မန္တလေးတိုင်း၊ မတ္တရာမြို့နယ်တွင် စစ်ကောင်စီအတွက် သယ်ဆောင်လာသော ထောက်ပို့ယာဥ်ငယ်တစ်စီးအား ဖမ်းဆီးရာ ကျည်အများအပြားနှင့် စစ်အသုံးအဆောင်ပစ္စည်းအချို့ သိမ်းဆည်းရမိခဲ့ကြောင်း ပြည်သူ့ကာကွယ်ရေးတပ်ဖွဲ့- မတ္တရာမြို့နယ် (ပ.က.ဖ-မတ္တရာ)က သတင်းထုတ်ပြန်သည်။
ဒီဇင်ဘာ၁၆ ရက် နေ့လယ်ပိုင်းက မတ္တရာအရှေ့ပိုင်းနယ်သို့ နယ်မြေရှင်းလင်းရေး ရောက်ရှိနေသော စစ်ကောင်စီတပ်အတွက် ရောက်လာသည့် ထောက်ပို့ယာဥ်ငယ်တစ်စီးကို ကြားဖြတ်စစ်ဆေးကာ ဖမ်းဆီးခဲ့ခြင်းဖြစ်သည်။
စစ်ဆေးတွေ့ရှိချက်အရ ယာဥ်ငယ်မှာ ပြည်သူတစ်ဦး၏ကိုယ်ပိုင်ယာဥ်ဖြစ်နေခြင်း၊ ယာဥ်မောင်းမှာလည်း သာမန်အရပ်သားပြည်သူဖြစ်နေခြင်းကြောင့် ယာဥ်ပေါ်ပါ ထောက်ပို့ပစ္စည်းများအား သိမ်းဆည်းကာ ယာဥ်နှင့်ယာဥ်မောင်းအား ကောင်းမွန်စွာ ပြန်လွှတ်ပေးလိုက်ကြောင်း (ပ.က.ဖ-မတ္တရာ)က အသိပေးသည်။
“ကျွန်တော်တို့က ကြိုတင်သတင်းရတာ။ စကစတွေ တပ်ရွှေ့တဲ့အခါကျရင် ရိက္ခာတို့ဘာတို့ကို အဲဒီလိုသီးသန့်ယာဥ်လေးတွေနဲ့ပို့တယ်ဆိုတဲ့အကြောင်း ကျွန်တော်တို့က သတင်းရရှိထားတယ်။ ကြိုတင်သတင်းရရှိတဲ့အတွက် အဲဒီကားထွက်အလာကိုစောင့်ပြီး ဖမ်းလိုက်တာ။ ကျွန်တော် တို့ထင်တာကတော့ စကစက သူတို့ကိုယ်ပိုင်ယာဥ်နဲ့သယ်တယ်လို့ယူဆတာ။ဖမ်းဆီးစစ်ဆေးလိုက်တဲ့အခါကျတော့ ပြည်သူတစ်ယောက်ပိုင်တဲ့ယာဥ်ကို ချောဆွဲပြီးတော့ သယ်ယူပို့ဆောင်တဲ့လုပ်ငန်းလုပ်တာပါ။”ဟု ပ.က.ဖ-မတ္တရာက ပြောသည်။
အဆိုပါ ထောက်ပို့ယာဥ်ငယ်ပေါ်မှ ကျည်အမျိုးအစား အများအပြားနှင့် ကင်မရာတစ်လုံး၊ လက်ကိုင်ဖုန်းမျိုးစုံ (၉)လုံး၊ Power Bank နှစ်လုံး၊ ဓားအတိုအရှည် သုံးချောင်း စသည့်ပစ္စည်းများ သိမ်းဆည်းနိုင်ခဲ့ကြောင်း ထုတ်ပြန်ချက်တွင် ဖော်ပြသည်။
ပြည်သူ့ကာကွယ်ရေးတပ်ဖွဲ့-မတ္တရာမြို့နယ် (ပ.က.ဖ-မတ္တရာ)သည် စစ်ကောင်စီထောက်တိုင်များ၊ စစ်တပ်စခန်းများ၊ စကစတပ်ဖွဲ့ဝင်များကို အဓိကပစ်မှတ်ထား ဆက်လက်တိုက်ခိုက်သွားမည်ဖြစ်ပြီး အများပြည်သူတို့၏ လုံခြုံရေးနှင့် အသက်အိုးအိမ်စည်းစိမ်းများကို ထိခိုက်မှုမရှိအောင် သတိထားဆောင်ရွက်သွားမည် ဖြစ်ကြောင်း ပ.က.ဖ-မတ္တရာက အသိပေးထားသည်။
ထို့အပြင် စစ်ကောင်စီကို ဆက်လှန်တော်လှန်နိုင်ရန် ပြည်တွင်း၊ ပြည်ပရှိ ပြည်သူများက ဆက်လက်ထောက်ပံ့ကူညီကြရန်လည်း ပ.က.ဖ-မတ္တရာက နှိုးဆော်သည်။
