နိုင်ငံရေးအကျဉ်းသားတစ်ဦး အနည်းဆုံးသေဆုံးခဲ့ပြီး အများအပြား ဒဏ်ရာရခဲ့သည့် ပုသိမ်ထောင်တွင်း အကြမ်းဖက်ညှင်းပမ်းနှိပ်စက်မှုလုပ်ရပ်အပေါ် ပြင်းထန်စွာကန့်ကွက်ရှုတ်ချကြောင်းအမျိုးသားညီညွတ်ရေးအစိုးရ ဧရာဝတီတိုင်းစစ်ဒေသခွဲကွပ်ကဲရေးအဖွဲ့က ယနေ့ထုတ်ပြန်ပြီး မတရား ကျူးလွန်ခံခဲ့ရသည့် နိုင်ငံရေးအကျဉ်းသားများ အားလုံး အတွက် တရားမျှတမှု ရရှိနိုင်ရေးကိုဆောင်ရွက်သွားမည်ဟု အသိပေးလိုက်သည်။
ပုသိမ်ထောင်တွင်ဇန်နဝါရီလ ၅ ရက်ကစစ်အုပ်စု၏လက်အောက်ခံထောင်အာဏာပိုင်မျာကမတရားဖမ်းဆီးခံနိုင်ငံရေးအကျဉ်းသားများအား လူကိုသေစေနိုင် သည့် လက်နက်များဖြင့် ပစ်ခတ်ခြင်း၊ အသံဗုံးခွဲခြင်း၊ အုပ်စုလိုက်ဝိုင်းဝန်းရိုက်နှက်ခြင်း၊ လက်ပြန်ကြိုးတုပ်ပြီး အပြင်းအထန်ရိုက်နှက်ခြင်း ပြုလုပ်ခဲ့ရာနိုင်ငံရေးအကျဉ်းသားအနည်းဆုံးတစ်ဦးသေဆုံးခဲ့ရပြီး၊ ပျောက်ဆုံးသူတစ်ဦးနှင့်နိုင်ငံရေးအကျဉ်းသားအများအပြား အပြင်းအထန် ဒဏ်ရာရရှိခဲ့သည်။အသက်အန္တာရာယ် စိုးရိမ်ရသူ များလည်းရှိသည်ဟုသိရသည်။
ထိုလုပ်ရပ်များသည် အကျဉ်းထောင်လုပ်ထုံးလုပ်နည်းများ ကို ကျော်လွန်၍ လုပ်ဆောင်ခြင်းဖြစ်ပြီး မတရား ညှဉ်းပန်းနှိပ်စက်မှုနှင့်ဥပဒေမဲ့သတ်ဖြတ်ခြင်းဖြစ်သည့်ကြီးမားသောရာဇဝတ်မှုကိုပါ ကျူးလွန်လိုက်သည့် လုပ်ရပ်ဖြစ်ကြောင်း ဧရာ၀တီတိုင်းစစ်ဒေသကွပ်ကဲရေးအဖွဲ့က ထုတ်ပြန်သည်။
ထောင်တွင်းအကြမ်းဖက်နှိပ်စက်မှု တွင် အင်အား (၅၀) ခန့်ရှိ ထောင်အာဏာပိုင်နှင့် ထောင်ဝန်ထမ်းများ ၊ ရဲ နှင့် တပ်ရဲပြေး အကျဉ်းကျနေသူများ ပါဝင်ကျူးလွန်ခဲ့ သည်ဟု သိရကြောင်း သိရကြောင်းလည်းဖော်ပြထားသည်။
ပုသိမ်ထောင်ဖြစ်စဉ်သည် အင်အားအလွန်အကျွံသုံး၍ အသက်သေဆုံးစေသည့် ညှဉ်းပန်းနှိပ်စက်ခြင်း၊ အကျဉ်းထောင်တွင်း မတရားညှဉ်းပန်းနှိပ်စက်ခြင်း နှင့် ဥပဒေမဲ့မတရားသတ်ဖြတ်ခြင်းကိုကျူးလွန်ကြောင်းထင်ရှား၍အကြမ်းဖက်စစ်အုပ်စုနှင့်တစ်ကွ သက်ဆိုင်ရာထောင်အာဏာပိုင် များ၊ အကြမ်းဖက်မှုကျူးလွန်ခဲ့သူများ၊ အမိန့်ပေးစေခိုင်းသူများနှင့်ကိုယ်တိုင်ကျူးလွန်သူများအားလုံးတာဝန်ခံရမည်ဖြစ်ကြောင်းကြေညာခဲ့သည်။
အကြမ်းဖက်စစ်အုပ်စု ၏အမာခံထောက်တိုင်များဖြစ်ကြသည့် တရားသူကြီးများ၊ စစ်သားများ၊ ရဲများ၊ အကျဉ်း ဦးစီးဝန်ထမ်းများက စစ်အုပ်စုအလိုကျ မတရားဖမ်းဆီးခြင်း၊ ဥပဒေမဲ့မတရားပြစ်ဒဏ်များချမှတ်ခြင်း၊ နိုင်ငံရေးအကျဉ်းသားများအား ရည်ရွယ်ချက်ရှိရှိဖြင့် ညှဉ်းပန်းနှိပ်စက်ခြင်း၊ အနိုင်ကျင့်စော်ကားခြင်းများ ပြုလုပ်လျက်ရှိနေကြောင်း ဧရာဝတီတိုင်းစစ်ဒေသခွဲကွပ်ကဲရေးအဖွဲ့ကထုတ်ပြန်သည်။
“ကြိုးမိန့်ပေးခံရတဲ့ဆရာကောင်းခန့်ကျော်ကိစ္စနဲ့စဖြစ်တာကြိုးစင်ဆောက်တဲ့ကိစ္စကို ကန့်ကွက်ကြလို့ကိုဝေယံဖြိုးအပါအဝင်ရှစ်ဦးကိုဆွဲထုတ်ပြီးတစ်ညလုံးရိုက်တာ။ပြန်ပို့တော့ကိုဝေယံဖြိုး ပါမလာတော့ဘူး” ဟုဧရာဝတီတိုင်း၊ပုသိမ်မြို့မှ တော်လှန်ရေးလှုပ်ရှားသူတစ်ဦးကပြောသည်။
ကိုဝေယံဖြိုးမှာ သေနတ်ဖြင့်ပစ်သတ်ခံရပြီး နှိပ်စက်ညှင်းပန်းခံရပြီး ဒဏ်ရာအပြင်းအထန်ရရှိသူများထဲမှ ကိုဝင်းမင်ထက်မှာလည်းကျဆုံးခဲ့ကြောင်း AAPP မှသိရသည်။
“လူမဆန်တဲ့ လုပ်ရပ်တွေအတွက် စစ်ကောင်စီနဲ့အပေါင်းအပါတွေ ပြန်ပေးဆပ်ရမယ်။ အလှည့်ကျမနွဲ့ကြစတမ်းပဲ” ဟုသေဆုံးသူ ကိုဝေယံဖြိုး၏ သူငယ်ချင်းတစ်ဦးကလည်းပြောသည်။
လက်ရှိပုသိမ်အကျဥ်းထောင်မှူး ညွှန်ကြားရေးမှုးနေမင်းထက်ဆိုသူဖြစ်ပြီး ၎င်းသည် ပြီးခဲ့သည့် ဒီဇင်ဘာလကုန်ပိုင်းတွင်မှပြောင်းရွေ့လာသူဟု ဧရာဝတီတိုင်းတော်လှန်ရေးအင်အားစုက ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)