မီတာခမဆောင်လို့ဆိုပြီး မန္တလေးခရိုင် ပုသိမ်ကြီးမြို့နယ်အတွင်းက ကျေးရွာအားလုံးနီးပါး လျှပ်စစ်မီးဖြတ်တောက်ခံထားရတယ်လို့ လျှပ်စစ်ဝန်ထမ်းတွေနဲ့ ဒေသခံတွေထံကနေ စုံစမ်းသိရပါတယ်။
ပုသိမ်ကြီးမြို့နယ် လျှပ်စစ်ရုံးက မီးဖြတ်ထားတာဖြစ်ပြီး ကျေးရွာအလိုက် ရွာလုံးကျွတ် မီတာခကြွေးကျန် ဆောင်ပြီးမှသာ မီးပြန်ပေးမှာဖြစ်တာကိုသိရတယ်လို့ မီးဖြတ်ခံရတဲ့ ရွာ မှာနေထိုင်သူ ဒေသခံတစ်ဦးကပြောပါတယ်။
” မီတာဆောင်တဲ့အိမ်ကော မဆောင်တဲ့အိမ်ကောဖျက်ထားတယ်၊အားလုံးဆောင်ပြီးမှ ပေးမယ်လို့ပြောတယ်”လို့ မီးဖြတ်ခံရတဲ့ ကျောက်မီးကျေးရွာ ဒေသခံ ကပြောပါတယ်။
မီတာခမဆောင်ရင် မီးဖြတ်တဲ့အပြင် တရားစွဲတာကိုလည်း ရင်ဆိုင်ရမယ်လို့ ခြိမ်းခြောက်ခံထားရတယ်လို့ ဒေသခံတွေကပြောကြပါတယ်။
ဒီလို စစ်အုပ်စုက ဖိအားပေးတဲ့အတွက် မီတာခသွားရောက်ပေးဆောင်ရသူတွေလည်းရှိနေပါတယ်။
ပုသိမ်ကြီးမြို့နယ်အတွင်းမှာ ကျေးရွာအုပ်စု ၅၈ခုနဲ့ ကျေးရွာပေါင်း၁၄၀နီးပါးရှိပါတယ်။
