်း ​သောင်း​ပေါင်းများစွာရှိ​နေခဲ့ပါပြီ။ အခု​နောက်ပိုင်းမှာဆိုရင် စစ်တပ်က တိုက်​လေယာဥ်နဲ့ ဗုံးကြဲပြီး ပြည်သူ​တွေကိုအစုလိုက်အပြုံလိုက်သတ်ဖြတ်​နေတဲ့အမှုကိုထမင်းစား​ရေ​သောက် မကြာခဏကျူးလွန်လာပါတယ် ။က​လေးငယ်​သော် ၊သံဃာ​တော်​သော ၊သက်ကြီးရွယ်အို ၊ကိုယ်ဝန်​ဆောင် ဘာမှမ​ရှောင် လူမျိုးဘာသာ ​နေရာမ​ရွေးကို သတ်ဖြတ်​နေတာဖြစ်ပါတယ် ။ဒီ​လို့​နေစဥ်နီးပါးသတ်ဖြတ်မှု​တွေကြားမှာ ဂုတ်ထိပ်တံတားပျက်စီးတာက သြဂုတ် ၂၄ ရက်မှာ လူ​ပြောများခဲ့တာပါ။

တကယ်တော့ ရှေးဟောင်းသမိုင်းဝင် ယဥ်ကျေးမှုနေရာတွေ ပျက်စီးနေတာ အခုမှ​တော့မဟုတ်ပါဘူး။ စစ်အုပ်စု အာဏာသိမ်းပြီး ​မနည်းမ​နောရှိ​နေခဲ့ပါပြီ။ အများစုကိုလည်း စစ်ကောင်စီတပ်ကပဲ စိတ်လိုလက်ရ ဖျက်ဆီးခဲ့တာပါ။ အခုဖော်ပြမှာကတော့ စစ်ကောင်စီတပ်လက်ချက်ကြောင့် ပျက်စီးဆုံးရှုံးခဲ့ရတဲ့ ရှေးဟောင်းသမိုင်းဝင် ယဥ်ကျေးမှုဒေသတွေက ဖျက်ဆီးခံရတဲ့အရာတွေပါ။ လက်လှမ်းမီသလောက်သာ ပြုစုထားတာဖြစ်ပြီး မြေပြင်မှာ ဒီ့ထက်ပိုများနိုင်၊ ပိုဆိုးနိုင်ပါတယ်။

●ရခိုင်ပြည်နယ်က ရှေးဟောင်းသမိုင်းဝင် ဘုရားစေတီပုထိုးများ

ရခိုင်ပြည်နယ်မှာ၂၀၁၉ ခုနှစ်ကတည်းကစစ်ကောင်စီတပ်ဟာ ဘုရားပုထိုးစေတီတွေမှာတပ်စွဲပြီး ဘုရားစေတီတွေဟာ တိုက်ပွဲတွေကြောင့် ပျက်စီးခဲ့ရပါတယ်။

စစ်ကောင်စီတပ်ဟာ ရခိုင်ပြည်နယ်အတွင်းက ဘုရားကျောင်းကန်၊ စေတီပုထိုး၊ ရှေးဟောင်းသမိုင်းဝင်အမွေအနှစ်တွေကို ရည်ရွယ်ချက်ရှိရှိနဲ့ ဖျက်ဆီးခြင်း၊ လက်နက်ကြီး၊ လက်နက်ငယ်တို့နဲ့ ပစ်ခတ်ဖျက်ဆီးခြင်း တို့ကိုလည်း ပြုလုပ်လေ့ရှိတယ်လို့ ဒေသခံတွေက ပြောတယ်။

၂၀၂၃ ခုနှစ် ဒီဇင်ဘာလအတွင်းကဆိုရင် စစ်ကောင်စီတပ်ဟာ မြောက်ဦးမြို့က ရှေးဟောင်းသုတေတနပြတိုက်၊ ဘုန်းတော်ကြီးကျောင်းတွေနဲ့ သာသနိကအဆောက်အအုံတွေကို တမင်တကာ ရည်ရွယ်ချက်ရှိရှိနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။

