မြန်မာနိုင်ငံအရေး ကုလသမဂ္ဂ လုံခြုံရေးကောင်စီက အတည်ပြုခဲ့သောဆုံးဖြတ်ချက် နှင့်ပတ်သက်ပြီး လှိုက်လှဲစွာ ကြိုဆိုကြောင်း အမျိုးသားဒီမိုကရေစီအဖွဲ့ချုပ်(NLD) ဗဟိုအလုပ်ကော်မတီက ယနေ့ ထုတ်ပြန်လိုက်ပြီး ဆုံးဖြတ်ချက်တွင် ပါဝင်သော မတရားဖမ်းဆီးခံထားရသည့် ဒေါ်အောင်ဆန်းစုကြည် အပါအဝင် နိုင်ငံရေး အထိန်းသိမ်းခံများအား စစ်ကောင်စီမှ ခြွင်းချက်မရှိလွှတ်ပေးရန် တောင်းဆိုချက် သည် မြန်မာနိုင်ငံတည်ငြိမ်ရေးအတွက် အရေးပါသော ခြေလှမ်းဟုခံယူကြောင်း အသိပေးဖော်ပြသည်။
တရားမဝင် အာဏာသိမ်းစစ်ကောင်စီ၏ ပြည်သူလူထုအပေါ်လက်နက်အားကိုးဖြင့် အနိုင်ကျင့်နှိပ်စက် နေမှုများ၊ လူသားမျိုးနွယ်အပေါ်ဆန့်ကျင်သော ရာဇဝတ်မှုများကျူးလွန်နေခြင်းကိုလည်း အပြီးတိုင်ချုပ်ငြိမ်းရန် စစ်ကောင်စီအား လက်နက်ရောင်းချမှု ပိတ်ပင်တားဆီးနိုင်ရေးအတွက် နိုင်ငံတစ်ခုချင်းစီ၏ ပူးပေါင်းကြိုးပမ်းမှုကိုလည်း မဖြစ်မနေလိုအပ်ချက် တစ်ခုဟု ယုံကြည်မျှော်လင့် ကြောင်း NLD ၏ ထုတ်ပြန်ချက်၌ ပါရှိသည်။
မြန်မာနိုင်ငံတွင်ဖြစ်ပေါ်လျက်ရှိသောအခြေအနေများနှင့်ပတ်သက်သည့် ကုလသမဂ္ဂလုံခြုံရေးကောင်စီ ဆုံးဖြတ်ချက် အမှတ် ၂၆၆၉ အား ချမှတ်အတည်ပြုနိုင်ခဲ့ခြင်းသည် ၁၉၄၈ ခုနှစ် မြန်မာနိုင်ငံ လွတ်လပ် ရေးရယူနိုင်ပြီးနောက်ပိုင်း မြန်မာ့အရေး နှင့်ပတ်သက်သည့် ကုလသမဂ္ဂလုံခြုံရေးကောင်စီ၏ ပထမဆုံး သော ဆုံးဖြတ်ချက်ဖြစ်သကဲ့သို့ တည်ဆဲဥပဒေများကို ချိုးဖောက်၍ အဓမ္မအာဏာ သိမ်းထားသော စစ်ကောင်စီကို မြန်မာပြည်သူတွေကိုယ်စား အရေးယူနိုင်မည့် အလားအလာများ ထုတ်ဖော်ပြသ လိုက်ခြင်းဖြစ်၍ ကြိုဆိုသည်ဟု NLDက ထုတ်ပြန်သည်။
အဆိုပါဆုံးဖြတ်ချက်သည် အာဏာသိမ်းပြီးနောက်ပိုင်း စစ်ကောင်စီက ၎င်းတို့အားဆန့်ကျင်သည့် ပြည်သူလူထုကို မတရားဖမ်းဆီးနှိပ်စက်သည့်အပြင် တိုင်းရင်းသားနယ်မြေများနှင့် စစ်ကိုင်းတိုင်း၊ မကွေးတိုင်း၊ တနင်္သာရီတိုင်းတို့ကို လေကြောင်းဖြင့်တိုက်ခိုက်ခြင်း၊ ကျေးရွာများကိုမီးရှို့ဖျက်ဆီးခြင်း စသည့်ရက်စက်ကြမ်းကြုတ်သည့် လုပ်ရပ်များကို ရဲရင့်ပြတ်သားစွာတုံ့ပြန်နေကြသော ပြည်သူလူထု၏ ကြိုးပမ်းမှုကို အသိအမှတ်ပြုခြင်းဟု ခံယူကြောင်း ဖော်ပြထားသည်။
ဆုံးဖြတ်ချက်မူကြမ်းကို ဦးဆောင်ရေးဆွဲကာ အတည်ပြုချက်ရရှိနိုင်ရေး ကြိုးပမ်းပေးခဲ့သော ဗြိတိန်နိုင်ငံနှင့် ဝိုင်းဝန်း ဆွေးနွေးပေးခဲ့ကြသော လုံခြုံရေးကောင်စီအဖွဲ့ဝင်နိုင်ငံများကိုလည်း ကျေးဇူးအထူးတင်ရှိကြောင်းလည်း ဖော်ပြထားသည်။
NLD၏ ထုတ်ပြန်ချက်တွင် အာဆီယံအဖွဲ့၏ ဘုံသဘောတူညီချက် ၅ချက်နှင့်ပတ်သက်သည့် သဘောထားကို ဖော်ပြခဲ့သည်။
မြန်မာနိုင်ငံဒီမိုကရေစီလမ်းကြောင်းပေါ် ပြန်လည်ရောက်ရှိရေးအတွက် အာဆီယံအဖွဲ့၏ ဘုံသဘောတူညီချက် ငါးချက် ကို အခြေခံမှုသည် ပြည့်စုံလုံလောက်မှုမရှိသော်လည်း ပြဿနာများပြေလည်ရေးလမ်းစ ဖြစ်လာနိုင်သဖြင့် နိုင်ငံတကာအသိုက် အဝန်းအနေဖြင့် ပိုမိုတက်ကြွစွာ အချိန်ကာလတစ်ခုသတ်မှတ်ကာ အကောင်အထည်ဖော် ဆောင်ရွက်ပေးပါရန် NLDက တိုက်တွန်းထားသည်။
