ရန်ကုန်တိုင်း၊ မှော်ဘီမြို့နယ်အတွင်းရှိ Grand Royal အရက်ချက်စက်ရုံ မီးလောင်ကျွမ်းနေရာမီးအားများသဖြင့်အဆင့်၃ ( Level 3) အဆင့် ဖြင့်မီးငြိမ်းသတ်လျက် ရှိကြောင်း မြန်မာနိုင်ငံမီးသတ်တပ်ဖွဲ့က ထုတ်ပြန်သည်။
မှော်ဘီမြို့နယ် လိပ်ပုတ်ကျေးရွာအုပ်စု၊ အမှတ် ၄လမ်းမကြီးရှိသောနာမည်ကြီး အရက်စက်ရုံမှာယနေ့ (ဇန်နဝါရီ ၁၃) ညနေ ၃ နာရီခွဲခန့်က စတင် လောင်ကျွမ်းခြင်းဖြစ်ပြီး ညနေ ၄ နာရီ ကျော်အထိ မီးငြှိမ်းသတ်နိုင်ခြင်းမရှိသေးကြောင်း မှော်ဘီမြို့ခံ ပြည်သူတစ်ဦးက ပြောသည်။
![(Grand Royal အရက်ချက်စက်ရုံမီးလောင်ကျွမ်းနေမှု။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/01/325257164_857453372158845_4341748543024449939_n.png?resize=768%2C1024&ssl=1)
![(Grand Royal အရက်ချက်စက်ရုံမီးလောင်ကျွမ်းနေမှု။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/01/323447527_726679602431662_3311064127567022561_n.png?resize=480%2C640&ssl=1)
” ၃ နာရီခွဲလောက်ထဲက လောင်နေတာပါ။ ပေါက်ကွဲသံတွေလည်းတစ်ချက်တစ်ချက်ကြားရတယ်။အရက်ပေပါတွေပေါက်တာထင်တယ်။ မီးက တော်တော်များတယ်။ အဝေးကနေတောင် မီးခိုးလုံးတွေ မြင်နေရတယ်။ မီးသတ်ကားတွေရော၊ လူနာတင်ကားတွေရော အများကြီး သွားနေတာ တွေ့ရတယ် ” ဟု မှော်ဘီမြို့ခံတစ်ဦးကပြောသည်။
ကနဦးရရှိသောသတင်းအရမီးလောင်ကျွမ်းမှုကြောင့်လူထိခိုက်မှု မရှိသော်လည်း စက်ရုံပစ္စည်း အများအပြား ထိခိုက်ပျက်ဆီးနိုင်ကြောင်းမှော်ဘီမြို့နေပြည်သူအချို့က ပြောသည်။
မီးကြီးသဖြင့် မှော်ဘီမြို့နယ်မီးသတ်စခန်းမှ မီးသတ်ယာဉ်များအပြင် ရန်ကုန်တိုင်းအတွင်းမှ မီးသတ်ယာဥ်များလည်း ထွက်ခွာငြိမ်းသတ်လျက်ရှိကြောင်း ဒေသခံတစ်ဦးက ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)