အဲဒီတိုက်ခိုက်မှုကြောင့် မြောက်ဦးရှေးဟောင်း

သုတေသနပြတိုက်အတွင်းကရခိုင်အမွေအနှစ်တွေအဖြစ် သတ်မှတ်ထားသည်သာမကကမ္ဘာ့ယဥ်ကျေးမှုအမွေအနှစ်တွေ ပျက်စီးဆုံးရှုံးမှုတွေရှိခဲ့ပါတယ် ။ဒါအပြင်ဘုန်းတော်ကြီးကျောင်း(၃) ကျောင်းပါ လက်နက်ကြီးကျည်ထိမှန်ကာ ပျက်စီးခဲ့ရတယ်လို့ ဒေသတွင်းအဖွဲ့အစည်းတွေက ထုတ်ပြန်ခဲ့ပါတယ်။

ရခိုင်မှာ စစ်ကောင်စီတပ်ကြောင့်ပျက်စီးခဲ့ရတဲ့ ရှေးဟောင်းယဥ်ကျေးမှုအမွေအနှစ်တွေက များလွန်းတာကြောင့် စာရင်းအတိအကျ မကောက်ယူနိုင်သေးပါဘူး။

●ဟန်လင်း၊ ပုဂံညောင်ဦး နဲ့ မင်းကွန်းစတဲ့ ရှေးဟောင်းယဥ်ကျေးမှုဒေသတွေကမီးရှို့ခံရတဲ့ ကျေးရွာ​တွေ

ရခိုင်တင်မကပါဘူး။အညာမှာလည်းရှေးဟောင်းအမွေအနှစ်တွေ ဆုံးရှုံးခဲ့ပါတယ်။ စစ်ကိုင်းတိုင်း၊ ဝက်လက်မြို့နယ်အတွင်းက ကမ္ဘာ့ယဉ်ကျေးမှုအမွေအနှစ်စာရင်းဝင် ဟန်လင်းပျူမြို့ဟောင်းနယ်မြေက ကျေးရွာ ၃ ရွာကို စစ်ကောင်စီတပ်က ပြီးခဲ့တဲ့ ၂၀၂၂ခုနှစ်အတွင်းက မီးရှို့ဖျက်ဆီးခဲ့ပါတယ်။ပျူမြို့ဟောင်းဧရိယာအတွင်းမှာရှိတဲ့ဟန်လင်းကြီးရွာ၊ ကံကြီးတောရွာနဲ့ ငပိအိုးရွာတွေကို မီးရှို့ဖျက်ဆီးခဲ့တာလို့ သိရပါတယ်။

ဒါ့အပြင် ဟန်လင်းမြို့ဟောင်းနယ်မြေအတွင်းဘုန်းကြီးကျောင်းတစ်ခုမှာ ပြသထားတဲ့ အဖိုးတန်ရှေးဟောင်း ပစ္စည်းတွေလည်း ခိုးယူခံခဲ့ရပြီး မှန်ဘောင်များလည်း ရိုက်ခွဲဖျက်ဆီးခံခဲ့ရပါတယ်။

အလားတူ ရှေးဟောင်းသမိုင်းဝင် ပုဂံညောင်ဦးဒေသက ကျေးရွာတွေကိုလည်း စစ်ကောင်စီတပ်က မီးရှို့ခဲ့ပါတယ်။ ပြီးခဲ့တဲ့ ဇူလိုင်လအတွင်းကပုဂံညောင်ဦးက ကျေးရွာ ၆ ရွာကို စစ်ကောင်စီတပ်က စစ်ကြောင်းထိုး မီးရှို့ခဲ့တာပါ။

ပြီးခဲ့တဲ့ ၂၀၂၄ ခုနှစ် ဇူလိုင်လကတော့ စစ်ကိုင်းမြို့နယ်၊ မင်းကွန်းရှေးဟောင်းယဥ်ကျေးမှုနယ်မြေကို စစ်ကောင်စီတပ်က စစ်ကြောင်းထိုးပြီး မင်းကွန်းဒေသကနေအိမ်တွေကိုလည်း မီးရှို့ဖျက်ဆီးခဲ့ပါတယ်။

