လွိုင်ကော်မြို့အခြေစိုက်ဆေးတပ်(တဆရ) တပ်မှ တပ်သားတစ်ဦး ပြည်သူ့ရင်ခွင် ခိုလှုံလာကြောင်း ကရင်နီဒီမိုကရက်တစ်တပ်ဦး(KDF)က ယနေ့(ဒီဇင်ဘာ ၂၁ ရက်) ထုတ်ပြန်သည်။
အကြမ်းဖက်စစ်ကောင်စီ လက်အောက်ခံ တပ်တစ်ခုဖြစ်သော လွိုင်ကော်အခြေစိုက်တပ် ဆေးတပ် (တဆရ)တပ်မှ တပ်သား မောင်ငြိမ်းချမ်း(ခ) ဖိုးလပြည့် ကိုယ်ပိုင်အမှတ် တ-၅၅၉၉၃၅ သည် KDF တပ်ဖွဲ့ထံ ခိုလှူံခွင့်တောင်ခံခဲ့သောကြောင့် သေချာ စိစစ်၍ ခိုလှူံခွင့်ပေးခဲ့ခြင်းဟု ဆိုသည်။
“သူက အရင်ကတည်းက တပ်တွင်း သတင်းတွေကို ကျွန်တော်တို့ဆီ အတိအကျ ပေးနေတဲ့ ဖရဲသီးတစ်ဦးပါ။တပ်တွင်းနေရတာ အဆင်မပြေတော့လို့ ကျွန်တော်တို့ဆီ ခိုလှုံခွင့်တောင်းတာပေါ့။ဒါပေမယ့် ဒီလ ၇ ရက်နေ့ကတည်းက သူတို့ရောက်တယ်။အဲဒါကို အသေးစိတ်စိစစ်ပြီးတော့မှ ဒီနေ့ ထုတ်ပြန်တာ”ဟု KRU တာဝန်ရှိသူက လူထုနွေဦးသို့ ရှင်းပြသည်။
ယခုတပ်သားတစ်ဦးအပါအဝင် စစ်ကောင်စီလက်အောက်ခံ ရဲနှင့်စစ်သားရှစ်ဦးမှာ KRUထံ ခိုလှုံခဲ့ပြီး လေးဦးမှာ KRU လက်အောက်ခံ တပ်ဖွဲ့များတွင် တာဝန်ထမ်းဆောင်နေသည်။
စစ်ကောင်စီဘက်မှ ပြည်သူ့တပ်ဖွဲ့များထံ ခိုလှုံခြင်းသည် တော်လှန်ရေးအောင်မြင်နိုင်ရေး ထိရောက်မူရှိ သောအကျိုးဖြစ်ကြောင်း နှင့် မည်သူကို မဆို သေချာစိစစ်၍ လက်ကမ်းကြိုနေမည်ဖြစ်ကြောင်းလည်း KDF က အသိပေးသည်။
