ဦးတေဇသားပိုင်သည့် AGDဘဏ်နှင့်လက်တွဲဆောင်ရွက်နေသည့် ငွေကြေးလွှဲပြောင်းမှုဝန်ဆောင်မှုများကို ရပ်ဆိုင်းသွားမည်ဖြစ်ကြောင်း ထိုင်းကုမ္ပဏီ True Moneyက ထုတ်ပြန်ကြေညာသည်။
မြန်မာစစ်တပ်ကိုလက်နက်ပွဲစားဆောင်ရွက်ပေးနေသည့်ခရိုနီ ဦးတေဇ ၏သားပိုင်ဆိုင်ပြီးအနောက်နိုင်ငံများက ဒဏ်ခတ်ပိတ်ဆို့ထားသည့် AGDဘဏ်အစား -မြန်မာ့ရှေ့ဆောင်ဘဏ်MABဘဏ်(Myanmar Apex Bank)ဖြင့် ၂၀၂၂ ဒီဇင်ဘာ ၁၆ ရက်ကတည်း လက်တွဲဆောင်ရွက်နေပြီဖြစ်ကြောင်း True Money မြန်မာက တရားဝင်ထုတ်ပြန်ကြေညာသည်။
MAB ဘဏ်သည် စီးပွားရေးလုပ်ငန်းရှင် ဦးချစ်ခိုင်ပိုင်ဆိုင်သောဘဏ်ဖြစ်ပြီး စစ်ကောင်စီက ဦးချစ်ခိုင်တို့သားအဖကိုဖမ်းဆီးထားသည်။သို့သော် ဧဒင်ကုမ္ပဏီအုပ်စုပိုင်ရှင် ဦးချစ်ခိုင်၏ Denko ဆီဆိုင်လုပ်ငန်း ၊MAB စသောလုပ်ငန်းများမှာ ဆက်လက်လည်ပတ်နေသည်ကိုတွေ့ရသည်။
ထိုင်းအခြေစိုက် True ကော်ပရေးရှင်းက AGDဘဏ်ဖြင့် ၂၀၁၅ခုနှစ်တွင်မြန်မာပြည်တွင်းရှိငွေလွှဲ၊ငွေထုတ်ဝန်ဆောင်မှုများကို ဆောင်ရွက်ခဲ့ခြင်းဖြစ်သည်။
True Moneyသည် ပြည်တွင်း၌ ဘဏ်မဟုတ်သော ငွေလွှဲလုပ်ငန်းများအနက် နာမည်ကြီး ငွေလွှဲဝန်ဆောင်မှုလုပ်ငန်းတစ်ခုဖြစ်သည်။
ထိုင်းနိုင်ငံတွင် True Corporationက ၂၀၀၃ ခုနှစ်၌ TrueMoneyကုမ္ပဏီကိုစတင်တည်ထောင်ခဲ့ပြီး Truemoney Myanmar ကို ၂၀၁၄ ခုနှစ်၊ နိုင်ဝင်ဘာလတွင် တည်ထောင်ခဲ့သည်။
True Moneyသည်ထိုင်း၊ကမ္ဘောဒီးယား၊မြန်မာ၊အင်ဒိုနီးရှား၊ဗီယက်နမ်နှင့်ဖိလစ်ပိုင် စသည့်နိုင်ငံများတွင် ငွေကြေးဆိုင်ရာ ဝန်ဆောင်မှုပေးနေသော ကုမ္ပဏီတစ်ခုဖြစ်သည်။
အမေရိကန်ဘဏ္ဍာရေးဝန်ဆောင်မှုလုပ်ငန်းစုဖြစ်သည့် VISA Internationalကလည်း AGDဘဏ်နှင့် လက်တွဲလုပ်ကိုင်မူရပ်ဆိုင်းလိုက်ပြီဖြစ်ကြောင်း ၂၀၂၂ဖေဖော်ဝါရီလအတွင်း ထုတ်ပြန်ခဲ့သေးသည်။
စစ်ကောင်စီအတွက်လက်နက်ဝယ်ယူရေးဆောင်ရွက်ပေးသည့် ထူးကုမ္ပဏီအုပ်စုကိုဥရောပသမဂ္ဂက ၂၀၂၂ ဖေဖော်ဝါရီ ၂၂ ရက်တွင် စီးပွားရေးအရဒဏ်ခတ်ပိတ်ဆို့ခဲ့သည်။ ဗြိတိန်နိုင်ငံကလည်းထူးကုမ္ပဏီအုပ်စုကို ၂၀၂၁ စက်တင်ဘာ၂ ရက်ကတည်းကပိတ်ဆို့အရေးယူမှုများပြုလုပ်ခဲ့သည်။
ထိုအပြင်အမေရီကန်၊ ဗြိတိန်နှင့်ကနေဒါနိုင်ငံတို့ကလည်း ဦးတေဇနှင့်၎င်း၏သားနှစ်ဦးဖြစ်သောပြည့်ဖြိုးတေဇ၊ထူးထက်တေဇတို့ကို ၂၀၂၂ ဇန်နဝါရီ ၃၁ရက်တွင် ဒဏ်ခတ်အရေးယူပိတ်ဆို့မှုပြုလုပ်ခဲ့သည်။
