ရွာများကို မီးလာရှို့သည့် စစ်ကောင်စီတပ်ကို KIA/PDFပူးပေါင်း ခုခံတိုက်ခိုက်နေ၊ PDF ရဲဘော် တစ်ဦး ဒဏ်ရာရ
စစ်ကိုင်းတိုင်း အင်းတော်မြို့နယ်အတွင်း ပြီးခဲ့သည့် သုံးရက်ကဖြစ်ပွားခဲ့သည့် တိုက်ပွဲများအတွင်း စစ်ကောင်စီတပ်မှ ၄၀ကျော် ထိခိုက်သေဆုံးရှိခဲ့ကြောင်း Indaw Revolution က ယနေ့ ဖော်ပြသည်။
အင်းတော်မြို့နယ် ညောင်ကုန်၊ဂျုံးဂျုံးကျနှင့် ပိန်းအင်းရွာအနီးတွင် ဒီဇင်ဘာ ၁၆ရက်မှ ၁၈ရက်အထိ စစ်ကောင်စီတပ်နှင့် KIA၊KPDF၊ အင်းတော် PDF ပူးပေါင်းတပ်တို့ တိုက်ပွဲဖြစ်ပွားခဲ့သည်။ အင်အား (၇၀)ဖြင့် စစ်ကြောင်းထိုးနေသော စစ်ကောင်စီတပ်ကို KIA၊ PDF ပူးပေါင်းအဖွဲ့က တိုက်ခိုက်ခဲ့ခြင်း ဖြစ်သည်။
“သူတို့ဘက်က အင်အား (၇၀)လောက်နဲ့ စစ်ကြောင်းထိုးလာတာ။ အခုလက်ရှိ (၃)ရက်ဆက် တိုက်ခိုက်မှုအပြီးမှာ (၃၀)လောက်ပဲရှိတော့တယ်။ အထိနာထားတော့ နောက် ထပ် (၁၅၀)လောက် အင်အားထပ်တိုးထားတယ်”ဟု အင်းတော် PDF မှ တော်လှန်ရေးရဲဘော်တစ်ဦးက ပြော သည်။
အဆိုပါ တိုက်ပွဲများအတွင်း ပူးပေါင်းတပ်မှ ရဲဘော်တစ်ဦး ရင်ဘတ်ထိမှန်ခဲ့ပြီး ဆေးကုသမှုခံယူနေကြောင်း ဖော်ပြထားသည်။
တိုက်ပွဲသုံးရက်အတွင်း ဂျုံးဂျုံးကျ ရွာအနီးဖြစ် သည့်တိုက်ပွဲ၌ စစ်ကောင်စီတပ်က သေဆုံးထိခိုက်များခဲ့သည်ဟု အခြား PDF တပ်ဖွဲ့ဝင်တစ်ဦးကလည်း ယမန်နေ့တွင် People’s Spring သို့ ဖြေကြားထားသည်။
“ကျွန်တော်တို့ဘက်က ကြည့်တာလည်း ေ…(စစ်ကောင်စီတပ်သား)တွေ အလောင်းတွေ ထမ်းတာ၊ ဒဏ်ရာရတဲ့ဟာတွေ ထမ်းသယ်နေတာလည်း အကုန်မြင်နေရတယ်”ဟု အင်းတော် PDF ရဲဘော်က ပြောသည်။
စစ်ကောင်စီတပ်က မီးရှို့ဖျက်ဆီး၍ ဂျုံးဂျုံးဂျရွာသစ်မှ နေအိမ် ခြောက်လုံးနှင့်စားသောက်ဆိုင် နှစ်ဆိုင်၊ ဂျုံးဂျရွာမမှနေအိမ်၁၁လုံး၊ မအူကုန်းရွာမှ နေအိမ်အလုံး၂၀နှင့် ပိန်းအင်းရွာမှ နေအိမ် တစ်လုံး မီးလောင်ပျက်စီးခဲ့သည်ဟု ဖော်ပြသည်။
ထို့ပြင်ဒေသတွင်းရှိ ကျေးရွာ ၁၂ရွာမှ ပြည်သူ ၅,၀၀၀ကျော် စစ်ဘေးရှောင်နေရကြောင်း အသိပေးထားသည်
ရှေ့ဆက်ပြီး တိုက်ပွဲများပြင်းထန်လာနိုင်သည့်အတွက် ပြည်သူများ အစစအရာရာဂရုစိုက်ကြရန် လည်း တိုက်တွန်းထားသည်။