မင်းကွန်းဆရာတော်ကြီး ကျောင်းနားက အိမ်တွေနဲ့ မြသိန်းတန်ဘုရားဝန်းကျင်၊ မင်းကွန်းတောင်ရွာ၊ မြောက်ရွာ၊ ရှားစောင်းရွာတို့ကို နေရာလေးနေရာ ခွဲပြီး မီးရှို့ခဲ့တာဖြစ်ပါတယ်။

●ခရစ်ယာန်ကျောင်းတွေလည်း မချန်ပါ

စစ်ကောင်စီတပ်ဟာ ဗုဒ္ဓဘာသာတွေရဲ့ အထွဋ်အမြတ်နေရာတွေတင်သာမက ခရစ်ယာန်ဘာသာဝင်တွေရဲ့ ရှေးဟောင်းသမိုင်းဝင် နေရာတွေကိုပါ မီးရှို့ခဲ့ပါတယ်။

သမိုင်းဝင်နှစ်ပေါင်း ၁၂၉နှစ်နီးပါးရှိတဲ့ ကက်သလစ်ခရစ်ယာန်ဘုရားရှိခိုးကျောင်းကြီးရှိရာစစ်ကိုင်းတိုင်း၊ ရေဦးမြို့နယ်၊ ချမ်းသာကျေးရွာကို စစ်ကောင်စီတပ်က ၂၀၂၂ နဲ့ ၂၀၂၃ ခုနှစ်တွေမှာ ၄ ကြိမ်ထက်မနည်း ဝင်ရောက်မီးရှို့ဖျက်ဆီးခဲ့ပါတယ်။ အိမ်ခြေ ၈၀၀ ကျော်ရှိတဲ့ ချမ်းသာကျေးရွာမှာ ရွာလုံးကျွတ်မီးလောင်ပျက်စီးခဲ့တဲ့အပြင်

သမိုင်းဝင် ခရစ်ယာန်ဘုရားရှိခိုးကျောင်းကြီးနဲ့ ဘုန်းကြီးကျောင်း၊ သီလရှင်ကျောင်းများပါ မီးလောင်ပြာကျခဲ့ရပါတယ်။

အလားတူ ကချင်ပြည်နယ်၊ဗန်းမော်မြို့မှာရှိတဲ့ သမိုင်းဝင် စိန့်ပက်ထရစ် ကက်သလစ်ဘုရားကျောင်းကြီးကိုလည်း ၂၀၂၅ ခုနှစ် မတ် ၁၆ ရက် ညနေပိုင်းမှာ စစ်ကောင်စီတပ်က မီးရှို့ ဖျက်ဆီးသွားခဲ့ပါတယ်။

ချင်းပြည်နယ် ၊ထန်တလန်မြို့မှာရှိတဲ့ သက်တမ်းအရင့်ဆုံး ခရစ်ယာန်ဘုရားကျောင်းတခုဖြစ်တဲ့ထန်တလန်နှစ်ခြင်းအသင်းတော်ဘုရားကျောင်း

(TBC) ကို စစ်တပ်က ၂၀၂၂ ဇွန်လ ၉ရက်မှာမီးရှို့ဖျက်ဆီးခဲ့ပါတယ်။ထန်တလန်နှစ်ခြင်းအသင်းတော်ဘုရားကျောင်း- TBC ဟာ ထန်တလန်မြို့ရဲ့ အထင်ကရနဲ့ သက်တမ်းအရင့်ဆုံးဘုရားကျောင်းဖြစ်ပါတယ်။၁၉၇၇ခုနှစ်မှာ စတင်ဆောက်လုပ်ခဲ့တာဖြစ်ပြီး ၁၉၈၅ ခုနှစ်မှာ ဖွင့်လှစ်ခဲ့တာဖြစ်ပါတယ်။

တိုက်ပွဲဖြစ်ပွားခြင်းမရှိပဲနဲ့ ရည်ရွယ်ချက်ရှိရှိ မီးရှို့ဖျက်ဆီးခဲ့တာလို့ ချင်းလူ့အခွင့်အရေးအဖွဲ့က က ​ထုတ်ပြန်ခဲ့ပါတယ်။ ဒါအပြင် စစ်ကောင်စီက ထန်တလန်မြို့ကို မီးရှို့ဖျက်ဆီးခဲ့တာမှာ TBC ဘုရားကျောင်းအပါအဝင် မီးရှို့ခံရသည့် ဘုရားကျောင်း ၄၀ ခန့်ရှိတယ်လို့​​ဖော်ပြထားပါတယ် ။

ကရင်နီပြည်နယ်၊ ဖရူဆိုမြို့နယ်၊ ဒေါညေးခူရွာရှိ ခရစ်ယာန်ဘုရားကျောင်း​ကိုလည်း ၂၀၂၂ ဇွန်လ ၁၅ ရက်​နေ့မှာမီးရှို့ဖျက်ဆီးခဲ့ပါတယ်။အလားတူ

ဒီးမော့ဆိုမြို့နယ်ရှိငြိမ်းချမ်းရေးသခင်မ ဘုရားကျောင်း ကိုလည်း ၂၀၂၁ ဇွန်လ၉ ရက်မှာမီးရှို့ခဲ့ပါတယ် ။

“ဒေသအလိုက် ကိုးကွယ်တဲ့ ဘုရားကျောင်းအများစုက တော့ ကရင်နီ ထဲ မှာ မီးရှို့ဖျက်ဆီးခံထားရပြီးပြီ။အဲဒီထဲက သက်တမ်းအရင့်ဆုံးပြောရရင် ဒါဆိုရင် ဒေါငံခါးက မယ်တော်သခင်မ ဘုရားကျောင်း၊ မိုးဗြဲ ဘုရားကျောင်း နဲ့ ဒေါညင်းခူ ဘုရားကျောင်းတွေ ဖြစ်တယ်”လို့ကရင်နီပြည်က စစ်​ဘေး​ရှောင်အ​ရေးကူညီ​ပေး​နေသူတဦးက​ပြောပါတယ် ။

စစ်တပ်က နိုင်ငံတစ်ဝန်းကပြည်သူ​တွေအ​လေးအမြတ်ထားရာ ဘာသာ​ရေးအ​ဆောက်အအုံ ရာနဲ့ချီပြီးဖျက်ဆီးခဲ့တာပါ။ ဘယ်ဘာသာကိုမှ မ​ရှောင်ပဲ ဖျက်ဆီးခဲ့တာပါ။

●မီးရှို့ခံရတဲ့ ချင်းပြည်နယ်က နတ်မတောင်

သဘာဝသစ်တောတွေနဲ့ တောရိုင်းတိရိစ္ဆာန် အများအပြားရှိနေတာကြောင့် နိုင်ငံတကာခရီးသွားများနဲ့ သဘာဝပတ်ဝန်းကျင် ချစ်မြတ်နိုးသူများ စိတ်ဝင်စားကြတဲ့ ချင်းပြည်နယ်က ခေါ်နူးစုမ်(နတ်မ​တောင်)က သစ်တောတွေကို စစ်ကောင်စီစစ်ကြောင်းက မီးရှို့ဖျက်ဆီးခဲ့ပါတယ်။ ပြီးခဲ့တဲ့ ၂၀၂၂ ခုနှစ် ဇန်နဝါရီလတုန်းက စစ်ကြောင်းထိုးလာတဲ့ စစ်ကောင်စီတပ်က ခေါ်နူးစုမ် သဘာဝကြိုးဝိုင်းဧရိယာအတွင်းလမ်းတစ်လျှောက်မှာရှိတဲ့ တောတွေ၊ မြက်ခင်းတွေ၊ သစ်ပင်တွေကို မီးရှို့​ခဲ့ကြပြီး မီးရှို့ခဲ့လို့ သဘာဝသစ်တောတွေ အကြီးအကျယ်ပျက်စီးခဲ့တယ်လို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့ကထုတ်ပြန်ခဲ့ပါတယ်။